Apurichihati3
Sun katei gadaaniti
1Gadaaniti sun katei ya ligibuagu ubóu le; chülüti lidaani sun le asuseredubei:2Lidaani águrahouni luma lidaani óunweni. Lidaani ábunaguni luma lidaani alubahani.3Lidaani áfarahani luma lidaani agaranihani. Lidaani agünrinchaguni luma lidaani aransehani.4Lidaani ayahuni luma lidaani éherahani. Lidaani amuiseruni luma lidaani efeduhani.5Lidaani lachagarawagun dübü luma lidaani labudahóun. Lidaani agulichahani luma lidaani afanreinraguni.6Lidaani áluahani luma lidaani eferidiruni. Lidaani areiduni luma lidaani achagahani.7Lidaani aheiridaguni luma lidaani áhüchaguni. Lidaani ámanichuni luma lidaani adimurehani.8Lidaani ínsiñeni luma lidaani iyereehabúni Lidaani wuribu luma lidaani darangilaü.9Kagia lagañeirubei gürigia lau luadigimaridun saragu?10Ariha numuti ihürügu le líchugubei Bungiu hawagun gürigia lun lǘnabudagüdüniña lau.11Ru lumuti Bungiu lidaani sun katei. Ru lumuti ayumahani tidoun hanigi gürigia lun gunfuranda habéi lan sun le susereelibei luma le lunbei lasuseredun, lau sun machülü hamá gürigia gunfurandei le ladügübei Bungiu buidu buidu.12Subudi numuti luagu lubuidun-agei lan katei le lunbei ladügüni gürigia lun lefeduhani libagari ani wínwanleime,13lugundun ánhawa eiga, gurá wagía, aríagua wameime buiti le líchugubei wawadigimari, rúrügü liñalin Bungiu woun.14Subudi numuti giñe luagu sun lan le ladügübei Bungiu, lerederuba lan lun súnwandan:Úati ni kata lun lichugún lanwoun, ua ligía ni kata lun lagidarún lídangiñe; ítara liña ladügüni Bungiu, lun inebebei lan houn sun gürigia.15Úati ni kata susereti o lunti lasuseredun lun masuseredunñahagili lan. Adügati Bungiu lunya lagiribudun le bugaha sügühalibei.
Marichaü ubouagu
16Ariha naali giñe luagu iwiyei lan luma wuribani ligibuagubei ubóu le, lubaragiñe hamuga irichaü lan luma úarani ñein.17Ligíati nariñagunbei luagu laguseragüdübei lan Bungiu dandu gürigia le richaguabei kei le salufuribei, lugundun gadaaniti sun le asuseredubei luma sun le adügǘbei.18Ariñagatina giñe libügürü hóuserun gürigia, luagu lóuchaguñanu lan Bungiu, lun hasubudiruni luagu ítara haña lan giñe kei animaalugu.19Ábanmeme hasinunbei gürigia hama animaalugu. Hilaguatiña gürigia kéisigubeirügü animaalugu, ábanmeme giñe hawaragun súngubei. Úati ni kata luagu gürigia luéi animaalu, katei málati súngubei,20lídounbaña ábanmeme fulasu súngubei; lídangiñe múa hadügǘwa súngubei ani lídounyaba giñe múa hagiribuda.21Kagia gayaraabei lachoururuni luagu mudei lan lani gürigia sífiri sielun, luma luagu rarí lan lani animaalu sífiri labun múa?22Ariha naali luagu ua lan ni kata buítimati lun gürigia luéidigia lefeduhani lebegi luadigimari, lugundun ligía yuubei lun, ladüga úabei anügüti lun larihini le lunbei lasuseredun lárigiñe lounwen.Bible Society of Honduras