2 Lúrudu5
Diisi Gumadi
1Aba lóundaruniña Moisesi sun lílana Ísüraeli, aba lariñagun houn:—Ísüraelina, aganba huméi lúrudu luma gumadi le lunbei nasubudiragüdüni hun uguñe. Furendei huméi buidu adüga humeime.2—Adügati Aburemei le Wabungiute aban daradu wama luagu wübü Orebü.3Mámarügüñein hama wagüchagu ladügei, adüga lumuti giñe wama sun wagía le yaabei guentó.4Adimurehati Aburemei huma gagibugu luagu wübü labadinaguagiñe watu gemeti.5Hamidanguañadinati huguya luma Aburemei lun násügüragüdüni lererun Bungiu hun, kei hanufude hubéi luéi watu gemeti ligía, aba mamudeirun humá luagun wübü. Aba lariñagun Bungiu:6—Au Aburemeibei le Hubungiute, le asagarubalün Ehiptugiñe le meha ñein lubéi idamuni humá.7—Mabungiute humá amu búngiugu nuéi.8—Madüga humá guáriua ni liyawa katei le siélubei ni le ubouagubei, ni le baranahabei lábugiñe múa.9Máhuduragua humá houn, meseriwidun huguyame houn, lugundun au Aburemeibei le Hubungiute, Bungiu emeiditi, le abeichubalin hariban agübürigu ha iyereehabúbaña nun hawagu hasaanigu, habañan hama hálawagu,10gama lumoun ha únbaña nínsiñeda ani gúnfuli haméi nugumadin óusera numutiña lau ínsiñeni darí hamoun milu inebanfangu.11—Mayusura huméi liri Aburemei le Hubungiute wuriba, lugundun labeichubei Bungiu le ayusuruti liri wuriba.12—Haritagua humá luagu luéyuri emeraaguni lun bederegeruni lun Aburemei, ítara kei lilurudun Aburemei le Bubungiute bun.13Sisi weyu lun huádigimaridun, lun hadügüni sun le lunbei hadügüni,14gama lumoun lisedün weyu, ligía luéyuribei emeraaguni le anuadirúati lun Wabureme le Hubungiute. Madüga humá ni kata wadagimanu weyu ligía, ni hirahüñü ni hidamun, ni hilügün bágasu le lánina wadagimanu, ni hilügün burigü, ni aban hádangiñe hibiñanigu, ni terencha le aganóubei huburuguterugu, lunti hemeraagun hidamunigu ítara kei huguya.15Haritagua humá luagu idamuni humá meha giñe Ehiptu, ani Aburemei le Hubungiute aba lasagarunün lau óunwenbu ubafu ñéingiñe. Ligía lariñagunbei Wabureme le Hubungiute hun lun hagunfulirun lau hareiduni luéyuri emeraaguni.16—Inebelá húguchi hun tuma húguchu ítara kei lariñaguni lilurudun Aburemei le Hubungiute hun, lun migife lan hibagari, buidu ligíame lidin hun lidan fulasu le líchugubei Wabureme le Hubungiute hun.17—Máfaraha humá.18—Magabaraha humaña húmarigu.19—Míweruha humá.20—Mariñaga humá iyeeni luagu gürigia híledi.21—Mawamadira humóun lúmari gürigia híledi. Mawamadira humóun giñe luban gürigia híledi, ni lichari, ni lidamun, ni lilügün bágasu le lánina wadagimanu, ni lilügün burigü, ni ni kata le lumegen.
Hanufudedun gürigia
22—Ligía burí dimurei le lariñagubei Bungiu lau umalali héreti labadinaguagiñe watu gemeti luma labadinaguagiñe aban dúeri dereguati, dan le óundaraguhaña lubéi súngubei lugudina wübü. Lárigiñe, mariñagunhali ni kata, aba labürühani dimurei burí le luagu murusun dübü fadati, aba líchuguni nun.23Gama lumoun dan le haganbunbalin umalali ligía le áfuridubei labadinaguagiñe luburiga, ariha huméi wübü durungu, sun huguya, hábutigu türibugu, hama gumadimatiña, aba hiabin adimureha numa.24Aba hariñagun nun: “Arufuda laali Wabungiute luéirigun luma lubafu woun, aganba wamaali lumalali, láfuridun labadinaguagiñe watu gemeti.25Gama lumoun, kaba san uagu weredera lun lagumuchaguagüdüniwa lanarime watu gemeti le? Ánheinya waganba lumalali Bungiu, wóunweguba;26lugundun ka wügüri gayaraabei laganbuni lumalali Bungiu le wínwanbei adimureha labadinaguagiñe watu gemeti kei waganbuni, lun móunwenbei lan?27Buguyagubeilá ayarafada aganbei le lariñagun Bungiu le Wabungiute, ábame basubudiragüdüni le lariñagubei bun woun, ábame wagunfuliruni le ariñawagúti woun.”28—Sun aünha lan adimureha nun, aganbagu liña Bungiu lun le hariñagubei aba lariñagun nun: “Aganba naali sun le hariñagubei gürigia ha ani maribanti narihin lun.29Ítaradügü hamuga hasaminarun súnwandan, ru hagía hamuga inebesei nun, gúnfuli nugumadin sagü weyu, lun buídubei lan dan dandu houn kei houn hasaanigu súnwandan!30Beiba, bariñagame houn lun hagiribudun tidoun hakianpun;31ánheinti buguya, rédeiba numa ya, nariñagaali sun gumadi bun, lúrudu luma arufudahani le lunbei bíchuguni houn lun hadügüni lidan ageiraü le lunbei níchuguni houn hánime.”32Adüga huméi lubeiti sun le lariñagubei Wabureme le Hubungiute hun, madireirunga luéi ni murusun.33Falá huméi üma le larufudubei Wabureme le Hubungiute hun lun buidu lan lidin hun abagarida huguyame saragu dan lidan fulasu le lunbei líchuguni hun hánime.Bible Society of Honduras