2 Krónikasi4
Tílagu ténpulu
1Adügati giñe Salomón aban latarü lauti buronse, nefu méturu limigifen, nefu lidabuberen, gádürü-dimí liñun.2Adügati giñe aban óunwenbu ágeidinaü lauti buronse, róunuti lagei duna ligía ani gádürü méturu dimí luéigiñe aban aru luagun aban. Bián méturu luma wein-seingü sentimeturu luagu liñun, tareisi méturu dimí lidabuberen.3Lábugiñe luma geyegua lau lagei duna, ñéinñanu bián fíleiti hayawa bágasu wügüriña, diisi luagu kada bián-wein-seingü sentimeturu, herederati kei ábanmeme úgubu luma ágeidinaü ligía.4Ágeidinaü ligía, hagibuaguñein duusu bágasu wügüriña láutiña buronse, ǘrüwa hádangiñe hagibu luagun nórute, ǘrüwa, hagibu luagun suru, ǘrüwa hagibu luagun oubaü le ñéingiñe lubéi laboucha weyu, ǘrüwa, hagibu luagun oubaü le ñeinhin lubéi lálüda weyu. Múnadoun lesetira hagudi le hanagangiñebei, hawaguti lemeraagua ágeidinaü ligía, hagía lébubaña.5Wídüñein sentimeturu luagu liduru louba ágeidinaü ligía. Ítara liña lárurugu kei aban fuluri le liriu, gabarati ǘrüwa-wein-sisi-milu líturu duna lidan.6Adügati giñe diisi ágeidinaü lauti buronse lun achibaguni, aba líchugun seingü luéigiñe kada oubaü. Lidan lachibúa sun le ayusurubei lidan adagaragüdüni le gudawarügüti; ánheinti ágeidinaü le wéiribei, lun hachibagun fádirigu houngua lidan layusurúa.7Adügati giñe diisi lebu sanudelu lauti golu, aba líchuguni ténpulurugu, seingü luéigiñe kada oubaü.8Adügati giñe diisi dábula aba líchuguni ténpulurugu, seingü luéigiñe kada oubaü. Adügati giñe san kopu wéinamuti lauti golu.9Adügaléi habürürün fádirigu luma létima meni bürürü, labu burí lubenari, aba lafuraruni lubenari lau buronse.10Aba líchuguni ágeidinaü le wéiribei luéigiñe tóunwenren ténpulu, luagun suedi.11Adüga lumuti giñe burí Iramü sóudieru, chóbuli luma kopu wéinamuti, ítara liña lagumuchuni wadagimanu le ladügübei lun Salomón litenpulunrugu Wabureme.12Wadagimanu ligía le ladügübei: Bián wagabu le róunuti, bián kapitéli róunuti le ligibuagubei wagabu, bián ayarawaguni lun ladouragun lau kapitéli,13gádürü-san güranáda lun biángubei ayarawaguni, bián fíleiti lun kada ayarawaguni, le aubei ladourawagúa biángubei kapitéli róunuti le ligibuagubei wagabu;14diisi ebu, diisi ágeidinaü le ligibuagubei,15ágeidinaü le wéiribei, hau duusu bágasu wügüriña láutiña buronse ha lábugiñebaña,16bóugudin burí luéi sóudieru, chóbuli luma fígiedu.Sun burí ílagu le ladügübei Iramü le máisturu lun urúei Salomón tun litenpulun Wabungiute, lauti buronse le mirigüdawaali.17Aba lóunahan urúei adaagüdei sun katei le lóubawagu Hordán, labadinagua Sukotu luma Saretán.18Gíbeti ílagu lauti buronse ladüga Salomón darí lun meberesen lan lun lamisurahóuniwa.19Óunahati giñe Salomón adügagüdei líbiri burí ílagu le litenpulunrugubei Wabungiute: Latarü le golu, dábula burí tun fein to anuadirúboun lun Wabureme,20lebu burí sanudelu lauti golu lau lilanpun, le ligibugiñebei Fulasu le Sándutimabei, lun lebedún keisi lariñawagún;21fuluri, lanpu, fígiedu, sun le lauti golu,22tíbaaha mecha gudaaru, kopu wéinamuti, guliyeru luma lagei kupali, sun burí le lauti golu. Lauti giñe golu bena le ebelaagülei ténpulurugun, bena burí le múnadagiñebei, lubenari Fulasu le Sándutimabei luma burí tubenari ténpulu guánarügü.
Bible Society of Honduras