Esekiéli16
Magunfulirun lan Herusalén
1Aba lariñagun Aburemei nun:2—Liráü wügüri, subudigüdabei liyereehabu katei le ladügübei Herusalén lun.3Ariñagabá lun: Anihán lariñagubei Aburemei: Buguya Herusalén, Kanán bágurahoua: Amoruna meha búguchi, Étüna búguchu.4Weyu le bágurahounbei, mibugúntu bari, mágawagüdünwatibu, máhurudawaguntibu lau salu móuburawagun buguya.5Úati gudemehabuti bun, ni ebereseruti lun ladügüni burí katei le bun. Weyu le bágurahounbei, igirúatibu fuiñu áraabu ladüga háhünewati lan bun.6Aba násügürün burugabugiñe, dan narihinbei lapaparahaña lan bugudi lidan bita, aba nariñagun luagu lunti lan babagaridun.7Aba naweiridagüdünibu kei aban nadü áraabu, aba biabin lun ábanbadibu lan würi. Aba laweinamudun baniguagu, aba lamiginagudun bídiburi. Gama lumoun surusu biña sunsuinagubei.8—Ábaya násügürün burugabugiñe, aba naríagunibu; aba narihin luagu lídanhadibu lan dan lun badarihóun. Aba nadouragun lau basurusuhan, aba giñe nadügün aban daradu lánina maríei buma, aba nánihadibu lan. Au, le Aburemei ariñagubalin.9Ágawagüda numutibu, chibá numuti hitaü buéigiñe ani hurugua nabu lau ibiñein;10aba nadaürün aban dúnigu to buíduburiti tikolorun buagu, tuma geidi to lautu gueru fínuti; aba níchugun aban béliti lauti linu bun tuma aban dúnigu fínutu;11wéndegüda numutibu lau burí umegeni le lauti golu, dáütina bángüli luagu barüna luma iñari luagu bigiina;12rútina aban bagü luagu bígiri, arigeilaü luagu barigei luma aban ridi le wéndeti bábulugu.13Rédeitibu afurarúañu lau golu luma pülata, lautu linu le fínuti badaüragun to buíduburiboun tikolorun. Tubuidun-agei fein béigiboun, sírudu luma lagüle oliwu. Chülütibu lun magadiñebadibu lan saragu; ñǘbuintibu lun ábanbadibu lan würi urúei.14Aganbahóuati buagu hadan néchanigu luagu bumagadiñen, úati mégeiti buagu ladüga au lan ewendedagüdübadibu, au, le Aburemei ariñagubalin.15—Gama lumoun aba bemenigidun luagu bumagadiñen luma lubuidun ladimurehoun buagu lun bahoruhan lau bederegeragun bungua houn sun ha ásügürütiña.16Adaaguatibu kianpu tau badaüragun luagu burí wübü lun bahoruhan luma lun bóundarun hama gibe tubungiutegu tidan.17Barǘ bumuti burí umegeni lauti golu luma pülata le meha nedewehabei bun, aba badügün hayawa gürigia lau lun báhuduragun houn,18daü bumutu badaüragun to buíduburiboun ikolorun hawagu, dagagüda bumuti giñe garaba luma kupali le níchugubei bun houn.19Rútina fein bun, to táutuboun tubuidun-agei fulúaru, garaba luma sírudu le aubei néigagüdabu, gama lumoun aba badagaragüdüni houn keisi edewehani le buiti líhemen. Au, le Aburemei ariñagubalin.20—Barǘ bumutiña giñe isaanigu ha bisaanigu nau, aba báfaraguniña lun badagaragüdüniña houn. Memeniti san bahoruhan bun,21bóugudin lubéi luéi lira, aba báguduniña nirahüñü lun badagaragüdün houn guáriuagu hagía?22Guentó lidan lagübüri bibagari le lánina ahoruhani, maritagunhadibu luagu dan le meha ñǘraügidibu, dan le meha surusu bubéi sunsuinagubei, ágawaha lidan bita guánarügü.23—Nariñahare au, le Aburemei: Fugiabu buguya! Bóugudin luéi sun wuribani le badügübei búniwagua,24aransehatibu ubaraü bubarua lidan sun fulasu wayati lun báhuduragun houn guáriuagu luma lun bahoruhan.25Aduruugüda bumuti bumagadiñen múarugu. Aba bíchaagun bungua lun furumiñeguarügü ásügürüti, aba bederegeragun bungua lun ahoruhani luma lun láhudurawaguniwa houn guáriuagu.26Ahoruhatibu hama bubesinanigu Ehiptuna, ha íñubaña ita, aba bagañidagüdünina lau bigaburi le lánina ahoruhani.27—Ábati niñuruni núhabu lun nabeichunibu. Aba nagidaruni sun abiniruni le meha níchaahabei bun, aba nederegerunibu háhaburugun Filistéana ha iyereehabúbaña bun ladüga luriban bóuserun.28Gama lumoun memeniti lira bun, aba bahoruhan hama Asiriana ni ítara magufurumaduntibu.29Aba basigirun ahoruha Babilónia, le hageira adaagutiña marasun; gama lumoun ni ítara magufurumaduntibu.30Nariñahare au, le Aburemei: Wéiriti meha tisandi banigi badügünbalin burí sun katei le, le tigaburi aban horu to mabusigaritu!31Adügatibu latarü lidan lébeha sun üma lun báhuduragun houn guáriua luma lun bahoruhan. Gama lumoun ámuti bóuserun hawéi híbiri horu: Maguburahantibu buougua!32—Würi to agabarahabalin túmari, rúguatu tungua houn terencha.33Sun horu fáyeiwatu luagu tíchaagun tungua; ánheinti