2 Krónikasi34
Larúeihan Hosíasi Hudá
1Widü bugaha irumu lau Hosíasi dan le lagumeserunbei arúeiha, arúeihati darandi-aban irumu Herusalén.2Buiti bugaha lóuserun Hosíasi ligibugiñe Wabureme, falá lumuti ligaburi Dawidi le lagücha madireirunga luéi lidan ni kata.Larumadagüdüni Hosíasi Hudá luma Herusalén
3Lidan liwidün lirumudiri larúeihan Hosíasi, ñǘraügili, ligía lagumeserun áluahei Wabureme le Lubungiute Dawidi le lagücha. Lidan liduusun lirumudiri larúeihan aba lagumeserun arumadagüdei Hudá luma Herusalén, tídangiñe burí sanduariu wíyetu, liyawa Asera, guáriua, tuma burí iyawaü lautu gürabu rǘrüguati,4günrinwaguati burí latarü tuma burí liyawa Baali liñúarü. Óunahati giñe Hosíasi agünrinchaguei burí latarü lun kupali le igibuagunbei. Óunahati giñe abouchaguoun liyawa burí Asera, guáriua tuma burí iyawaü lautu gürabu rǘrüguati; aba ladügünu kalikime lárigiñe aba lachagaruni luagun hamúaha ha áhuduragubaña houn,5gudá lumuti giñe habu hafadirinigu luagu burí hani latarü, ítara liña larumadagüdüni Hudá luma Herusalén ligibugiñe Wabureme.6Ligiaméme giñe ladügübei luburuguterugu Manasési, Éfürain, luma Simeón darí Nefütalí, luma geyegua lau burí uburugu le.7Günringua lumuti burí latarü, liyawa Asera hama guáriua, aba ladügüni kalikime, günringua lumuti giñe sun latarü lánina kupali lidan sun lumúan Ísüraeli. Lárigiñe aba lagiribudun Herusaléun.Tadarirúniwa liliburun lúrudu
8Lidan irumu disiwídü lidan larúeihan Hosíasi, lárigiñe larumadagüdüni ageiraü tuma ténpulu ligibugiñe Wabungiute, aba lóunahani Safán le liráü Asalíasi, Amasíasi, le gálidi luma Hoasi le lani urúei abürühati, le liráü Hoakasi aransehóun litenpulun Wabureme le Lubungiute.9Ábati houdin lumoun Ilükíasi fádiri le íñugutimabei aba hederegeruni seinsu le anügǘbei litenpulunrugun Wabungiute lun, le hóundarubei Lewitagu ha lúniri bena uburugu Manasési luma Éfürain, luma hámagiñe gürigia ha erederubaña Ísüraeli luma hámagiñe sun Hudaana luma Benhamín, luma hámagiñe lílana Herusalén.10Lárigiñe aba hederegeruni houn ábutigu lun tuadigimariduniwa litenpulun Wabungiute, lun hagíaba lan afayeiraña ha nadagimeinbaña lidan taransehóun ténpulu.11Aba hederegeruni seinsu houn sarafangei, luma houn lábutigu wadagimanu lun hagañeihan dübü le aransehóuaali, fulansu lun tíndanute muna burí to meha hígiruboun lurúeitegu Hudá lun tañaladun.12Adüga hamutiha wügüriña ha hawadigimari lau laruman, ha arihubaña hau, Lewitagu ha: Háatü luma Abüdíasi, ladügawagun Merarí, luma Sakaríasi luma Mesulámü, ladügawagun Keatü, ha ábutigu. Hagía giñe arihubaña hau ha anaagubaña ilaü, hagía adundehabaliña sun ha arihubaña lau wadagimanu. Sun bugaha Lewitagu gíñaahatiña, fiu hádangiñe abürühatiña le asusereduti, agumadihatiña o lúnirigu bena.14Dan le hasagaruni seinsu le bugaha anügǘbei litenpulunrugun Wabureme, aba ladarirunu Ilükíasi líburu to ñein lubéi lilurudun Wabungiute le meha líchugubei lídangiñe Moisesi.15Aba labahüdagun lun Safán le abürühati asusereduti luagu darila lan liliburuna lúrudu litenpulunrugu Wabureme; aba lederegerunu líburu lun Safán;16aba lanügünu Safán lun urúei, lariñaga lun:—Hadügüñein lubúeingu urúei sun le ariñawagúbei houn lun hadügüni.17Rǘrüguagüda hamaali pülata le ténpulurugubei, derege hamá houn ha arihubaña lau wadagimanu.18Ariñagati