Esekiéli31
Urúei Ehiptuna, kei aban hibúari
1Weyu furumiñe lidan lǘrüwan hati, lidan irumu unsu, aba ladimurehan Aburemei nun, lariñaga:2—Liráü wügüri, ariñagabá lun lurúeite Ehiptu luma houn sun lumutuniña:«Ka ítarabei kei buguya lidan buéirigun?3Ítara biña kei aban gudi o aban lan hibúari le lídangiñeti Líwanu, lau lubuidun burí lilimun, le íchugubei lamuñounga lun dabíara, íñuti darí lun ladagarun lígirugu luagu dúeri.4Íderagua lumuti huya luma duna le lidunari múa lun laweiridun; saliguati duna éibaaguati geyegua lau le ñein lubéi labunúa; tugua lumuti lébeinite sun tídibu wewe le ñeinbei.5Kei líbebei lidunari, aba laweiridun sügǘ lau líbiri burí tídibu wewe le dabiararugubei; aba lagibedagun lilimun.6Ñǘbuintiña sun hawuyeri dunuru adüga hádibu luagu burí lilimun; emeilihatiña sun hawuyeri animaalugu áraabuna lábugiñe. Gayaraati haganóun saragu gürigia lábugiñe lamuñadiri.7Aban bugaha tídibu wewe buídumeraüti, wéiriti, miginaguti lilimun, lubaduñein saragu duna lílagüle.8Úati ni aban hibúari lidan lufulurin-agei Bungiu kei ligia; úati ni aban lídibu gudi galimunti libe lilimun, úati ni aban tídibu igu gabanati kei ligía, úati ni aban tídibu wewe lidan lufulurin-agei Bungiu buídumeraüti kei ligía.9Buídumeraüti nadügüni, lau saragu limu; gimugati bugaha le líbiri burí tídibu wewe le lídanbei lufulurin-agei Bungiu lun».10Lariñahare lubeiti Bungiu:
—Chülüti tídibu wewe ligía aweirida saragu, darí lun lachülürün lígirugu dúerirugu; wéiriti laweiridun darí lun labuinchun lau pantaü.11Ligía mabusenrun naali lubéi; nígirubei lun lábürühan labun lubafu aban ábuti terencha, le lunbei lóuseruni keisi le ladünabei ladüga luriban.12Háchugubei terencha ha fásitimabaña ábame hígiruni múarugu; lábürühaba burí lilimun halaguañu lidan sun áraabu, luma fulasu wayati, le fulasurugubei, hanurahaba sun gürigia ha buga aganóubaña lábugiñe lamuñadiri, ábame hígiruni.13Hayabinba sun hawuyeri dunuru aganawa luagu, harounruba sun hawuyeri animaalugu áraabuna luagu lilimun.14Úaalime ni aban tídibu wewe aweiriduti saragu, íbini lurugabuñein lan duna, ni anhein áturawagua buidu, machülübei lígirugu luagu dúeri, mamigifedun ligíame saragu. Siádiwaaña súngubei lun hóunwegun, lun hararirun labun múa, lun hóundaragun hama ha lídanhañabaña umúahaü.15—Nariñahare au le Aburemei danme lararirun tídibu wewe lidoun umúahaü, nadügüba lun lamabeidun barana lau íruni; nerederubei léibaagun duna éibaaguati luma burí lébeinite duna; nadügüba lun lírudagun wübü le Líwanu, luma lun lásaürün sun tídibu wewe le áraabubei.16Danme narariragüdüni lidoun umúahaü lun lóundaragun hama ha hilaañabaña, hadadagaruba néchanigu lau lamuri lábürühan. Ábame lárügüdün tídibu wewe le lani Edén gurasu, le wéndetimabei le buídutimabei láturawagun lidan wübü Líwanu.17Hagía, harariruba giñe kei ligía lidoun umúahaü lun hóundaragun hama ha óunwegubaña wuriburugu. Ha buga aganóubaña lábugiñe lamuñadiri, hachagarawaguba haganaguóun néchanigu.18Úati bugaha ni aban tídibu wewe lidan Edén kei ligía lidan uéndeni luma imigifeni; lau sun lira, larariruba luma líbiri tídibu wewe le lídanbei Edén lábugiñoun múa lun laganóun haganagua gibe tubungiutegu, haganagua gürigia ha óunwegubaña wuriburugu. Tídibu wewe ligía, urúei Ehiptuna hau sun lumutuniña. Au, le Aburemei ariñagubalin.
Bible Society of Honduras