Danieli3
Láhudurawaguniwa tun guáriua to lautu golu
1Aba ladügagüdün urúei Nabukodonosoru aban guáriua lauti golu, darandi méturu tiñun, ǘrüwa méturu tidabuberen, aba lariñagun lun tichugún lidan fulasu mawübüriti le gíribei Dura, lidan lumúan Babilónia.2Lárigiñe, aba lóunaagüdün hawagu gumadimatiña, hábutigu súdaragu, eweridihatiña, ágüdahatiña seinsu, aguseragüdütiña, gumadangu hama sun híbiri lúrudugu ha fulasurugubaña lun houdin lidan fedu le lunbei ladügün tun guáriua to ladügagüdüboun.3Aba hóundaragun sun gürigia íñugutiña ha tigibugiñe guáriua lun hefeduhani tederegerúniwa.4Le adimurehabei lubá lagumeserun damuriguaü, aba lariñagun lau umalali héreti:—Aganba humá sun gürigia ha lílana sun fulasu, néchani tuma sun tuwuyerigu iñeñein.5Danme haganbuni tumalali sun tuwuyeri fidu, gidara, garanwoun luma amu burí katei lánina uremu, ábame háhuduragun tun guáriua lautu golu to ladügagüdüboun urúei Nabukodonosoru.6Sun le máhuduragunti tun guáriua, lagurúba furese furese lidoun aban régigi le durunguti.7Dan lubeiti haganbunbalin sun ha óundaragubaña ñein lumalali sun burí katei ligía aba háhuduragun tun guáriua lautu golu tuguya.8Aba hárügüdün fiu Kalüdéana luéigiñe katei le, lun híchugun hadurun huríu ligibugiñe urúei Nabukodonosoru,9hariñaga:
—Gabagari humá urúei lun súnwandan, haritawagúa ligíame hiri súnwandan!10Ariñagaali urúei lun sun lan gürigia, danme lan haganbuni lamuri katei burí lánina uremu ligía, lun lan háhuduragun tun guáriua lautu golu,11ani sun lan le madügün lumuti ítara, lagurúba lan lidoun aban régigi durunguti.12Añahein huríu ha líchugubaña urúei lun hagía lan ariha lau lagumadiruniwa Babilónia, minebenti urúei houn ni murusun, máhuduragun hagía houn lubungiutegu, ni tun guáriua lautu golu to ladügagüdüboun urúei. Huríu hagía, Sadürákü, Mesakü luma Awedi-negó.13Aba lagañidun Nabukodonosoru saragu, aba lóunahan hawagu Sadürákü, Mesakü luma Awedi-negó. Danti le hachülürün lumoun,14aba lariñagun houn:
—Inarüni san luagu máhuduragun humá houn nubungiutegu, ni tun guáriua to nadügagüdüboun?15Aransetün san lun danme lan haganbuni lamuri katei burí lánina uremu, lun háhuduragun tigibugiñe guáriua to nadügagüdüboun luma lun híchuguni uéiriguni tun? Ladüga anhaün máhuduragun tun, hagurúba furese furese lidoun aban régigi le durunguti; ani kábati bungiu gayara lesefurunün?16Aba hariñagun ǘrüwa wügüriña nibureintiña hagía:
—Moun lumuti wasigenehan luagu katei le.17Wabungiute le unbei wáhuduragua, gayaraati lesefuruniwa lídangiñe watu gemeti le lídanbei régigi, luma lídangiñe sun wuribani le labusenrubei urúei ladügün woun, ani lesefurubadiwa.18Gama lumoun íbini hamuga masuseredun lan ítara, subudiléi urúei buidu, luagu máhuduragunbadiwa lan houn lubungiutegu ni tun guáriua lautu golu to ladügagüdüboun.
Hesefurúniwa ǘrüwa nibureintiña lídangiñe régigi
19Dan le laganbunbalin Nabukodonosoru dimurei burí le, aba lasansiragun ligibu le ligañi hama ǘrüwa nibureintiña hagía. Ábati líchugun dimurei lun lásüdawagüdün régigi sedü wéiyaasu sügǘ láuñaha lisü;20lárigiñe aba lariñagun lun hayabin hádangiñe súdara ha héretimabaña lun hagüraguniña Sadürákü, Mesakü luma Awedi-negó lun háguruniña lidoun watu gemeti le lídanbei régigi.21Aba hagurún ǘrüwagubei hagía lidoun régigi süti tau sun hadaüragun to hayusuruboun lidan ubaraü íñuti le buga ñein habéi.22Keiti buga ariñagaali lubéi urúei lun lagunfulirun lererun furese, ani wéiriti lisü régigi, aba hágudun súdaragu ha águrubaliña ǘrüwa wügüriña hagía lidoun régigi.23Ǘrüwati wügüriña hagía, aba hábürühan lidoun régigi güragu hagía.24Ábati lásaarun Nabukodonosoru furese, aba lariñagun houn lánigu ha eweridihabaña lau tueirin anigi:—Ma san ǘrüwañanu wügüriña güragu wádarubaña wáturugun?
Hariñaga lun:
—Anha.25Lariñaga Nabukodonosoru:
—Gádürüñanu wügüriña magürawagúntiña narihin, éibugañaha labadinagua watu gemeti masuseredunga ni kata houn, ani le hagadürün, lenege aban ánheli.26Kei lariñaguni Nabukodonosoru katei le, aba layarafadun luagun liyuma régigi, aba lagúaragun:
—Sadürákü, Mesakü, Awedi-negó, lánigu Bungiu le íñugubei, furí humá, higougu ñahoun!
Aba háfuridun ǘrüwagubei hagía lídangiñe watu gemeti.27Sun lúruduguna ha ñéinbaña, aba hayarafadun houn wügüriña hagía aba harihini houngua luagu madügün lan watu gemeti ni kata hau, mehemeredúngubeiti ni aban lídangiñe ídiburi le hábulugubei, ni hadaüragun, méhemengubeiti águduni hau.28Lidan oura ligía, aba lagúaragun Nabukodonosoru:
—Uéiriguni lun Habungiute Sadürákü, Mesakü luma Awedi-negó, le óunahabalin lani ánheli lun lesefuruniña lánigu ha úaraguabaña, ha magunfulirunbalin nugumadin, hímeirügü haméi yebe hounwen, lubaragiñe háhuduragun houn amu búngiugu luéi Habungiute!29Guentó lubeiti, ru numuti nererun, lun furumiñeguarügü lan le adimurehati wuriba luagu Habungiute wügüriña ha, lun lamurusuhóun, gudawame luban, meberesenga káteiñein lan lageirabei, lirasan o lererun, ladüga úati amu bungiu lun gayara lan lesefuhan ítara.30Aba líchugun urúei ubaraü íñutimati houn ǘrüwa wügüriña nibureintiña hagía lumúanrugu Babilónia.
Bible Society of Honduras