2 Lúrudu1
Ebelaagülei
1Anihán burí dimurei le lariñagubei Moisesi houn sun lílana Ísüraeli dan le lidan habéi fulasu mageirawati, le erederubei luéigiñe oubaü le ñéingiñe lubéi laboucha weyu libiti Hordán. Lídanñanuti fulasu wayati lárurugu duna Hordán, ligibugiñe barana funati. Luéigiñe meha aban oubaü leredera uburugu Parán, luéigiñeti le aban oubaü uburugu Tófeli, Lawán, Aserótu luma Disaabü.2Lúmagiñe luéigiñe wübü Orebü darí Kadesi-barünéa únsuñein weyu éibuguni luéigiñe lémeri wübü Seirü.3Weyu furumiñe lidan unsu hati, lidan irumu bián-wein lárigiñe háfuridun Ísüraelina Ehiptugiñe, ligía lasubudiragüdüni Moisesi sun le lariñagubei Bungiu lun houn Ísüraelina, lun hagunfuliruni,4lasuseredunbei le, lárigiñe lagañeiruni Moisesi wuribu luma Sihón, harúeite Amoruna, le aganóubei Esübón, luma Ogu lurúeite Basán le aganóubei Asütarótu lidan uburugu Edüréi.5Dan le luáguhaña lubéi oubaü le ñéingiñe lubéi laboucha weyu libiti Hordán, lidan ageiraü le gíribei Moabü, aba lagumeserun Moisesi arufudahei lilurudun Wabungiute houn Ísüraelina. Lariñaga houn:6—Lariñahare Aburemei le Wabungiute woun luagu wübü Orebü: “Lǘhadün ya luagu wübü le.7Budá humóun sun humegen heiba awansereina luagun lóubawagu hadabiaran Amoruna, luma lidoun burí oubaü le yarafati lidan fulasu wayati le lani duna Hordán, luma luagun burí dabíara lani fulasu úaraguati le lani Hudá, luéigiñe suru luma luéigiñe lubeyari barana Mediteraniu. Ragǘ huméi sun lumúan Kanán hánime, dagá lumoun burí dabíara le lani Líwanu luéigiñe nórute, luma darí lumoun duna Éufüratesi luéigiñe oubaü le ñéingiñe lubéi laboucha weyu.8Derege naali ageiraü ligía hun; heiba, ragǘ huméi múa le uágubei náfiñura au le Aburemei houn hagüchagu, Abüraámü, Isaakü luma Hakobu, luma houn hálawagu luagu níchugubei lan hun.”Hanuadahóuniwa aguseragüdütiña
9Lárigiñe aba lariñagun Moisesi houn:—Lidan bugaha lugudina wabéi wübü Sinaí ariñagatina meha hun: “Au nábugua siñati narihin hau sun huguya.10Gíbeeña isaanigu líchugun Aburemei le Wabungiute hun, darí lun gíbeediwa lan kei waruguma ha siélubaña.11Gíbeguagüda láamugaüntima Aburemei le Habungiute wagüchagu milu wéiyaasu sügǘ lau guentó, biniláünme keisi füramase lani!12Gama lumoun au nábugua siñati nanügüni lihürü anügüni le lun netenirun lun hiturobulin luma hilagierun húmagua.13Anúadaha humá lubeiti wügüriña chu tau ani gabafutiña hádangiñe kada türibu lun níchuguniña ábutigume haganagua.”14Aba hóunabunina, hariñaga nun:
—Maribanti warihin lun le baritagubei badügün.15Ábati nárügüdüniña wügüriña ha chútimabaña aau hádangiñe kada hani türibu, aba níchugun ubafu houn huagu, añahein, rútina milu wügüriña lábugiñe haríaahan, añahein san, añahein dimí-san, añahein diisi. Rútina giñe ámuya gumadimatiña lun harihin lau kada türibu.16Lídanmeme dan ligía ru numuti giñe dimurei le houn ha aguseragüdübaña: “Teni humá houn súngubei ani ru humá irichaü houn, dandu houn hupaisanun kei houn terencha.17Richagua humá ani úaragua hugíame lidan haguseragüdün. Óusera humaña súngubei kei lubudubu, dandu ha ǘnabugubutiña kei ha wéirigutiña. Manufudeda humá luéi ni aban lugundun asiadirúni le lunbei híchuguni lúmagiñeba Bungiu liabin. Anhein ñein aban kesi le hénrenguti hun, sügügüda huméi nun, lun netenirun lun.”18—Ítara liña nariñaguni hun lidan dan ligía libügürü sun le lunbei hadügüni.
