2 Samueli6
Labusenrun Dawidi lanügünu lubagüsin Wabureme
1Ábaya lóundaruniña Dawidi sun habuidun-agei lisudaranigu Ísüraeli, darandi-milu súdaragu,2aba láfuridun uburugugiñe Baalá le lani Hudá hau sun súdara ha lúmabaña lun lanügünu lubagüsina lidaradun Wabungiute ñéingiñe, to uáguboun laguarúa liri Wabureme Suntigabafu, le gámabalin larúeihan hóugiñe kátaña garünatiña.3Aba híchugunu bágüsi tuagu aban kareta iseri; aba hanügünu lúbiñegiñe Abinadábü, to luáguboun aban wübü. Usá luma Ayó ha lirahüñü Abinadábü hagía abugahabarun kareta to gádanbarun lubagüsin Wabungiute, Ayó tigibugiñebei bágüsi.5Aningirati Dawidi hama sun Ísüraelina lubá lubá Wabungiute, abinaheina, eremuheina lau sun here úara lau tamuri árüpa, fidu, garanwoun luma pülatíyu.6Dan hachülürünbei lidoun fulasu le ñein lubéi léfereha Nakón ilaü, aba hachugeragun bágasu. Ábati línchuni Usá lúhabu tuagun lubagüsin Wabungiute lun lágüdahanu ladüga chugegua buga bágasu.7Gama lumoun aba lagañidun Wabureme lun Usá luéigiñe ladügüni katei le, aba lagidaruni libagari reiti ñein, aba lubeiti lounwen Usá turugabu lubagüsin Wabungiute.8Wéiriti lumagundan Dawidi luéigiñe lagidaruni Wabureme libagari Usá, ligía láchubalin fulasu ligía Péresi-usá, le líribei chülǘ lumoun dan le.9Gama lumoun weyuméme ligía, aba lasandirun Dawidi saragu anufudei ligibugiñe Wabureme, aba lagúaragun:—Manügüngubei nubóun lubagüsin Wabungiute númaguoun!10Keiti máhaali lan Dawidi lanügünu bágüsi luburuguterugun, aba lariñagun lun tanügün lúbiñoun Owedi-edomu, aban wügüri uburuguna Gatü.11Aba terederun lubagüsin Wabungiute ǘrüwa hati lúbiñe Owedi-edomu, aba labiniruni Wabureme hau sun liduheñu.
Lanügünu Dawidi lubagüsin Wabureme lun Herusaléun
12Dan lariñawagúnbei lun urúei Dawidi luagu labiniruniña Wabureme liduheñu Owedi-edomu lau sun hamegen, ladüga anuhein tan lubagüsin Wabungiute hama, aba lidin Dawidi, aba lanügünu lubagüsin Wabureme lúbiñegiñe Owedi-edomu lun luburuguterugun lau óunwenbu ugundani.13Lárigiñe híchugun ha táubaña bágüsi sisi pasu, aba láfarun Dawidi aban bágasu wügüri luma aban gábara dibuneti lun ladagaragüdün.14Tauñein aban tidáü dúnigu lautu linu Dawidi, ábati labinahan lau sun lere ligibugiñe Wabureme,15dánduti ligía kei sun Ísüraelina, aba houdin tau lubagüsin Wabureme agúaraheina le hagundan, íñaaheina fidu.16Dan tachülürünbei lubagüsin Wabureme luburuguterugun Dawidi, aba taganaridun Mikali to liráü Saulu lídangiñe funedera; danti tarihinbalin urúei Dawidi achubaha luma abinaha ligibugiñe Wabureme, aba liyereegudun tun saragu.17Aba tichugún lubagüsin Wabureme lidoun tubara, tidoun aban kianpu to ladügagüdüboun Dawidi tubá. Lárigiñe aba ladagaragüdün Dawidi le gudawarügüti luma le lánina arandaruni ligibugiñe Wabureme,18lásurun ladagaragüdün, aba labiniruniña gürigia lidan liri Wabureme Suntigabafu,19biniláña sun Ísüraelina ha ñéinbaña lidan oura ligía, wügüriña hama würiña, aba líchugun aban fein houn, aban durudia tautu tin yaraüwa, tuma aban to tautu beibei mábeiharu. Lárigiñe aba houdin súngubei hábiñoun.20Aba giñe lagiribudun Dawidi lúbiñoun lun labiniruniña liduheñu; gama lumoun aba táfuridun Mikali lubaroun, aba tariñagun lun:—Ma lubuidun lerederun lurúeite Ísüraeli uguñe, arufudagua lungua hagibugiñe hiñaruñu ha hadamun lubúeingu kei aban furumiñeguarügü!21Lariñaga Dawidi tun:
—Inarüni, abinahaadina, gama lumoun ligibugiñe Wabureme, le anúadirubadina leweñegua búguchi hama sun biduheñu lun au lan hábuti Ísüraelina ha lumutuniña. Ligía nabinahanbei ligibugiñe;22ani nǘnabudaguagüdatimaba nungua sügǘ lau nadügüni guentó; nǘnabuduba según baritagun, gama lumoun híchuguba idamuni ha uágubaña badimureha uéiriguni nun.23Aba marahüñü tan Mikali lidan sun tibagari.
Bible Society of Honduras