2 Urúeigu4
Líderagunu Eliséu aban würi hilaali túmari
1Ñeinñoun aban würi, lúmari meha aban hádangiñe profetagu, aba tidin ekehara lun Eliséu, tariñaga lun:—Hilá númari, ani subudi bumuti luagu inebe lan meha Bungiu lun. Ñǘbuinhaliti gürigia le wadúeirubei ani busenti lanügüniña bián nirahüñü lidamunme.2Lariñaga Eliséu tun:
—Kábagia nadüga bun? Kagia búmabei búbiñe?
Tariñaga lun:
—Úati ni kata numa, luéidigia aban liraüraü fudu lau agülei.3Ábati lariñagun Eliséu tun:
—Beiba afuredeiha fiu fudu hama bubesinanigu, sun fudu le biyaraati ibiha!4Lárigiñeme ábame bebelurun búbiñoun hau birahüñü, ábame badouruni bena, ábame babuinchagüdüni sun fudu lau garaba; adireiheinabeime le buínhali.5Aba tidin, aba tadouragunu muna taugua hama tirahüñü. Ábati tagumeserun abuinchagüdei fudu le íchaaheina habéi tun.6Dan buínhali sun fudu, aba tariñagun lun aban hádangiñe:
—Barüyabá aban fudu nun.
Lariñaga tun:
—Úaali amu fudu.
Lidan oura ligía, aba lerederun lésehan garaba.7Lárigiñe aba tidin, aba tabahüdaguni lun profeta, aba lariñagun tun:
—Béibaati alugurahei garaba, ábame bafayeiruni badúeihan. Laume le ígiraguti gayaraabei babagaridun hau birahüñü.
Eliséu tuma würi Sunemüna
8Luagu aban weyu dan lásügürün Eliséu Sunemügiñe, aba téredun aban würi wéirigutu aganóutu ñein luagu lun leigin hama. Ságüti lásügürün Eliséu ñéingiñe, lerederagun eiga.9Ábati tariñagun lun túmari:—Arihabá san, subudi numuti luagu gürigia lan le ságübei lásügürün lachülaagun wámagiñe, aban lan profeta lani Bungiu.10Wadüga aban rumu lun íñugiñe tibiti muna. Ábame wíchugun aban gabana luba ñein, aban dábula, aban sesi luma aban lanpu. Dánmeti liabin bisidawa, gayaraabei lerederun ñein.11Luagu aban weyu dan lachülürün lun larumugun tidan rumu tuguya,12aba lariñagun lun Geasí le lubúein:
—Waba tun Sunemüna to nun.
Aba lagúarun tun, dan tarufudagun tungua ligibugiñe Eliséu, aba lariñagun Eliséu lun lubúein:13—Ariñagabá tun gürigia to luagu buidu lan tigaburi wama, anhein lan anihein lubéi tabusenrun wadügün tun; anhein lan busén tubei wadimurehan lun urúei luagu tufulesein o luma lan hábuti súdaragu.
Tariñaga houn:
—Buiti dan nun ya hadan lílana fulasu.14Lariñaga Eliséu:
—Kábati gayara wadügün tun?
Lariñaga Geasí:
—Tuguya marahüñütu ani wéiyaali túmari.15Lariñaga Eliséu lun:
—Waba tun.
Aba lidin lubúein agúara tun, gama lumoun tuguya aba terederun rara bénabu.16Ábati lariñagun Eliséu tun:
—Leweñegua irumu, keime lidoun dan le, babayayahaba aban irahü le bisaani.
Tariñaga lun:
—Uá nabureme, meyeedalana aban lubúein Bungiu.17Irumubei lárigiñe lídounmeme burí dan ligía, aba tadageinadun aba tagaraüdün aban wügüri irahü ítara kei lariñaguni Eliséu tun.18Aba laweiridun irahü ligía. Gama lumoun luagu aban weyu dan lidin lárigi lúguchi le ñein habéi alubahatiña,19aba lagumeserun agúaraha:
—Gáriti nichügü! Gáriti nichügü!
Ábati lariñagun lúguchi lun aban lubúein:
—Barübei tun lúguchu.20Aba lanügüni lubúein tun lúguchu, aba tañuuragüdüni tuougua darí amidirugu. Ábati lounwen irahü ligía.21Aba tawarirun lau lirumunrugun profeta, aba tarounragüdüni tidan ligabanan, aba táfuridun, aba tadouruni bena.22Aba tagúarun lun túmari tariñaga lun:
—Óunahaba aban musu nun tau aban mile ñüdün náamuga arihei profeta, ábayame niabin.23Lariñaga túmari tun:
—Kábagia uagu bidin arihei uguñe? Mama iseri hati uguñe, mama giñe luéyuri emeraaguni.
