2 Lúrudu10
Labürüdünya daradu
1Aba lasigirun Moisesi ariñaga houn gürigia:—Ábati lariñagun Bungiu nun: “Biba bián dübü fadati libe le buga furumiñeti, adüga buguyame aban bágüsi lautu fulansu, ábame bamudeirun luagun wübü lun bayanuhan numa.2Nabürühaali dimurei le meha luágubei furumiñeti dübü le babouchagubei luagu le, ábame bareiduni tidan bágüsi.”3—Ábati nadügün aban bágüsi lautu fulansu akasia, aba níbuguni bián dübü fadati, aba namudeirun lau luagun wübü.4Aba labürühani Bungiu diisi gumadi luagu dübü ligía, kei meha ladügüni dan le ladimurehanbei hun luagu wübü, labadinaguagiñe watu gemeti, dan le óundaraguñu wabéi sun wagía. Aba líchuguni nun,5aba nararirun luéigiñe wübü, lárigiñe aba níchuguni dübü tidoun bágüsi kei lariñaguni Bungiu nun, ani aniheinmémegua ñein.6(Aba hígiragüdün Ísüraelina Hakangiñe, aba houdin Moseráun. Ñein lounwe Aarón, aba labunún, aba lárügüdüni Eleasárü le liráü lubara keisi fádiri.7Ñéingiñe háfurida luagun Gudugóda, Gudugódagiñe houdin Hotubátaun, oubaü le ñein lubéi saragu duna.8Ligíati dan ligía lanúadiruniña Bungiu lani Lewí türibu lun hanaahanu bágüsi to lagei lidaradun Bungiu, luma lun ligibugiñebaña lan Bungiu lun háhuduragun lun, luma lun habinihan lidan liri, kei hadügüni dagá lumoun dan le.9Ligía mafanran habéi Lewitagu malagante hagía hadan hábirigu, lugundun Bungiu halagantebei, kei lariñaguni Bungiu guánarügü.)10—Rédeitina bián-wein weyu luma bián-wein áriebu luagu wübü, kei furumiñe wéiyaasu, aganba lumutinaya Bungiu, aba lerederuni lagünrinchagunün,11ariñagarügaali nun: “Moisesi, beiba, aransebá lun báfuridun hau gürigia ha lun houdin árügüdei ageiraü le uágubei nariñaga houn hagüchagu luagu níchugubei lan houn.”
Le lamuriahabei Bungiu
12—Guentoti, Ísüraelina, ka lamuriahabei Wabureme le Hubungiute húmagiñe? Le lamuriahabei lun híchugun inebesei lun, falá humeime sun lémeri; lun hínsiñe lan hun hudugua huguyame lun tau sun hanigi luma tau sun huani,13luma lun hagunfuliruni lugumadin luma lilurudun lun buidu lan lidin hun.14Subudi huméi luagu lani lan Wabureme le Hubungiute sielu, luma sun liñun-agei sielu, ubóu, luma sun le lídanbei.15Lau sun lira himei lumutiña meha Bungiu hagüchagu, lárigiñe aba lanúadirunün huguya ha hálawagu hádangiñe híbiri gürigia, ítara kei larihíniwa uguñe weyu.16—Ru huméi lubeiti liseinin daradu tidan hanigi ani masigira humá lau humaganbadin,17lugundun Wabureme le Hubungiute, ligía Habungiutebei búngiugu, ligía Haburemebei aburemeigu, ligía Búngiubei le Íñugubei, gabafu ani hanarime, le ábanbei labu lanügüniña sun gürigia, maluguragun ligía lungua luagu idewesei lun lésegeruni irichaü,18le íchugubalin haricha magübüriguhaaña luma haricha würiña ha hilaguaaña úmari, le hínsiñehabubei houn terencha, ru ligía éigini tuma daüguaü houn terencha ha aganóubaña haganagua.19Hínsiñe hamá lubeiti giñe terencha hun, lugundun terencha meha giñe huguya Ehiptu.20—Inebelá Wabureme le Hubungiute hun, lúnrügüla háhuduragua, úara humá luma, danme lunti lan hadügün aban fiñún, lídanla liri hadügei.21Lugundun ligía lébunabei heremuhan; ligía Hubungiutebei, le adügübalin óunwenbu burí katei le harihubei.22Dan meha le hachülürünbei hagüchagu Ehiptun, ǘrüwa-wein-díisirügüñanu meha gürigia, gama lumoun guentó, gíbeguagüda laadün Wabureme le Hubungiute kei waruguma ha siélubaña.Bible Society of Honduras