2 Lúrudu20
Lúrudu luáguti wuribu
1—Danme háfuridun ageindagua hama háganiñu, anhaün ariha luagu galügüniña hamá gabayu, gakarün to lánina wuribu ani gibe hagía huéi, manufudeda humá hawéi, ladüga anihein Wabureme le Hubungiute le asagarubalün Ehiptugiñe huma.2Danme lachülürün oura lun wuribu, ábame ladimurehan fádiri houn gürigia,3lariñagame houn: “Aganba humá Ísüraelina, hageindagua hama háganiñu uguñe. Mábürühala harüna manufudedun huguyame; madadagara humá, malouchun huguyame,4lugundun anihein Wabureme le Hubungiute huma; lageindaguba huéigiñe hama háganiñu ábame lagañeiragüdünün.”5—Lárigiñeme ábame hadimurehan ábutigu, hariñagame: “Anhein bunaguaali lubéi aban hídangiñe aban muna iseri ani maganóungili tidan, leiba lúbiñoun, hiladügüliñein wuriburugu laganawame amu tidan.6Anhein bunaguaali lubéi aban hídangiñe aban beibei-agei ani móuchungili tídangiñe, leiba lúbiñoun hiladügüliñein wuriburugu, ábame amu lan alubahoun beibei.7Anhein gadaradun lubéi aban hídangiñe lun lamarieidun ani mamarieidungili, leiba lúbiñoun, hiladügüliñein wuriburugu, lamarieidame amu tuma ladari.”8—Lárigiñeme ábayame hadimurehan úfisigu houn súdara, hariñagame houn: “Le hanufudeti hídangiñe, leiba lúbiñoun luéi giñe lanufudedagüdüniña lupaanágu.”9Dánmeti súnhali hadimurehan úfisigu, ábame houdin hábutigu súdaragu habá habá.10—Danme hayarafadun lun aban uburugu lubaragiñe hábürühan luagun, houcha yebe humá lun heresibirunün lílana fulasu ligía lau darangilaü.11Ánhaña ánhara lílana uburugu ligía lun darangilaü, aba hígirunün lun hebelurun, lunti herederun eseriwida hun keisi idamuni lidan wadagimanu le hǘrüti.12Gama lumoun ánhaña maha lun ñeinbei lan darangilaü haganagua, ani ábarüga hawuribuhan huma, ábame hegeyedaguni uburugu ábame hábürühan luagun.13Lederegerubei Wabureme le Hubungiute uburugu ligía labun hubafu, ábame háfaraguniña sun lílana tau eféin.14Hánibaña würiña, irahüñü, bágasu luma sun le gebegibei ñein uburugu. Gayaraabei hayusuruni lun katei buiti húniwagua sun le labusenrubei Wabureme le Hubungiute hanügün hawéi háganiñu.15Ítarameme luba hadüga lau sun uburugu le dísebei luéi le ñein lubéi haganawa, ha mama lídangiñetiña néchani le.16Gama lumoun lidan burí haburugute néchanigu ha dísebaña, le burí líchugubei Wabureme le Hubungiute hun lun hánime, moun lumuti hígirun ni kata wínwanñu ñein,17háfaragubaña Étüna, Amoruna, Kananna, Féresüna, Eweuna hama Hebusuna keisi adagaragüdüni lun Bungiu, ítara kei lariñaguni,18luéi harufudahan hun lun hadügüni lagübüri burí katei le hadügübei lun hiri habungiutegu, afigougüdaünme ligibugiñe Wabureme le Hubungiute.19—Anhein gasu lubéi hanügün saragu dan agurabaha lau aban uburugu lubá gayara lan hárügüdüni, máchuaha humóun tídibu wewe to geigúatu tin to ñeinboun, lugundun hemegeiruboun tin lun héiginu; bóugudin luéi lira, tídiburügüñein burí wewe le áraabuti lira, mama wügüriña ha gayaraati hageindagun huma.20Lau sun lira, gayaraabei háchuahanu tídibu wewe to meigúaditu tin, teseriwiduba hun lun hegeyedaguni uburugu le úmabei hageindagua darí lábürühan labun hubafu.Bible Society of Honduras