2 Urúeigu21
Larúeihan Manasési Hudá
1Duusu irumu lau Manasési dan le lagumeserunbei arúeiha, aba larúeihan dimí-san seingü irumu Herusalén. Hepüsíwa tíribei lúguchu.2Gama lumoun wuribati ligaburi ligibugiñe Aburemei, adüga lumuti sun lagübüri katei le meha hadügübei gürigia ha lachagarubaña Aburemei hagibugiñegiñe Ísüraelina;3ráramagüdaya lumutu hatenpulun gibe tubungiutegu to meha lagünrinchagubóun Esekíasi le lúguchi; adaaguati latarü lun Baali, adüga ligía aban liyawa Asera kei meha ladüga Aabü, le lurúeite Ísüraeli; huduguati giñe, adüga ligía kultu houn sun waruguma ha siélubaña,4adüga ligía burí latarü litenpulunrugu Bungiu, ténpulu to buga uáguboun lariñaga Bungiu luagu lúbanboun lan liri ñein uburugu Herusalén.5Adügayati amu burí latarü lidan tibürürün litenpulun Aburemei, aba lanúadiruni houn sun waruguma ha siélubaña.6Gudá lumutiña giñe lirahüñü kei adagaragüdüni, aríaagüda ligía, abiñaragüda, álügüdaha ligía hama garíaahaditiña hama búyeigu. Hanarimeti luriban lóuserun ligibugiñe Aburemei, darí lun lagañidagüdüni.7Ruti giñe aban liyawa Asera litenpulunrugu Aburemei, tidan ténpulu to buga uáguboun lariñaga Bungiu lun Dawidi luma lun Salomón le liráü: «Tidan ténpulu to yaaboun Herusalén, uburugu le nanúadirubei hádangiñe sun lani Ísüraeli türibu, lúbanboun niri lun súnwandan.8Machagarundigia naaña Ísüraelina lídangiñe fulasu le níchugubei houn hagüchagu, gúnfulirügaaña ligía lau sun le nariñagubei houn luma burí arufudahani le líchugubei Moisesi le nubúein houn».9Gama lumoun madügüntiña gasu. Ábarüga lanügüniña Manasési adüga burí katei wuribatimati luéi burí meha le hadügübei gürigia ha meha lagumuchaguagüdübaña Aburemei hagibugiñe Ísüraelina.10Aba lubeiti ladimurehan Aburemei hayumulugugiñe lani profetagu, lariñaga:11—Ladüga ladügün Manasési saragu wuribani, ladüga lueirin luriban sügǘ hau Amoruna ha lubaabaña, kei afigougüda laaña lan lánigu Hudá hau liguariuan,12au, le Aburemei, le Lubungiute Ísüraeli, nariñahare: Nanüga wuribani luagun Herusalén luma Hudá, darime lun lagaridun harigeirugu ha aganbuti.13Namisurahaali Herusalén laumeme amisuraagülei le aubei namisurahei Samaria hama ladügawagun Aabü; narumadagüdaali kei larumadawagüdün aban asiedu aba láfamuchun.14Hámeti híbiri nánigu, nígirubaña houngua, ábame nederegeruniña háhaburugun háganiñu, lun híweruhani le hámabei.15Ladüga wuribati hóuserun nigibugiñe, ani ítara haña agañidagüdana lúmagiñe weyu le háfuridunbei hagüchagu Ehiptugiñe chülǘ lumoun dan le.16Bóugudin luéi burí figóu le ladügagüdübei Manasési houn lílana Hudá, luma wuribati burí le ladügübei ligibugiñe Aburemei, áfaraguati giñe saragu gürigia maduruntiña Herusalén darí lun labuinchun hitaü ǘmadarugu.17Le líbiri asusereduti luáguti Manasési luma sun le ladügübei, anihein bürüwañu tidan liliburuna asusereduti hawaguti lurúeitegu Hudá.18Aba lounwen, aba hábununi lidan tufulurin-agei lani palasiu, le lufulurin-agei Usá. Aba larúeihan Amón le liráü leweñegua.Larúeihan Amón Hudá
19Wein-biama irumu lau Amón dan le lagumeserunbei arúeiha, aba larúeihan bián irumu Herusalén. Mesulémeti tíribei lúguchu, liráü Arusu le Hotubáana.20Gama lumoun wuribati lóuserun ligibugiñe Aburemei, kei meha lóuserun Manasési le lúguchi,21falá lumuti luriban lémeri lúguchi, adügati kultu ani hudugua ligía hounmeme guáriua ha meha únbaña láhuduragua lúguchi.22Ítara liña lígiruni Amón Aburemei, le Habungiute lagüchagu, ani madügün lumuti lugundan Bungiu.23Aba hiñuragun lani Amón úfisigu houngua luagun, aba háfaruni tidan lani palasiu.24Gama lumoun aba háfaraguniña lílana fulasu úfisigu ha áfarubalin Amón, aba híchuguni Hosíasi le liráü arúeiha leweñegua.25Le líbiri asusereduti luáguti Amón luma sun le ladügübei, anihein bürüwañu tidan liliburuna asusereduti hawaguti lurúeitegu Hudá.26Aba hábununi lidan lumuaha le lídanbei lufulurin-agei Usá. Aba larúeihan Hosíasi le liráü leweñegua.Bible Society of Honduras