Áfuriduni40
Tederegerúniwa sanduariu
1Aba lariñagun Bungiu lun Moisesi:2—Weyu furumiñe lidan furumiñeti hati, lunti bafidiragunu sanduariu tuma kianpu lánina óundaruni luma Bungiu.3Bíchigounme lubagüsinina daradu tidoun, bayaraguame tau, tau belu.4Bíchigeime giñe dábula ñeinhin luma lebu sanudelu. Aransebéi dábula buidu bíchigeime lilanpun lebu sanudelu luagun.5Rubei latarü lauti golu le lunti kupali tóubagiñe lubagüsinina daradu, badibiragüdounme korutína luagu tubenari sanduariu.6Bíchigeime latarü le lánina adagaragüdüni gudawarügüti bénabu tibiti sanduariu, tomeme kianpu lánina óundaruni.7Ábame bíchuguni ágeidinaü tabadinagua kianpu lánina óundaruni luma latarü, ábame babuinchagüdüni lau duna.8Ábame bafidiraguni bürürü geyegua tau, ábame badibiragüdünu korutína luagu lubenari bürürü.9—Lárigiñeme ábame banügüni garaba le ayusurúbei lun lederegerun somu katei lun Bungiu ábame béseruni tuagun sanduariu, luma luagun sun le tídanbei. Ítara luba bederegerunu lau sun tumegegun, ábame aban tan fulasu sánduti.10Ábame giñe béserun garaba lánina ederegeruni lun Bungiu luagun latarü le lánina adagaragüdüni gudawarügüti luma luagun sun lumegegun. Ítara luba bederegeruni, ábame aban lan latarü sándutimati.11Seba garaba luagun ágeidinaü luma luagun lebu, ítara luba bederegeruni.12—Lárigiñeme ábame banügüni Aarón hama lirahüñü lubadun tubenari kianpu lánina óundaruni, ábame hagoun.13Ábame ladaürünu Aarón ladaüragun to lánina afadirihani. Ábame béserun agülei luagun lun banúadiruni kei nufadirin.14Lárigiñeme, banügañame lirahüñü, ábame badaürünu hagounun hawagu.15Ábame béserun garaba hawagun kei badüga lun Aarón, lun nufadirinigu hamá. Lau béseruni garaba hawagun, ladügǘña aban afadirihani le lunti súnwandan.16Aba ladügüni Moisesi sun katei ítara kei buga lariñaguni Bungiu lun.17Danti le lagumeserunbei libiaman irumu lárigiñe háfuridun Ehiptugiñe, weyu furumiñe lidan furumiñeti hati, ligía tafidirawagún sanduariu.18Aba lararamagüdünu Moisesi sanduariu, rulei tebu, fulansu, índanu, iñuraléi wagabu,19aba látulerunu kianpu lánina óundaruni tigibuagu sanduariu, rulei idáü le íñugiñebei tibiti kianpu lánina óundaruni, ítara kei buga lariñaguni Bungiu lun.20Lárigiñe aba lanügüni Moisesi dübü le ñein lubéi bürüwañu lan lúrudu aba líchuguni tidoun lubagüsinina daradu: Lárigiñe aba líchuguni ebu tuagu bágüsi luma tidáü íñugiñe tibiti, aba lanügünu turageirugun sanduariu, aba ladibiragüdünu belu lun layaraagun tau bágüsi, ítara kei buga lariñaguni Bungiu lun.22Aba líchuguni dábula turageirugun kianpu lánina óundaruni luéigiñe nórute, gama lumoun bóugudi tuéi belu lidan fulasu le sándubei tidan sanduariu.23Aba líchugunu fein buidu luagu dábula ligibugiñe Bungiu, ítara kei buga lariñaguni Bungiu lun.24Ru lumuti giñe lebu sanudelu tidoun kianpu lánina óundaruni ligibugiñe dábula, luéigiñe suru tibiti sanduariu,25aba lébeduni lanpu ligibugiñe Bungiu ítara kei buga lariñaguni Bungiu lun.26Aba líchuguni latarü lauti golu tidoun kianpu lánina óundaruni tigibugiñe belu,27aba lágudahan kupali hémeti luagu, ítara kei buga lariñaguni Bungiu lun.28Lárigiñe aba líchugunu Moisesi korutína to luáguboun tubenari sanduariu;29aba líchuguni latarü le lánina adagaragüdüni gudawarügüti tubenari sanduariu tuma kianpu lánina óundaruni, aba lágudun animaalu luma ilaü kei idewesei, ítara kei buga lariñaguni Bungiu lun.30Aba líchuguni ágeidinaü tabadinagua kianpu lánina óundaruni luma latarü, aba labuinchagüdüni lau duna lun lachibagun lungua.31Ñéingiñeha ladabuha Moisesi, Aarón hama lirahüñü duna lun hachibuni háhabu luma hagudi.32Chibaguatiña houngua dan le hebelurun tidoun kianpu lánina óundaruni luma dan le hayarafadun luagun latarü, ítara kei buga lariñaguni Bungiu lun Moisesi.33Agumuhóuni, aba lafidiraguni Moisesi bürürü geyegua tau sanduariu luma latarü, aba líchugunu korutína luagu lubenari bürürü. Dúeri tóugiñe kianpu lánina óundaruni (1 Lur 9.15-23)Dan lásurunbalin Moisesi wadagimanu,34aba ladouragun dúeri le lánina liñúarü Bungiu tau kianpu lánina óundaruni, aba tabuinchun sanduariu lau luéirigun Bungiu.35Aba siñá lan lebelurun Moisesi tidoun kianpu lánina óundaruni ladüga dagá lan dúeri le tuagun ani buin tiña sanduariu lau luéirigun Bungiu.36Danha le liñuragun dúeri lungua tuéigiñe sanduariu ábaha habudunu Ísüraelina hakianpun, aba hasigiruni héibugun,37gama lumoun anhein miñuragun dúeri lungua, miñuragun hamutu giñe hakianpun, ábaha hagurabahan darí liñuragun dúeri lungua.38Lidan sun haweiyasun Ísüraelina, luma ligibugiñe harihin sun hagía, ñeinñein lani Bungiu dúeri tóugiñe sanduariu wéyuagu, áriebu aban ligemeri watu tóugiñebei.
Bible Society of Honduras