Danieli9
Lafurieidun Danieli luagu lageira
1Daríu, le liráü Asueru, le lídangiñebei harasan Médiana, ligía meha agumadihabei lidan arúeihani hadan Kalüdéana.2Lidan furumiñeti irumu le larúeihanbei, au Danieli, naturiahaña meha tidan liliburun profeta Heremíasi libügürü ǘrüwa-wein-diisi irumu le lunbei lásügürün lubá lagunfulirun lagünrinchawagun Herusalén, según lariñaguni buga Wabungiute lun profeta.3Aba nafurieidun, ayumuragua au lun Wabureme ayunareina, dáügueina daüguaü súsutu, ñurú au lidan baligi.4Ayumuraguatina lun Nubungiute, nariñaga lun:—Nabureme Nubungiute wéiriti ani gabafuti, gúnfuli bumuti bererun súnwandan, arufuda bumuti bínsiñehabu houn ha hínsiñehabubaña bun gúnfuli hagía luma bugumadin.5Afigouhaadiwa, adüga wagía wuribani; adüga wamaali le wuribabei; nibagarihadiwa meberesenga bau; ígira wamaali bugumadin luma bilurudun.6Rúhadiwa mebereseni houn bani profetagu ha meha adimurehabaña houn warúeitegu, wábutigu hama wagüchagu luma houn sun Ísüraelina lidan biri.7Buguya Nabureme, richatibu, gama lumoun wagía huríu, sanditiwa busiganu guentó; dandu ha aganóubaña Herusalén kei ha híbiri Ísüraelina, ha yarafabaña hama ha dísebaña, ha aganóubaña lidan ageiraü le ñeinhin lubéi bachagaraña ladüga hiñuragun houngua buagun.8Wagía Nabureme, kéigubeirügü warúeitegu, wábutigu hama wagüchagu, sanditiwa busiganu ladüga afigouhaadiwa bigibugiñe.9Gama lumoun buguya Wabungiute, gudemehabutibu feruduna bubadiwa. Labu sun garabaguaadiwa lan buagun10ani rúhadiwa mebereseni bau, Wabureme Wabungiute, mídintiwa lau arufudahani le bíchugubei woun hádangiñe bani profetagu.11Sun Ísüraelina dürügua hamuti le barufudahabei, maha hagía houdin lau bugumadin; ligía lábürühanbei íñarawaguni luma fiñún le bürüwañubei lidan Lilurudun Moisesi wawagun.12Lau bóunahan aban lanarime wuribani wawagun, gúnfuli baali le bariñagubei woun luagu badügübei lan woun hau sun ha meha abugurubaliwa; úagili ni kata ubouagu libe abeichúni le ábürühabei luagun Herusalén.13Ábürühaali sun wuribani le wawagun, ítara kei labürüdǘn lidan Lilurudun Moisesi; gama lumoun ni ítara máluahan wamutibu Wabureme Wabungiute, mígirun waméi wariban, mafalarun waméi inarüni.14Ligía baranserunbalin wuribani le Nabureme, aba bóunahani wawagun; ladüga buguya Wabureme Wabungiute, richatibu lidan sun le badügübei; ánheinti wagía, máhatiwa waganbunibu.15—Wabureme Wabungiute, arufuda bumuti lueirin bubafu woun dan le basagaruniña bumutuniña Ehiptugiñe, aba ladimurehoun buidu luagu biri lúmagiñe weyu ligía chülǘ lumoun uguñe; gama lumoun wagía, afigouhaadiwa, adüga wamaali le wuribabei.16Wabureme, subudi wamuti luagu areida ban. Fuleseihabubá woun, díreibei bigañi luéi Herusalén, lugundun buburugute ligía, buwübüri le sándubei. Sun burí néchanigu ha yarafabaña adaaguatiña bula lau Herusalén luma hau bumutuniña, ladüga wafigoun luma hafigoun wagüchagu.17Wabungiute, aganbabéi nafurieidun luma nayumuragun; luagu biri Nabureme, gudemelá le gádanbarun bitenpulun to sánduboun bun.18Aganbabá Nubungiute; arihabéi günringuaü le gádanbaliwa luma le gádanbalin uburugu le ñein lubéi lalawahóua biri. Mama wayumuraguña bun ladüga hamuga surú lan wabagari, wayumuragunbei bun, ladüga lueirin bugudemehabu.19Nabureme, Nabureme! Aganbabáwa, ferudunabawa! Tenibá woun Nabureme, higabu bíderaguawa! Buagu guánarügü Nubungiute luma luagu buburugute hama bumutuniña ha alawahabalin biri, madarasarabá!
Ladimurehoun luagu ǘrüwa wein diisi dimaasu
20Aba nasigirun afurieida luma agufeserei nifigoun luma hafigoun Ísüraelina, ayumuragua lun Nabureme le Nubungiute luagu luwübüri le sándubei.21Sun anaha lan afurieida, aba liabin Gabüriéli, le buga arufudúbei nun lidan uénedü, áhamaheina le ñeinhin nubéi. Lidan oura ligía, madiseeli buga ladügün adagaragüdüni gudawarügüti le lánina rábounweyu lun Wabungiute.22Lariñaga nun:—Danieli, niábiña lun gunfurandagüdanani burí katei le bun.23Dan le bagumeserunbei afurieida, aba lóunabunibu Wabungiute. Niábiña íchigei lóunabagüle bun, ladüga wéiriti bínsiñe lun Wabungiute. Aganbabéi lubeiti katei le guentó buidu, gayara láamuga gunfurandabani uénedü le.24«Gasu lásügürün ǘrüwa-wein-diisi dimaasu hawagu bumutuniña luma luagu buburugute le sándubei lun lagumuchagun wuribani luma figóu, lun ferudunawa hamá luagu wuribani, lun lanügün irichaü fulasu lun súnwandan, lun lagunfulirun uénedü luma profesía ábame lederegerúniwa le Sándutimabei.25Lunti basubudiruni ani gunfurandabeime katei le: Lúmagiñeme oura le lariñawagún lun lararamawagüdünya Herusalén, lumoun lachülürün ábuti le anuadirúabei, lásügürüba sedü dimaasu, ábame ladurarun lémeri luma lubarieirun Herusalén aranserúañu ǘrüwa-wein-bián dimaasu, gama lumoun ñeinbei saragu idiheri lidan dan ligía.26Lárigiñeme ǘrüwa-wein-bián dimaasu ligía, ábame lagidarún libagari ábuti le anuadirúbei luéi. Ábame hagünrinchaguni lumutuniña aban urúei le lunbei liabin Herusalén tuma ténpulu, lagünrinchawaguba kei lagünrinchaguni lubuinga aban fulasu, ani lasigiruba wuribu luma günringuaü le ariñawagúaalibei darí lumoun lagumuhóun.27Lidan aban dimaasu, ladügüba aban daradu hama saragu gürigia, gama lumoun lamidanguame dimaasu ligía, ábame lagumuchaguagüdüni adagaragüdüni gudawarügüti luma idewesei. Ladügüba aban lanarime guáriua ábame líchuguni ligibugiñe latarü le lánina adagaragüdüni gudawarügüti, darime lábürühan günringuaü le aranserúaalibei luagun le adügübalin katei burí le».
Bible Society of Honduras