Le lunbei hadügüni duusu aríaahatiña fulasu
19Aba giñe lariñagun Moisesi houn:—Dan le wáfuridunbei Orebügiñe, aba woudin luagun hawübüri Amoruna kei lariñaguni Aburemei le Wabungiute woun. Ariha humuti ida liña lan lueirin luma dencha lan fulasu mageirawati le wánhiñuragubei lídanbei woudin lóubawagun hadabiaran Amoruna. Lárigiñe aba wachülürün uburugun Kadesi-barünéa.20Ñein nariñaga hun: “Chülühadiwa luagun hadabiaran Amoruna, fulasu le líchugubei Aburemei le Wabungiute woun.21Ligía lubeiti, hubaruaguóun humá ragǘ huméi ani yusu huméi fulasu le higibugiñebei kei lariñaguni Aburemei le Habungiute wagüchagu. Manufudeda humá, meferidirun humeime huguraasun.”22Gama lumoun aba hiabin, hariñaga nun: “Buítimati lun houdin fiu wádangiñe wabá aríaaha hamaamugei fulasu, lárigiñeme ábame hayabin ariñaga woun kaba lan üma wárügüda luma ka lan uburugu ídounbei gayara lan webelurun.”23—Kei buidu lubéi narihin lun le hubeibei, aba nanúadirun duusu hídangiñe, aban lídangiñe kada türibu,24aba houdin luagun oubaü le dabíarabei, darí hachülürün lidoun wayati le lani Esükólu, aba héibuguni sun fulasu ligía.25Aba hárügüdün tin wewe lídangiñe fulasu ligía, aba hanügünu woun, hariñaga woun: “Buiti múa le líchugubei Aburemei le Wabungiute woun.”26Gama lumoun máhatün hidin, ábarüga hadüraaguni le lubeibei Aburemei le Wabungiute hun,27aba hagülülühan húbiñe, hariñaga: “Mabusenrun lumutiwa Aburemei, lasagarawa Ehiptugiñe lun líchuguniwa háhaburugun Amoruna, lun hagumuchun wau.28Guentoti, haliñounbati woudin? Hariñahare ha ñǘdünbaña aríaahei fulasu woun luagu añahein lan gürigia gabafutimatiña ani gágubutima hagía wawéi ñein, luma óunwenbu burí uburugu le geyeguati baríeiru lauti dübü íñuburiti lau, arihatiña nege giñe ladügawagun Anakü le hígandei ñein. Sun le, hanufudeguagüda lumutiwa.”29—Ábati nóunabunün, nariñaga hun: “Manufudeda humá hawéi.30Anihein Wabureme le Wabungiute hubá hubá, ani lageindaguba huéigiñe ítara kei harihini le ladügübei Ehiptu,31luma lidan fulasu mageirawati. Barǘ laadün Aburemei le Wabungiute lidan sun éibuguni le adüga humaalibei darí hachülürün lidoun fulasu le, kei aban úguchili le óuyuahati liráü larünarugu.”32—Gama lumoun lau sun lira, memenigiduntün luagu Aburemei le Wabungiute,33le ñǘdünbeiha hubá hubá lun lanúadahani fulasu le ñeinba lubéi herederagua. Áriebu adundeha lumutün lau aban watu gemeti lun harihini hémeri, wéyuagu, aba larufuduni lau aban dúeri.
Lagañidun Aburemei hama Ísüraelina
34Aba lasigirun Moisesi ariñaga:—Dan le laganbunbalin Bungiu hagülülühan, aba lagañidun saragu, aba láfiñurun ariñageina:35“Huguya Ísüraelina wuribatün, úabei ni aban gürigia hídangiñe huguya ha wéinamuhañabaña arihiti múa buiti le füramase nubéi luagu níchugubei lan houn hagüchagu.36Luéidigia Kalebü le liráü Hefuné; ligíarügübei arihei, níchugubei fulasu le ñein lubéi lidin lun, ligía hau ladügawagun ladüga lafalaruni Aburemei lau úaraguni.”37—Ani gáñiti giñe Bungiu nun hídangiñeti, aba lariñagun nun: “Buguya Moisesi mebelubadibu giñe lidoun múa ligía.38Hosué le íderagubalibu, le liráü Nun, ligíaba ebelura beweñegua. Ruba gurasu lun, lugundun ligíaba adundehaña Ísüraelina lun hagañeiruni fulasu.”39—Ñéingiñe aba lariñagun Bungiu woun: “Hirahüñü ñǘbürigiña, ibidiñegili le wuribabei houn lumoun le buídubei. Ani huguya haritagun yebe luagu héiguaduba lan irahüñü ha háhaburugun áganiñu. Lau sun lira hagíaba ebelura lidoun múa le füramasewabei. Níchugubei múa le houn ani hagíaba laburiña.40Ánheinti huguya, giribu humá lidoun fulasu mageirawati! Heiba luagun Barana Funati!”
Hamaganbadin luma heferidirun Ísüraelina
41—Ábati hóunabunina: “Afigouhaadiwa ligibugiñe Wabureme, gama lumoun guentó, wéibuga ábame wageindagun hama wáganiñu kei lariñaguni Aburemei le Wabungiute woun.” Aba hanügünu hárumate lun hageindagun, haritagun yebe luagu ménrengubei lan hamudeiruni wübü.42Gama lumoun aba lariñagun Bungiu nun: “Moisesi, wéridibaña lun midin hamá ageindagua, ladüga háfaragubaña háganiñu, lugundun mídinbadina hama.”43—Aba neweridirunün gama lumoun madügüntün gasu nau, ábarüga madügün humani le lariñagubei Aburemei, aba hamudeirun lau pantaü dabíararugun.44Ábati háfuridun Amoruna ha aganóubaña luagu burí wübü ligía hubaroun, aba héibaahanün kei hulahüñü, aba háfaragunün lúmagiñe Seírügiñe darí Orumá.45Dan le hagiribudunbei, aba hayahuahan ligibugiñe Bungiu, gama lumoun meberesegúnti hau.46Ligía herederunbei aganawa saragu dan Kadesi.Bible Society of Honduras