2 Samueli22
Leremun Dawidi luagu lagañeirun
1Aba leremuhani Dawidi uremu le lun Wabureme dan le lesefurunbalin Wabureme luéi Saulu luma hawéi sun láganiñu.2Lariñaga lidan leremuhan: «Nabureme, buguya núniribei buguya naramudaguagülebei, buguya nesefuragülebei,3Nubungiute, buguya dübü le óunigirubalina, nidaüdina, ubafu le esefurubalina, liñun-agei naramudaguagüle, buguya nesefuragülebei, ladüga sefu bumutina luéi wuribani.4Nabureme, garichatibu lun leremuhóun bun; dan le nagúarun buagu, sefu bumutina hawéi náganiñu.5Geyegua lumutina óunweni; sanditina anufudei ligibugiñe le gagünrinchaguadibei.6Güragua lumutina óunweni lau lugurudun dariguatina burí nungua tidan sádara to gáfarahatu.7Wátina lun Nabureme lidan nidiheri, amuriaha numuti lídehan Nubungiute, aba laganbunina tídangiñe litenpulun, chülüti nagúarahan larigeirugun!8Ábati ladagarun aban hárabaganali héreti ya ubouagu: Adadagarati luagaburi sielu; hingí lumuti ligañi Wabureme.9Áfurihati gumuleli lígirugugiñe, áfuriha ligía watu gemeti le gagünrinchaguati liyumulugugiñe; áfurihati garubun gemeti liyumulugugiñe!10Dará lumutu likorutinan sielu, aba lararirun. Ñeinñein óunwenbu burí huánriñu lábugiñe lugudi!11Aba lawarirun lanagoun aban katei garünati, aba láhamachun; arihúati luagu larüna garabali.12Barǘ lumuti lanarime luburiga le geyegubei tau luban luma burí dúeri buin lau duna lun likianpunme.13Furiti aban larugounga ámirihati liñuarürugugiñe; áhuyati garubun gemeti.14Wabureme, le íñugubei, aganbagüda lumuti lumalali le adürühabei siélugiñe:15Chü lumutu ligimaran luma labirihaniga, aba hanurahan náganiñu éibaagueina.16Aba ladararun barana; aba larihín lebu burí ubóu, ladüga lumalali Wabureme le asiadihabei, ladüga áfuruni héreti le lígiragüdübei.17Tulé lumuti Wabungiute lúhabu nun íñugiñe, aba lasagarunina baranahagiñe.18Salba lumutina hawéi áganiñu gabafutiña ha iyereehabúbaña nun ani héretiña nuéi.19Ábürühatiña nuagun dan le lídanñadina lan lamiselu, gama lumoun íderagua lumutina Wabureme:20Sefu lumutina; salba lumutina ladüga nínsiñe lun!21Fayei láadina Wabureme según laruman nigaburi,22lugundun falá naali lémeri Nabureme; meyeedagungidina lau Nubungiute!23Yarafati sun lugumadin nun, madireirúngidina luéi lilurudun!24Éibugaadina harumañu ligibugiñe, díreihadina luéi wuribani.25Fayei láadina Nabureme luagu laruman nigaburi ligibugiñe.26Nabureme, úaraguatibu luma le úaraguabei, míchutibu lidurun le madurunbei,27furangutibu luma le furangubei gama lumoun deretibu lun le bíbubei.28Salba bumutiña ha ǘnabugububaña, gama lumoun ǘnabugüda bumutiña ha pántabaña.29Buguya nilanpunbei Nabureme; Nubungiute, buguya arugoungadagüdübalin luburiga.30Bíderagubadina lun nagañeiruni wuribu hama náganiñu ábame nachubaraguni lubarieirun haburugute.31Úaraguati lémeri Nubungiute, lunti lemenigidúniwa luagu le füramase lubéi Nabureme. Góunigi lumutiña Nubungiute sun ha hemenigibaña luagu.32Ka Búngiubei bóugudin luéi Nabureme? Ka amu bungiu gayaraabei lóunigiruniwa?33Wabungiute naramudaguagülebei le gabafubei le íderagubalina lun buídubei lan nigaburi,34le íchugubei ugudi óufuti nun kei usari, le adügübei lun deregüdagu nan iñu,35le aranserubalina lubá wuribu, le íchugubei erei nun lun nederaagüdünu nigimaran lautu buronse.36Góunigi bumutina ani salba bumutina; adügaali bareini lun buidu lan lidin nun.37Adüga baali némeri lun ménrengun lan, ani miriraagunti nugudi.38Éibaaha numutiña náganiñu aba nagünrinchaguniña, darí gumuguagüda naaña, ligía nagiribudun.39Gumuguagüda numutiña apiisiha numutiña! Másaarunhaña, ábürühatiña lábugiñoun nugudi!40Rútibu erei nun wuriburugu; adügatibu lun habuluchagun salufuritiña nigibugiñe,41adügatibu lun hanurahan náganiñu nuéi. Ítara liña nagünrinchaguniña ha iyereehabúbaña nun.42Amuriahatiña yebe íderawaguni, úati íderagutiña; agúahatiña lun Nabureme, móunabun lumutiña.43Gumuguagüda numutiña kei kaliki múarugu! Dügügua numutiña kei gubegubeti ǘmadarugu!44Sefu bumutina luéi luwuribun nageira, ragǘ bumutina kei hábuti néchanigu, seriwi hamutina gürigia ha meha ibidiñetiña nun.45Kei haganbunina, ítara hadügüni le nubeibei, adüga hamuti gürigia terencha nugundan,46hanufudeguatiña terencha, aba háfuridun lídangiñe haramudaguagüle adadagareina.47Gabagarilá Wabureme! Biniwalá le ágüdahabalina! Iñurualá Wabungiute, le esefurubalina, le giñe óunigirubalina!48Ligía Wabungiute le ageindagubei nuéigiñe, le íchugubaliña náganiñu lábugiñoun nubafu.49Sefu lumutina hawéi náganiñu, hawéi salufuritiña ha iñuragubaña houngua nuagun. Wabureme, salba bumutina hawéi wügüriña hanarimetiña!50Ligía neremuhanbei lidan biri haganagua sun néchanigu.51Gáñeigüda bumuti wuribu lun urúei le banúadirubei súnwandan bóuseruni Dawidi hau sun ladügawagun lau ínsiñeni».Bible Society of Honduras