2 Urúeigu18
Larúeihan Esekíasi Hudá
1Lidan lǘrüwan lirumudiri larúeihan Oseasi, le liráü Elá, le lurúeite Ísüraeli, ligía lagumeserun Esekíasi le liráü Aasi, le lurúeite Hudá arúeiha.2Wein seingü irumu lau dan ligía, aba larúeihan wein-nefu irumu Herusalén. Abí tíribei lúguchu, liráü Sakaríasi.3Buiti ligaburi Esekíasi ligibugiñe Bungiu keisi bugaha ligaburi Dawidi.4Ligía agidarubarun burí hatenpulun gibe tubungiutegu, bougua lumuti dübü sagüráuti, günringua liyawa Asera, tuma tiyawa hewe lautu buronse to meha ladügüboun Moisesi, to unboun buga hasigira Ísüraelina águdaha kupali, to gíriboun Neusután.5Ru lumuti Esekíasi lemenigin luagu Bungiu le Lubungiute Ísüraeli. Hadan sun lurúeitegu Hudá ha lubaabaña, hama ha lárigibaña, úati ni aban kei ligía.6Rédeiti deregüdagu ligibugiñe Bungiu, madireirúnti luéi, lubaragiñe lira gúnfulirügü lumuti lugumadin le buga líchugubei lun Moisesi.7Ligía lébubei fuleseilani Bungiu súnwandan, buidu ligía lidin lun lidan sun le ladügübei.Iñuraguati Esekíasi lungua luagun lurúeite Asiria, aba maha lan líchaagun lungua lun.8Áfaragua lumutiña giñe Filistéana lúmagiñe fulasu le gíribei Gasa dagá lumoun láfadaragun lúmagiñe burí wáyelesi le ñein habéi óunigirutiña dagá lumoun burí uburugu baríeiruati.
Léiguadun Samaria
9Lidan ligadürün lirumudiri larúeihan Esekíasi, le lisedün lirumudiri larúeihan Oseasi, le liráü Elá le lurúeite Ísüraeli, aba legeyedaguni Sálimanasarü, le lurúeite Asiria uburugu Samaria, aba lábürühan luagun,10aba lárügüdüni ǘrüwa irumu lárigiñe. Lidan dan ligía, lisisin buga irumu lau Esekíasi arúeiha, nefu lau larúeihan Oseasi uburugu Ísüraeli dan le lárügüdünbei Samaria.11Aba lóunahaniña lurúeite Asiria Ísüraelina Asirioun, aba líchuguniña aganawa Ala, lóubawagu Aworu, duna Gosán luma burí haburuguterugu Médiana.12Lasuseredunbei lira, ladüga maganbadi hamá lun Bungiu le habungiute, dürüguarügü haméi lidaradun, madügüntiña gasu lau le lariñagubei Moisesi houn lúmagiñe Bungiu, madügün haméi.Lárügüdüni Senakeríbü Hudá
13Lidan irumu katorusu lau larúeihan Esekíasi, aba lábürühan Senakeríbü le lurúeite Asiria luagun sun uburugu le baríeiruabei Hudá, aba lárügüdüni.14Ábati lóunahan Esekíasi ariñaga lun lurúeite Asiria uburugu Lákisi: «Adügaadina aban bulíeiguaü; disebá nageiragiñe ábame nafayeiruni seinsu le bariñagun bun».Ábati líchugun lurúeite Asiria liseinsuna gumadi lun Esekíasi, wein milu líburu pülata luma bián milu líburu golu.15Ábati lederegeruni Esekíasi sun pülata le ladarirubei litenpulunrugu Bungiu luma lidan tirisin palasiu lun.16Lídanmeme dan ligía, aba lagidaruni Esekíasi bena le burí tuágubei litenpulun Bungiu le buga lafurarubei Esekíasi guánarügü lau golu, aba líchuguni lun lurúeite Asiria.17Lárigiñe aba lóunahan lurúeite Asiria aban úfisi íñuguti, aban lumusun le uáguti lemenigida lúmaya aban úfisi íñuguti hau súdara gíbetiña, aba houdin Lákisigiñe lun Herusaléun lun hábürühan luagun. Dan hachülürün Herusalén, aba híchugunu hakianpun lubadu lichanilin fusu le íñugiñebei, luéigiñe üma le luágunbei áraabu le achibaguagülei.18Ábati hagúarun lun urúei, aba láfuridun Eliakímü le liráü Ilükíasi, le hábuti óunigirutiña palasiu, Sebüná, luma Hoá le liráü Asafü, le lani urúei abürühati adunragua hama.19Aba lariñagun lani urúei úfisi houn:
