2 Krónikasi6
Lederegerunu Salomón ténpulu
1Ábati lariñagun Salomón:«Buguya Nabureme, ariñagaadibu luagu lidan lan luburiga baganawa.2Gama lumoun bunaguaadina aban ténpulu bun lun baganóun tidan, aban fulasu lun baganóun ñein súnwandan».3Lárigiñe aba líchuguni urúei ligibu hawagun sun lílana fulasu ha ñéinbaña rara, aba labiniruniña,4ariñageina:
—Biniwalá Wabureme le Lubungiute Ísüraeli le meha asagarubaliña lumutuniña Ehiptugiñe dan lügüra ani gúnfuli lumuti giñe le füramase lubéi luagu lurúeitebei lan Ísüraeli Dawidi le núguchi füramaseti giñe lun luagu Herusalénba lan uburugu le ñeinba lubéi tábunawagua litenpulun ani gúnfuli laali giñe füramasei ligía.7Dan le labusenrubei yebe núguchi lábunagunu litenpulun Wabureme le Lubungiute Ísüraeli.8Aba lariñagun Wabureme lun luagu buidu lan labusenrun lábunagun aban ténpulu, ñein láamuga lichugúa uéiriguni lun.9Gama lumoun mámaba buguya ábunagua ténpulu nun, biraüba adügei. Ligíaba ábunagua ténpulu nun.10—Gúnfuli laali lubeiti Wabungiute lani füramasei keisi lariñaguni, lídanhadina lubara Dawidi le núguchi, ñuruhadina luagu lálana larúeihan Ísüraeli, ani bunaguaadina aban ténpulu lun Wabureme le Lubungiute Ísüraeli.11Bóugudin luéi sun lira, ru naaru giñe bágüsi to gádanbalin daradu Wabungiute le ladügübei hama Ísüraelina tidoun.12Lárigiñe aba lararamun Salomón ligibugiñe latarü le lani Wabungiute, hañúarü sun Ísüraelina, aba látuleruni lúhabu.13Wariñu liña luagu aban fulasu íñuguati lauti buronse, bián méturu wein-seingü sentimeturu limigifen ligiaméme giñe lidabuberenbei, aban méturu darandi-seingü sentimeturu liñun le bugaha ladügübei aba líchuguni lamidangua bürürü. Lárigiñe aba láhuduragun hañúarü sun Ísüraelina, aba látuleruni lúhabu sielun,14aba lariñagun: Wabureme, Habungiute Ísüraelina:
—Ni sielu, ni ubouagu, úati aban Bungiu kei buguya, gúnfuli bumuti bidaradun, ani arufuda bumuti bugudemehabu houn ha eseriwidubalibu tau sun hanigi;15gúnfuli baali le füramase bubéi lun Dawidi le núguchi lidan weyu le uguñe.16Ítara liña lubeiti, Wabureme, Habungiute Ísüraelina, gúnfulibei giñe le bugaha bariñagubei lun bubuein Dawidi le núguchi: Luagu súnwandan lan ñeinbei lan aban ladügawagun lun larúeihan Ísüraeli lau bufulesein, góunigirügü hamaali ligíame lan lirahüñü hóuserun, gúnfuli hameime bilurudun ítara kei lagunfuliruni.17Ítara liña lubeiti, Wabureme Lubungiute Ísüraeli, adügabá lun lagunfulirun dimurei le bugaha bariñagubei lun bubuein Dawidi le núguchi.18—Gama lumoun, inarüni funa san Bungiu Núguchi luagu gayara lan baganóun waganagua, ya ubouagu? Anhein ñüraü lubéi sielu bun, lau lanarime lueirin, gúbudigiame ténpulu to, to nábunuboun bun!19Lau sun lira Nabureme Nubungiute, tenibá lun nayumuragun, aganbabéi lagúahan luma lafurieidun bubuein le bun.20Madigirabéi barihin ni wéyuagu ni áriebu tuéi ténpulu to, to uáguboun bariñaga luagu ñéinbadibu lan súnwandan. Aganbabéi afurieiduni le, le ladügübei bubuein bun.21Aganbabéi nayumuragun luma layumuragun bageira Ísüraeli ha bumutuniña danme le wafurieidún luagun fulasu le. Aganbabáwa yágüta sielu le ñein lubéi baganawa, ferudunabáwame giñe.22—Danme ladügün somu gürigia duru lun gürigia líledi, ani lun hafosuruni lun láfiñurun ligibugiñe bani latarü tidan bitenpulun to;23aganbabá siélugiñe, badügeime le lunbei badügüni; rubei haricha bubueingu houn. Rubei le ladünabei