giñe Safán lun urúei luagu derege lan fádiri Ilükíasi aban garudia lun; aba laliihanu Safán lun urúei.19Dan laganbunbalin urúei le tariñagubei liliburuna lúrudu, aba laheiridagunu ladaüragun,20aba lariñagun lun Ilükíasi, lun Aikamü le liráü Safán, lun Abüdón le liráü Mikaíasi, lun Safán le abürühabalin asusereduti luma lun Asaíasi le lubúein urúei.21Heiba álügüdaha luma Wabureme nuagu luma hawagu gürigia ha añaheinguabaña Ísüraeli luma Hudá libügürü le tílabei líburu to adarirúboun; lugundun fagua gáñiti Wabungiute wama saragu ladüga meberesentiña meha wagüchagu lau le lariñagubei Wabungiute madügün haméi le bürüwañubei tidan líburu to.22Aba lidin Ilükíasi hama ha líridubaña urúei tumoun Uludá to profeta, to lúmari Salumu le liráü Tiküwá, libari Arasi, le óunigirubalin tagei daüguaü ténpulurugu. Lidan bugaha libiaman bariu taganawa Uludá Herusalén, danti le hadimurehanbei tun, aba tóunabuniña,23tariñaga houn:
—Anihán lóunabagülebei Wabureme le Lubungiute Ísüraeli: “Ariñaga humá lun gürigia le óunahabalün álügüdaha numa,24luagu nariñahare lan au le Aburemei: Nanüga aban wuribani luagun fulasu le luma hawagun lílana, ítara kei sun íñarawaguni le tídanbei líburu to haliihaboun ligibugiñe lurúeite Hudá.25Lugundun ígira hamaadina aba hágudahan kupali houn amu búngiugu, agañidagüdana lau hóuserun. Ligía gáñihadina lubéi luma fulasu le, ani magalumarunbei nigañi.26Ariñaga humá lubeiti lun lurúeite Hudá, le óunahabalün álügüdaha luma Wabureme, luagu lariñahare lan giñe Aburemei le Lubungiute Ísüraeli: Ladüga bíchugun barigei lun le baganbubei,27luma ladüga bírudagun, rugua buguya bungua nun, dan baganbuni le nariñagubei kóntüra fulasu le hama lílana, ladüga bǘnabudaguagüdün bungua nigibugiñe, ladüga baheiridagunu badaüragun, ayahua buguya nigibugiñe, au giñe luagu nóubadina, aganba naadibu. Au le Aburemei ariñagubalin bun.28Nígiruba lun bounwen lau darangilaü, lun bóundaragun hama bagüchagu, marihingabeime wuribani le lunbei nanügüni luagun fulasu le luma hawagun lílana”.
Aba hagiribudun ha lóunahabaña urúei lau óunabagülei le lun.29Ábati lóunahan urúei hawagu sun ábutigu ha lílana Hudá luma Herusalén lun hóundaragun.30Ábati lidin urúei litenpulunrugu Wabungiute hau sun wügüriña ha lílana Hudá hama lílana Herusalén, fádirigu, Lewitagu hama sun lílana fulasu lúmagiñe le íñugutimabei lumoun le ǘnabutimabei. Ñein laliihei urúei houn lau umalali héreti sun le tariñagubei liliburuna daradu to adarirúboun litenpulunrugu Wabureme.31Lárigiñe aba lararamun urúei habu sun lánigu aba füramase lan ligibugiñe Wabureme luagu ladügübei lan le lubeibei, luagu hagunfulirubei lan lugumadin luma lilurudun tau sun hanigi luma tau sun hawani. Ani luagu hagunfulirubei lan le lariñagubei daradu le bürüwañubei tidan líburu.32Lárigiñe aba ladügün lun sun lan lílana Benhamín hama lílana Herusalén ha ñéinbaña, lun füramase hamá luagu hagunfulirubei lan daradu. Aba hagunfuliruni lílana Herusalén lidaradun Wabungiute le Habungiute hagüchagu.33Gidá lumutiña Hosíasi sun guáriua ha lánina marichaü háñaha lídanbaña sun hamúan Ísüraelina adüga ligía lun sun lan gürigia ha Ísüraelibaña lun híchugun kultu lun Wabureme le Wabungiute. Ani sun dan le wínwanñu lubéi madireirúntiña luéi Wabureme le Habungiute hagüchagu.
Bible Society of Honduras