2 Lúrudu12
Fulasu lánina láhudurawaguniwa lun Bungiu
1Aba lasigirun Moisesi adimureha houn Ísüraelina:—Anihán burí lúrudu luma gumadi le lunbei hidin lau lidan sun hibagari lidan múa le lunbei líchuguni Bungiu le Habungiute hagüchagu hun.2—Lárigiñe habugaguniña lílana ageiraü ligía, ábame hagünrinchaguni sun burí fulasu le ñein lubéi háhuduragua houn habungiutegu: Luagu burí wübü luma lábugiñe tídibu burí wewe hilumati.3Fui huméi hani burí latarü, bougua huméi burí dübü sagüráuti gudá humeime burí ugudinaü le unbei háhuduragua; günringua humaña guáriua ha habungiutegu; gululugua huméi sun le lébunabei laritawagún hawagu fulasurugugiñe.4—Mítaranbei ligaburi háhuduragun lun Wabureme le Hubungiute.5Lanuadirúba Bungiu aban fulasu lúbanme liri haganagua hani türibu, lun ñeinba lan hidin áhuduragua lun.6Ñeinba hadagaragüda águdaha huguyame animaalugu lun, ñéinhinba hanügei diisi lídangiñe san, hani ídemuei, hani füramasei luma hidewese, hama giñe furumiñetiña harahüñü hilügüniña bágasu hama mudún.7Héigiba ñein ligibugiñe Bungiu úara hama hiduheñu hagundaaruba lau le halubahan lídangiñe huádigimari le aubei labiniraün Wabureme le Hubungiute.8—Madügün hubéi le wadügübei ya, kada aban adügei le uágubei laritagua luagu buidu lan.9Gama lumoun machülügidün lidoun fulasu darangiluti le lunbei líchuguni Wabureme le Hubungiute hun.10Gama lumoun danme hiñugua humaali Hordán lun haganóun lidan ageiraü le lunbei lederegeruni hun, danme séfuhadün hawéi sun háganiñu ha geyegubaña hau, danme manufudeedün.11Ábameti lanúadirun Wabureme aban fulasu lun ñeinba lan háhuduragua lun, ábame hadagaragüdüni sun le uágubei nariñaga hun ñein, kei burí: Animaalugu ha afarútiña ani gudawa hagía lun, diisi lídangiñe san, idewesei luma sun lubuidun-agei füramasei le hadüga lun Bungiu.12Hefeduhaba ligibugiñe Wabureme le Hubungiute, úara hama hisaanigu, hubúeingu, luma hama Lewitagu ha aganóutiña haganagua, kei mibihin habéi fulasu úara huma.13—Mágudaha humá animaalugu lun Bungiu lidan furumiñeguarügü fulasu le hadarirun;14lídanrügüba fulasu le lanúadirun Bungiu haganagua aban hádangiñe hani türibu hadügei. Ñeinba hadügei sun le nariñagubei hun.15—Gama lumoun gayaraabei háfarun lun heigin úi le ñein humuti, lidan furumiñeguarügü dan, según buiti le líchugun Wabureme le Hubungiute hun. Gayaraabei héigini sun huguya, haruma huguya yebe ligibugiñe Bungiu, wiye huguya yebe gayaraabei héigini kéigubeirügü heigin usari.16Gama lumoun meigin hubéi lita, háturubei múarugun kei duna.17—Adagaragüdüni le lunti Bungiu siñabei héigini lidan fulasu le ñein lubéi hawinwanda: Diisi lídangiñe san le tídangiñeti hitürigun, ni le tídangiñeti huniñe diwéin o le lídangiñeti higaraban, ni furumiñetiña harahüñü hilügüniña bágasu o hilügüniña mudún, ni kata lídangiñe le füramase humaalibei lun Bungiu, ni lídangiñe hidewese le híchugun lau hugundan.18Sun burí adagaragüdüni le ligibugiñerügübei Wabureme le Hubungiute gayara lan héigini lidan fulasu le lanuadirun; hagundaaruba ñein ligibugiñe Wabureme le Hubungiute lau huádigimari úara hama hisaanigu, hubúeingu hama Lewitagu ha aganóutiña haganagua.19Haritagua humatia lun mágurun hubaña lan Lewitagu sun aünha lan aganawa lidan fulasu.20—Danme chawagua laali Bungiu humúan, ítara kei lariñaguni hun, anhaün busén heigin úi, gayaraahalime héigini lidan furumiñeguarügü dan.21Anhein dise lubéi herederun luéi fulasu le lanúadirubei Wabureme le Hubungiute lun líchuguni liri ñein, gayaraabei hadügüni le ariñaga náalibei: Ñein le ñein lubéi hawinwanda, gayaraabei háfarun bágasu hama mudún hádangiñe ha líchugun Bungiu hun lun heigin úi kei habusenrun.22Ítara kei luáguti leigín lǘgürügü usari, gayaraabei héigini sun huguya, haruma huguya yebe o wiye humá yebe héigiba.23Gama lumoun moun lumuti heigin hitaü, lugundun hitaü ibagaribei, moun lumuti lubeiti héigini ibagari úara luma úi.24Le lunbei hadügüni, háwiyuruni múarugun kei duna.25Gaganbadi humatia lun gumadi le, ábame buidu lan lidin hun luma houn hisaanigu lun hadügüni lugundan Bungiu.26Libügürü burí katei le ru humaalibei keisi idewesei, luma burí füramasei le hadüga, hanügübei adagaragüda lidan fulasu le lanúadirun Bungiu,27ábame híchuguni hadagaragüdün le gudawarügüti ñein ligibuagu lani Wabureme le Hubungiute latarü. Háwiyurubei hata animaalugu ha hadagaragüdün ligibuagu lani Wabureme le Hubungiute latarü, ánheinti úi, gayaraabei héigini.28—Aganba huméi gúnfuli humeime sun le nariñagubei hun, buidu láamuga lidin hun luma houn hisaanigu súnwandan, ladüga hadügüni le úaraguabei ligibugiñe Wabureme le Hubungiute.
Eweridiruni lun máhudurawaguniwa lan houn guáriua
29Aba lasigirun Moisesi ariñaga houn:—Lagünrinchagubei Wabungiute sun ageiraü le lunbei hagañeiruni ani hánibei.30Ligía lubeiti danme lídanhadün fulasu le ñeinba lubéi haganawa, mafalara huméi hani néchanigu hagía hénpulu ñüdün hárigi habungiutegu lun giñe háhuduragun houn.31Madüga huméi lira lun Wabureme le Hubungiute, lugundun sun katei le iyereehabúbei lun Bungiu, ligía hadügübei néchanigu hagía lun híchugun uéiriguni houn habungiutegu. Hagía dagagüda hamutiña harahüñü lun hagudúniwa ligibuagu latarü houn habungiutegu.32—Adüga huméi le nariñagubei hun súnwandan, magidarunga lídangiñe ani míchugunga lanwoun.
Bible Society of Honduras