Áfuriduni1
Hasufurirun Ísüraelina Ehiptu
1Anihán burí meha hiri Ísüraelina ha ñǘdünbaña luma Hakobu Ehiptun, kada aban hádangiñe barǘ lumutiña lirahüñü tuma lúmari lúmagua:2Rubén, Simeón, Lewí, Hudá,3Isakárü, Sabulón, Benhamín,4Dan, Nefütalí, Gadü luma Aserü.5Hadan sun ladügawagun Hakobu ǘrüwa-wein-díisiñanu gürigia. Aniheinhaliti buga Hosé Ehiptu.6Saragu dan lárigiñe aba lounwen Hosé hau líbirigu, hilaguatiña giñe sun gürigia ha lánina dan ligía.7Gama lumoun kei buga gibe habéi hasaanigu ladügawagun Hakobu, ha Ísüraelina, ábati hagibedagun darí lun gabafu hamá saragu. Aba labuinchun ageiraü ligía hau.8Lárigiñe fiu dan aba larúeihan aban iseri urúei Ehiptu le ibidiñeti Hosé lun,9aba lariñagun urúei ligía houn lílana lageira:—Ariha humaña, Ísüraelina ha, gíbetiña, ani héretiña sügǘ wau;10mosu lubeiti warihin kaba lan wadüga lun wararamuni haganwoundun, luéidügü ñein lan wuribu, luéi houdin hámagiñe wáganiñu lun hageindagun wama, lárigiñemeti aba hóudinguouga yáagiñe.11Ligía lubeiti híchugunbei Ehiptuna ábutigu lun híchugun dasi dereti houn Ísüraelina. Aba híchuguniña lun hadügüni uburugu le gíribei Pitón luma Ramüsési, le layusurubei urúei Ehiptuna lun lareidahan éigini.12Gama lumoun lídantima hóuseruniña wuriba ligíatima hagibedagun. Ábati hanufudedun Ehiptuna hawéi.13Hanarimeti meha hamudiraguniña Ehiptuna Ísüraelina.14Aba híchugun lidere dan houn, luma wadagimanu dereti aranseha múa lun hadaagun ladiríyu, luma lun hadügüni sun wadagimanu le lunbei ladügǘniwa áraabu. Ouserúatiña Ísüraelina lau iderei lidan sun burí wadagimanu ligía.15Aba giñe ladimurehan urúei Ehiptuna tun Sifürá luma tun Puá, würiña ha ágüdahabaliña würiña Ebüréana dan le hágurahan, aba lariñagun houn:16—Danme hágüdahan aban würi Ebüréana, ariha huméi ka lan tiraübei. Anhein würi tubéi, ígira humóun lun tabagaridun, gama lumoun anhein wügüri lubéi, áfara huméi hilagubei!17Gama lumoun inebeti Bungiu houn ágüdahatiña, ani madügün hamuti le lubeibei urúei Ehiptuna houn, ígira hamutiña wügüriña irahüñü lun habagaridun.18Ábati lóunaagüdün urúei hawagu, aba lariñagun houn:
—Ka uagu hígiraña wügüriña irahüñü lun habagaridun?19Aba hariñagun lun:
—Mítarantiña hiñaruñu Ebüréana kei hiñaruñu Ehiptuna. Hagía héreburitiña, lubaragiñe yebe wachülürün ágüdahaña, águrahaaña.20Aba lubeiti hasigirun Ísüraelina agibedagua ani sagü dan gabafutima hamá. Keiti buga linebenbei Bungiu houn ágüdahatiña, aba líderaguniña lau lagibedaguagüdüniña harahüñü.22Aba lubeiti lariñagun Urúei Ehiptuna houn lánigu:
—Sun wügüriña irahüñü Ebüréana águrahoutiña, fui humaña dúnarugun, ánhaña würiña irahüñü ígira humaña lun habagaridun.
Bible Society of Honduras