Danieli1
Ebelaagülei
1Lidan lǘrüwan lirumudiri larúeihan Hoakimü, le lurúeite Hudá. Aba liabin Nabukodonosoru le lurúeite Babilónia, aba legeyedaguni uburugu hau lisudaranigu.2Aba lígirun Wabureme lun lárügüdüni Nabukodonosoru Hoakimü luma giñe lanügün saragu lídangiñe ílagu le ayusurúbei tidan litenpulun Wabungiute. Aba lanügüniña Nabukodonosoru adaürǘtiña uburugun Babilónia, aba líchuguni ílagu le sagüráubei tidoun hatenpulun lubungiutegu.3Ariñagati giñe lun Asüpenási, le hábuti eseriwidutiña palasiurugu, lun lanügün wügüriña nibureintiña hádangiñe Ísüraelina ha hádangiñetiña liduheñu urúei luma hádangiñe iduheñu íñugutiña,4wügüriña nibureintiña ha magadiñetiña, ha madanimantiña, ha huáliti hachügü, ha aturiahaaña, ha ménrengunti hafurendeirun, ha hanichigutiña lidan sun katei, ha gayaraati heseriwidun tidan luban urúei. Larufudahóuba hererun luma habürühan Kalüdéana houn.5Ariñagati giñe Nabukodonosoru lun lichugún libeméme éigini le léigibei luma uniñein le látubei houn wügüriña nibureintiña hagía sagü weyu, lun giñe larufudahóun houn luagu ǘrüwa irumu, lárigiñeme ǘrüwa irumu ligía, ábame herederun eseriwida lun.Danieli hama lupaanágu tidan palasiu
6Hadan wügüriña nibureintiña hagía, ñeinñein Danieli, Ananíasi, Misaeli, luma Asaríasi, hádangiñetiña lani Hudá türibu,7aba lasansiruni hábuti eseriwidutiña tidan palasiu hiri: Aba líchugun Bélitüsasarü luagu Danieli; Sadürákü luagu Ananíasi; Mesakü luagu Misaeli; Awedi-negó luagu Asaríasi.8Gama lumoun máhati Danieli lun léigibei lan leigin urúei ni lun látunu luniñe diwéin luéi lawiyedagun lungua lau, aba lamuriahan luma hábuti eseriwidutiña lun mafosurun lani lun léigini éigini ligía.9Aba ladügün Wabungiute lun mariban lan léiguadun Danieli lun hábuti eseriwidutiña,10gama lumoun aba lariñagun lun:—Hanufudetina luéi nabureme urúei. Ariñagaali nun luagu lunti lan heigin luma hatun, ánheinmeti mabuidun larihinün kei ha híbiri, huguyaba lébuna lasiadirunina urúei lun nounwen.11Ábati ladimurehan Danieli luma óunigiruti le ábugiñebei aríaahan líchigei hábuti eseriwidutiña Danieli, Ananíasi, Misaeli luma Asaríasi, lariñaga lun:12—Ayumuraguatina hun lun hóuchuniwa. Ariñagabá lun hídururügü lan ichugúa woun lun weigin luma duna lun watun luagu diisi weyu.13Lárigiñeme diisi weyu ligía, barihame ida waña lan hamoun híbiri wügüriña nibureintiña ha éigibaña libe leigin urúei, ábameti badügün wau según barihin lun.14Aba lóuchuniña óunigiruti luagu diisi weyu.15Lárigiñe diisi weyu ligía, buiti harihín sügǘ hau ha éigibaña lídangiñe le léigibei urúei.16Ábatiha lanügüni óunigiruti éigini luma uniñein le yebe lunbei lichugún houn lungua, aba líchugun híduru houn.17Aba líchugun Wabungiute lualin ichügü luma gunfurandaü houn gádürü nibureintiña ha lun gunfuranda hamá sun tuwuyeri líburu luma sun lichú aau. Bóugudin luéi lira, gunfuranda lumuti Danieli lanichigu sun luwuyeri arufudúni luma uénedü.18Dan lagunfulirunbei dan le líchugubei urúei lun harufudaguba lan nibureintiña ha houngua lun, aba lanügüniña hábuti eseriwidutiña palasiurugu ligibugiñoun urúei.19Aba ladimurehan urúei hama, hadan súngubei madariti ni aban kei Danieli, Ananíasi, Misaeli luma Asaríasi, ábati herederun lun heseriwidun lun urúei.20Lidan sun katei le ñein lumuti busenwa lan lichú aau luma lualin ichügü, le uágubei lálügüdaña urúei, darí lumutiña luagu buidu hamá diisi wéiyaasu sügǘ hau chu tau hama garíaahatiña ha lábugiñebaña larúeihan.21Aba lerederun Danieli ñein, darí furumiñeti lirumudiri larúeihan Siru.
Bible Society of Honduras