le gadurunbei lun, fáyeigüdabei luagu wuribati le ladügübei, rubei liricha le madurunbei lun kei lubudubu.24—Lídanme lagañeiruni ágani bageira Ísüraeli ladüga lafigouhan, ánhawa ñübuin lárigiñe lun wíchugun uéiriguni bun, ánhawa ayumuragua bun tidan ténpulu to,25aganbabáwa siélugiñe, ferudunabéi wafigoun, giribugüdabáwame lidoun ageiraü le bíchugubei woun luma houn wagüchagu.26—Anhein adagara aban lumabeigan, lun máhuyun lan huya luagu hafigouhan lílana fulasu, lárigiñe aba hafurieidun bun lidan fulasu le, aba halawahani biri, asaküriha hagía luagu hafigoun ladüga babeichuniña,27aganbabáña siélugiñe, ani ferudunabéime hafigoun bubueingu lílana bageira Ísüraeli, arufudabéime üma le buídubei houn le lunbei hafalaruni. Ábameti bóunahan huya luagun múa le, le bíchugubei houn bumutuniña halaganteme.28—Anhein adagara ilamaü o sandi fulasurugu, o lásaürün lan nadü ladüga lárouga, o hayabin lan igei, chagagaru; anhein hegeyedagua áganiñu waburugute aba hábürühan luagun, o liabin lan furumiñeguarügü lamiselu o sandi,29baganbeime sun furíeigi o ayumuraguni le ladüga furumiñeguarügü gürigia o le lan hadüga sun lílana Ísüraeli bun danme hiñuruni háhabu tuagun ténpulu to afurieida bun. Aganbabáña siélugiñe, le ñein lubéi baganawa, ferudunabaña; rubei le ladünabei lóuserun kada aban lun, lugundun buguyarügüñadibu subudihabu lun le habusenrubei gürigia hadügün o ka lan tídanbei hanigi.31Ítara luba híchugun inebesei bun, aganba hamabume sun añaha lan aganawa lidan fulasu le bíchugubei houn wagüchagu.32—Íbini anhein ñübuin aban terencha dísegiñe ladüga laganbun luagu luéirigun biri luma bubafu, aba lafurieidun lau ligibu le ñein tubéi ténpulu to,33aganbabéi siélugiñe le ñein lubéi baganawa, rubei sun le lamuriahabei buma lun, lun hasubudirunibu sun néchanigu ubouagu ru hagíame inebesei bun kei hadüga Ísüraelina ha bumutuniña, ani gunfuranda hagíame luagu aguahóua lan biri tidan ténpulu to, to nábunaguboun bun.34—Danme wáfuridun ageindagua hama wáganiñu le ñeinhin lumuti bóunahawa, ánhawa afurieida bun, ariheina luagun uburugu le banúadirubei luma tuagun ténpulu to, to nadügüboun bun,35aganbabéi wafurieidún siélugiñe luma wayumuragun, ageindaguabá waweigiñe.36—Ánhawa afigouha, kei ua lubéi ni aban mafigounhanti, ánhabu agañida woun lun bederegeruniwa houn wáganiñu lun hadaürüniwa lun hanügüniwa lidoun amu ageiraü le díseti o le lan yarafati,37ánhawa ayumuragua bun lidan fulasu le ñeinhin lubéi hanügawa, aba wánharun luagu adügaadiwa lan figóu lau wadügüni le wuribabei,38ánhawa agiribuda bun tau sun wanigi, tuma sun wawani lidan fulasu le ñeinhin lumuti hanügawa wáganiñu, aba wafurieidún ariheina luagun fulasu le, le bíchugubei houn wagüchagu, luma luagun uburugu le banúadirubei, luma tuagun ténpulu to nábunaguboun bun,39aganbabéi wafurieidún luma wayumuragun sielun, fulasu le ñein lubéi baganawa, bageindagua haweigiñe bánigu, ferudunabéime wafigoun.40—Tenibá lubeiti woun Bungiu Baba, aganbabéime furíeigi le adügǘti bun lidan fulasu le.41“Saraba, Bungiu Baba tau bubagüsin to gabafuboun, higabu lidoun fulasu le ñeinba lubéi bemeraagua. Lun badaüraguagüdüniña bufadirinigu lau esefuruni, Nabureme, lun buidu lan dan houn ha surubaña éibugun buma.42Bungiu Baba, mírudaguagüdabei urúei le banúadirubei. Haritaguabá luagun bínsiñehabu lun Dawidi, le bubuein”.
Bible Society of Honduras