Tariñaga lun:
—Madiheribá.24Aba taranseragüdünu mile, tariñaga lun musu:
—Beiba nubá, merederaguagüdabana darí nariñaguni bun.25Aba lubeiti tidin, aba tachülürün luagun wübü Karümélu, le ñein lubéi Eliséu. Dan larihinbarun Eliséu dísegiñe, aba lariñagun lun Geasí le lumusun:
—Anutén Sunemüna.26Éibaaguaba tubaroun, ábame bálügüdünu ida tiña lan lau sun túmari luma tiráü.
Aba lidin musu, aba tariñagun lun luagu magadiñe hamá.27Dan tachülürün le ñein lubéi Eliséu, aba tóuburuni lugudi. Aba yebe lidin Geasí agidaroun ñéingiñe, gama lumoun lariñaga Eliséu lun:
—Ígiraboun, gagarigutu, ani marufudun lágili Bungiu nun ka lan asuseredubei.28Ábati tariñagun lun:
—Eliséu nabureme amuriahatina funagia buma lun nagaraüdün? Ma ariñagatina bun lun meyeedunbanina?29Ábati lariñagun Eliséu lun Geasí:
—Aransebá, barübei nubadun, beiba ñein. Le úmati badunragua, mabusurabá lun, le abusuruti bun, móunababei. Bachülürünme ábame badagaragüdüni nubadun luagu ligibu irahü.30Tariñaga lúguchu irahü lun Eliséu:
—Fiñutina luagu Bungiu luma buagu guánarügü, luagu mídinbadina lan yáagiñe ánhabu midin numa.
Ábati lidin Eliséu tuma.31Ñǘdünhati buga Geasí habá, aba ladagaragüdüni badun luagu ligibu irahü, gama lumoun úati ni murusun ibagari lidan; ábati lidin Geasí lubaroun Eliséu, aba lariñagun lun:
—Máguyugunti irahü.32Dan lebelurunbei Eliséu, hilaali irahü, riwagu liña tidan gabana.33Ábati lebelurun, aba ladouruni bena, aba lafurieidun lun Bungiu. Ligíarügüñein múnada luma irahü.34Aba lawarirun gabanarugun, aba larounrun ligibuagu irahü, aba líchuguni liyuma luagu liyuma, lagu luagu lagu, lúhabu luagu lúhabu aba labadüleragüdüni lúgubu luagu lúgubu. Aba lagumeserun lúgubu irahü abacharagua.35Ábati lásaarun Eliséu aba léibuguni lurageirugu rumu; ábaya lawarirun gabanarugun, ábaya labadüleragüdüni lúgubu luagu irahü. Sódini aba látiñuhan irahü sedü wéiyaasu, aba léfegechuni lagu.36Aba lagúarun Eliséu lun Geasí, lariñaga lun:
—Waba tun Sunemüna.
Aba lagúarun Geasí tun, dan tachülürün le ñeinhin lubéi Eliséu, lariñaga tun:
—Anihán biráü.37Aba tiabin, aba táguragun tungua luagun lugudi Eliséu, lárigiñe aba tanügüni tiráü aba táfuridun lau rúmurugugiñe.
Milaguru lani éigini gapeisininti
38Lárigiñe aba lagiribudun Eliséu uburugun Gilügáli. Lidan dan ligía, aba ñein lan saragu ilamaü lidan fulasu ligía, luáguti aban weyu dan añahán lan profetagu ñun geyegu lau Eliséu, aba lariñagun lun lubúein: «Rubei sóudieru le wéiribei wáturugun, adüga báamuga aban gisóu houn profetagu».39Aba lidin aban hádangiñe áraabu anüga fiu híduru, aba ladarirun aban nadü áraabuna, aba látügürün tídangiñe tin, tenege wira áraabuna, aba labuinchagüdünu lidáü tau. Dan lagiribudun, aba líbaahanu aba lachagarunu lidoun gisóu, ibidiñounga lun katoun lan.40Lárigiñe aba leseriwidun houn profetagu; dan hagumeserun eigei gisóu, aba hagúaragun:—Profeta, anihein péisini lidan gisóu le!
Aba meigin hamaali lan.41Aba lariñagun Eliséu:
—Barǘ humá murusun fulúaru nun.
Aba líchugunu fulúaru lidoun sóudieru, aba lariñagun:
—Digá humati éigini houn gürigia guentó!
Aba heigin, úaali ni kata wuribati lidan sóudieru.
Léigagüdün Eliséu san wügüriña
42Lárigiñe aba liabin aban wügüri Baali-saliságiñe barüina wein fein lautu sebada lun Eliséu to sun liña tásürahoun luma türigu iserigili tidan lisagüte. Ábati lariñagun Eliséu lun lubúein:—Rubei houn gürigia lun heigin.43Lariñaga musu lun:
—Ida lubagia níchuguni le houn san gürigia?
Lariñaga Eliséu lun:
—Rubei houn gürigia lun heigin, lugundun ariñagaali Bungiu luagu héigiba lan, ígiraguame.44Ábati léheraagun musu houn, aba heigin, ani ígiraguatu giñe kei lariñaguni Bungiu.
Bible Society of Honduras