—Ru huméi uganu le lun Esekíasi lúmagiñe lurúeite Asiria: “Ka uagu laweirida bachoururagun bungua?20Haritaguatibu funagia luagu gebegi lan dimurei buíduburiti kei lichú aau luma erei lun wuribu? Kagia uagu bemenigida líderagubadibu lan biñuragunbei bungua nuagun?21Afiñetina luagu hemenigi ban luagu lídehan Ehiptu. Aban maburu sáühali Ehiptu le ánhabubei abalacha luagun, límirubadibu ani fudugua leime búhabu. Ítara liña urúei Ehiptuna houn sun ha hemenigibaña luagu.22Anhaün ariñaga nun: Hemenigitiwa luagu Aburemei le Wabungiute, ma funagia gidá lumuti Esekíasi fulasu le burí ñein lubéi hadüga kultu lun Bungiu ligía, luma burí latarü, aba lariñagun lun luágurügü lan latarü le Herusalénbei hadüga lílana Hudá kultu?23Adügabá aban daradu luma nabureme, le lurúeite Asiria: Níchuguba bián-milu gabayu bun, ánhabu adarira kaba lan awariraña.24Mabafutibu ni lun béibaaguagüdüni létima ǘnabutimabei hádangiñe úfisigu Asiriana, ani agurabaadibu badarirun gabayu hama awarihatiña gabayu Ehiptu?”25Bóugudin luéi lira, haritaguatibu funagia niábiña lan agünrinchaguei fulasu le málügüdahanga luma Bungiu? Ligía ariñagubei nun lun niabin agünrinchaguei!26Aba hariñagun Eliakímü, Sebüná luma Hoá lun úfisi Asiriana ligía:
—Adügabá fulesei woun, badimureha woun lidan araméu, gunfuranda wamuti. Madimurehabá woun lidan ebüréu, lugundun aganbaguhaña sun gürigia ha luágubaña baríeiru lun.27Lariñaga úfisi Asiriana ligía houn:
—Mama lun babureme, ni hun lóunahana lurúeite Asiria ariñagei katei le; houn gürigia ha luágubaña baríeiru lóunahana ariñagei, ladüga dandu hagía keisi huguya, héigibei hídiga guánarügü gurá humeime hiñe guánarügü.28Ábati lagúaragun úfisi ligía lidan ebüréu:
—Aganba huméi le lariñagubei óunwenbu urúei, le lurúeite Asiria:29“Mígiraguagüda humá hungua lun leyeedunün Esekíasi, siñá lubadün esefura núhaburugugiñe”.30Anhein busén lubéi Esekíasi lemenigidagüdünün luagu Bungiu, ariñaga ligía hun: “Chóuruti luagu lesefurubadiwa lan Bungiu; mígirunbei lun lábürühan uburugu le labun lubafu lurúeite Asiria”.31Madüga humá gasu lau. Lóunahañadina lurúeite Asiria ariñaga hun, lun hebelurun lidoun umadaguaü luma, lun hederegeragun hungua lun, ítara luba gayara lan héigini le halubahan tídangiñe hinadürigu beibei tuma igu luma lun hatun duna lídangiñe hufusun guánarügü.32Lárigiñeme ábame lanügünün lidoun aban ageiraü le lenege hageira, le ñein lumuti saragu türigu tuma beibei lun hadügün fein tuma diwéin, aban ageiraü le ñein lumuti garaba lauti oliwu luma sírudu. Ábameti gayara lan habagaridun buidu, móunwegunbadün. Gama lumoun madüga humá gasu lau Esekíasi, lugundun leyeeduñadün lau lariñagun hun luagu lesefurubadün lan Bungiu.33Anihein funagia hádangiñe búngiugu esefurutiña lánigu luéi lubafu lurúeite Asiria?34Hagañagia lubungiutegu Amatü luma Arüpádü? Hagaña lubungiutegu Sefarüwaimü, Ená luma Iwá? Sefu hamuti funagia Samaria luéi lubafu Asiria?35Kagia hádangiñe búngiugu hagía esefurubaliña lánigu luéi lubafu lurúeite Asiria? Kagia uagu haritagua luagu gayara lubéi lan Bungiu Herusalén asalbara?36Aba herederun gürigia maniñu, móunabuntiña ni aban dimurei, ladüga ariñagaali buga urúei houn lun móunabun hamá.37Ábati haheiridagunu Eliakímü le hábuti óunigirutiña palasiu, Sebüná luma Hoá le lani urúei abürühati hadaüragun hawougua arufudei hagarigu, aba houdin lumoun Esekíasi abahüdahei le lariñagubei úfisi Asiriana ligía lun.
Bible Society of Honduras