2 Krónikasi8
Amu burí luadigimari Salomón
1Sügüti wein irumu lárigiñe lábunagunu Salomón litenpulun Wabureme tuma lani palasiu,2ábati lábunaguniya uburugu burí le lederegerubei Iramü lun, aba líchuguniña Ísüraelina ñein.3Lárigiñe aba lidin kóntüra Amatü le lani Sobá, aba lárügüdüni.4Bunaguaya lumuti giñe uburugu Tadümóru, lidan fulasu mageirawati, luma burí sun uburugu le ñein lubéi hareidaha éigini, le burí meha lábunagubei Amatü.5Bunaguaya lumuti giñe Betü-orón le íñugiñebei luma Betü-orón le ǘnabugiñebei, uburugu burí le ñein lubéi tareidahóua áruma, gabarieirunti, gebenari ligía ani gadaünda,6luma giñe Baalatü luma burí líbiri uburugu le ñein lubéi lareidahei éigini, sun burí muna to ñein lubéi tareidahóua karü to lánina wuribu, muna to ñein lubéi hareidahóua gabayu ha lánina wuribu, luma sun burí katei le labusenrubei lábunagun Herusalén, Líwanu luma lidan sun fulasu le lábugiñebei lagumadihan.7Habügürüti Étüna, Amoruna, Eweuna, Féresüna hama Hebusuna ha erederubaña fulasurugu ha mámabaña Ísüraelina,8nariñaguña hawagu hadügawagun ha erederubaña fulasurugu hárigiñe, ha máfaragunhabaña Ísüraelina, aba líchuguniña Salomón adaagua wadagimanu dereti, lúmagiñe dan ligía aba herederun keisi idamuni Ísüraeli.9Gama lumoun mafosuti ni aban Ísüraelina lun leseriwidun keisi idamuni lidan luadigimari, lanügüniña luéidigia lun hasudarahan, ábutigume, arüneigume luma gumadangume tun karü to lánina wuribu luma houn awuribuhatiña ha gabayuagutiña.10Bián-sánñanu-dimí alidihatiña nadagimeintiña luma Salomón.11Aba lásügüragüdünu Salomón liráü urúei Ehiptuna luburuguterugugiñe Dawidi lun tidoun palasiu to ladügüboun tun, ladüga laritagun lúnguarügü:—Moun lumuti taganóun númari tidan lani Dawidi le lurúeite Ísüraeli palasiu, lugundun sagüráuti lan burí fulasu le ñeinhin lubéi beluharu lan lubagüsin Wabungiute.12Aba líchugun Salomón adagaragüdüni gudawarügüti lun Wabungiute ligibuagu bágasu le ladügübei ligibugiñe tebelaagüle ténpulu, lidan burí luéyuri adagaragüdüni según lilurudun Moisesi,13lidan burí luéyuri emeraaguni, lidan fedu le lánina iseri hati luma lidan ǘrüwa fedu le efeduhóubei lidan irumu: Tufedun fein maganatu lébini, lufedun alubahani luma tufedun dibasein.14Aranse lumuti giñe burí lidaani eseriwiduni ítara kei lariñaguni Dawidi le lúguchi, lun hadügüni fádirigu kultu, Lewitagume eremuha lun Wabungiute luma íderaguaña fádirigu lidan le emegeiruti luagu weyu. Luma giñe dan le lunbei hóunigihan óunigirutiña bena, lugundun ítara liña meha lariñaguni Dawidi le lubúein Wabungiute.15Madireirúntiña lubeiti ni murusun luéi le lariñagubei Dawidi habügürü fádirigu, habügürü Lewitagu luma habügürü gamaniharitiña lau tirisin ténpulu.16Sun meha le lunbei ladügüni Salomón, adügǘwati lúmagiñe weyu le lichugúnbei tiderebugu ténpulu, darí lumoun lagumuchun tábunawagun. Gumuti tadügǘn litenpulun Wabungiute lidan lubudubu.17Ábati lidin Salomón Esión-géberü luma Elatü, laru barana lóubawagu Edomu.18Aba lóunahan Iramü ugunei burí lun hama lani úfisigu, óunaha ligía wügüriña ha subudihabútiña lun barana, aba houdin úara hama lani Salomón úfisigu, aba hachülürün Ofirü, le ñéingiñe lubéi hanüga yarafa lun darandi-ǘrüwa-milu líburu golu aba hanügüni lun urúei Salomón.
Bible Society of Honduras