buguya rúrügütibu idewesei houn bubúaligu, fayei bumutiña lun hayabin lídangiñe sun fulasu lun hafigouhan buma.34Garabaguati ligaburi bahoruhan hawéi híbiri würiña: Máluahan hamutibu wügüriña lun hafigouhan buma, ani mafayeirun hamutibu giñe, buguya afayeirubaliña. Lídanrügüñein lira amu lan bóuserun!35—Aganbabéi lubeiti nererun, buguya horu.36Au, le Aburemei nariñahare bun: Asurusuhaadibu lun bahoruhan hama bubúaligu luma hama hagübüri buguariuan, ani wiyugüda baali hata birahüñü ha báfaragubaña hilagubei lun badagaragüdün.37Ligía nóundaragubaña lubéi sun bubúaligu ha bagundaaragüdübaña, sun ha hínsiñebaña bun hama sun ha iyereegubaña bun; nóundaragubaña súngubei geyegua bau, ábame naragachaguagüdünibu hagibugiñe lun harihinibu surusu sunsuinagubei.38Naguseragüdübadibu luagu agabarahani luma áfarahani. Ábame nederegerunibu lun óunweni lidan nemeidin luma nigañi.39Nígirubadibu háhaburugu, lun hagünrinchaguni fulasu burí le buga badügübei lun bíchugun kultu houn guáriuagu luma lun bahoruhan. Haragachuboun badaüragun buéi luma buéndegun, ábame hígirunibu surusu sunsuinagubei.40—Hiñuraguagüdübaña lílana fulasu houngua buagun, hachamuraguba dübü buagun, ábame háfarunibu tau hefeinte.41Hágudahaboun buban, ábame hafayeiragüdünibu luagu bidurun hagibugiñe saragu würiña. Nagumuchaguagüdübei bahoruhan, mafayeirundigia báañame bubúaligu.42Ábameti lagufurumadun nigañi ábame lagalumadun nemeidin; ábame darangilu nan, gumume nigañi.43Bulíei bumuti nóuserunibu dan meha le nibureingidibu, aba bagañidagüdünina lau lagübüri bóuserun le hóuserun irahüñü; nabeichubadibu lubeiti luéigiñe bigaburi le. Au, le Aburemei ariñagubalin.Le tusan úguchuru ligía tusan irahü
44—Lariñawagúba buagu: “Kei tigaburi úguchuru, ítara tigaburi tiráü”.45Tiráü buga aban úguchuru to iyereehabúboun lun túmari buguya, iyereehabu houn tirahüñü. Étüna meha húguchu sun huguya, Amoruna meha húguchi.46Luéigiñe nórute, ñeinñoun meha bíbugaña to uburugu Samaria lau burí aüdü le geyegubei lau; luéigiñe suru, bamulelua to Sodoma lau burí giñe aüdü le geyegubei lau.47Aba bafalaruni hani hénpulu adügei lagübüri burí katei iyereehabúti lememe hadügübei.48Au, le Aburemei, fiñutina luagu nibagari luagu ni lan bamulelua Sodoma, madügün tágili le badügübei.49Anihán meha tifigounbei bamulelua Sodoma: Tanaagun tungua ladüga liibe teigin, luma luagu lubuidun dan tun, ani míderaguntu gudemetiña ni ha mégeihabubaña.50Aba hanaagun houngua, aba burí hadügün katei le auti magundan nan; ligía lébubei nagünrinchaguniña.51Ánhounti Samaria madügün tumuti ni lamidan figóu le badügübei. Adügaadibu burí katei wuribatimati sügǘ tau, darí lun ánhaña lan ichugúa bóubagiñe, herederuba kei maduruntiña.52Gasu lubeiti báfaguni bǘnabugüdüniwa, lugundun lau badügün figóu wíyetimati tuéi bíbugaña tuma bamulelua, adügatibu lun herederun keisi maduruntiña.53—Náguyugüdübei lubuidun dan tun Samaria tuma Sodoma lau sun aüdü burí le geyegubei lau; níchigayaba giñe lubuidun dan bun,54gama lumoun gasu báfaguni bǘnabugüdüniwa barǘ buguyame busiganu luagu le badügübei, ítara luba lébuna ban gurasu houn.55Dánmeti ítarayaali Sodoma luma Samaria lau aüdü le geyegubei lau kei habéi meha furumiñe, bítaradayaba giñe lau sun burí aüdü le geyegubei bau kei bubéi meha.56Adügatibu buga bula lau tabeichún bamulelua Sodoma, dan buga basandiragun bungua lau pantaü,57ani marihíngili buga buriban, gama lumoun guentó, anaba hamutibu Edomuna, Filistéana, hama sun bubesinanigu; barǘ hamutibu kei ni kata!58Guentó gasu báfaguni babeichúniwa ladüga buriban. Au, le Aburemei ariñagubalin.59—Au, le Aburemei, nariñahare bun: Nafayeiragüdübadibu luagu bidurun, lugundun magunfulirun bumuti bidaradun.60Anati au, naritaguba luagu daradu le buga nadügübei buma dan meha le ñǘraügidibu, ábame nadügün aban daradu le magumuchaditi buma.61Danme le níchugunu bíbugaña tuma bamulelua bun keisi birahüñü, lau sun ua lan lidan wadaradun, baritaguba luagu binadu bigaburi, ábame banügün busiganu.62Neseridagüdübei nidaradun buma, ábame basubudiruni luagu au lan Aburemeibei.63Baritaguba, ábame basandirun busiganu luma ǘnabuguni darime lun máwagachunbadibu lan danme le feruduna nánibu luagu sun le badügübei. Au, le Aburemei ariñagubalin.Bible Society of Honduras