2 Krónikasi2
Lidaradun Salomón luma Iramü le lurúeite Tiru
1Aba líchaagun Salomón lungua lun lábununu ténpulu lun Wabureme tuma aban palasiu lungua.2Aba líchugun Salomón ǘrüwa-wein-diisi-milu wügüriña lun hanaagun anügüni, hama gádürü-wein-milu nadagimeintiña dübü lun hawadigimaridun áraabu, hama ǘrüwa-milu-sisi-san adundehatiña lun hagíaba lan adundehaña nadagimeintiña.3Lárigiñe aba lóunahan Salomón ariñaga lun Iramü le lurúeite Tiru:«Adügabá nun kei bugaha badüga lun Dawidi le núguchi le meha unbei bóunaha fulansu le hibúari lun lábunagun aban lúbaana arúeihani lun laganóuniwa tidan.4Nábunagua aban ténpulu lun Wabureme le Nubungiute lun nederegerunu lun, lun nágudahan ibiñein lun luéirigun liri, lun nadagaragüdünu fein ligibugiñe súnwandan luma lun níchugun adagaragüdüni le gudawarügüti lun binaafin luma rábounweyu, luma burí lidan luéyuri emeraaguni, lidan burí fedu le lánina iseri hati luma lidan burí líbiri fedu le adügǘbei súnwandan Ísüraeli lun Wabungiute le Wabureme.5Gama lumoun gasu wéiriboun lan ténpulu to lunboun nábunagunu lugundun wéiritimati Wabungiute hawéi sun búngiugu.6Lau sun lira, kaba gayara lábunagun aban ténpulu lun, siñá laali ligía sielu lau sun lueirin ágüdaha? Kátañadinagia lun nábunagun ténpulu lun, íbini lúnrügü lan nágudahan kupali lun luagu luéirigun?7Óunahaba lubeiti aban wügüri nun le buiti lidan luadigimariduniwa golu, pülata, buronse luma gürabu, le giñe subusehabúti tuáguti gamisa funafunagutu, funatu tuma to guchu. Lun giñe gagiwerihadi lan tau chíchili luagu fulansu, lun luadigimaridun hama máisturugu ha númabaña Hudá luma Herusalén, ha ladaradurubaña Dawidi le núguchi.8Óunahaba giñe fulansu le hibúari nun Líwanugiñe, gudi luma sándalu, ladüga subudi numuti luagu gáchuahadi hamá bánigu wewe. Híderagubaña nubúeingu bubueingu9lun haranserun saragu fulansu nun, kei mosu lubéi wéiriboun lan ténpulu to lunboun nábunagunu ani wende tuguyame giñe.10Gama lumoun subudibéitia luagu níchuguba lan éigini houn bumusuniña ha áchuahabaña wewe, gádürü-míñunu-gádürü-san-milu líburu türigu, ítarameme giñe liibe líburu sewada, gádürü-san-bián-wein-milu líturu diwéin, ítarameme giñe liibe garaba».11Ábati lóunahan Iramü le lurúeite Tiru aban gárada lun Salomón, lariñaga lun tidan:
«Ru laadibu Wabungiute harúeiteme Ísüraelina ladüga hínsiñe lumutuniña lun.12Biniwalá Aburemei le Lubungiute Ísüraeli, le adügübalin sielu luma ubóu, luagu líchugun aban isaani chu tau, le huáliti lichügü lun Dawidi, lun lábunaguba lan aban ténpulu lun Aburemei tuma aban palasiu lungua!13Nóunahaña lubeiti aban wügüri chu tau bun, máisturu Iramü.14Iramü ligía, tiráü aban würi Kananna hádangiñetu lani Dan türibu lau aban wügüri Tíruna. Buiti lidan luadigimariduniwa golu, pülata, buronse, gürabu, dübü, wewe, gamisa funatu tuma gúchutu, linu, luma lidan lagiwerihóun dibuhu, gadügaditi giñe sun luwuyeri dibuhu le amuriahóuti luma úara hama gawadigimaridaditiña ha meha lúmabaña Dawidi le búguchi.15Óunahabei lubeiti türigu, sewada luma diwéin le uágubei bariñaga houn bubueingu.16Wáchuahabei sun wewe le babusenrubei Líwanurugugiñe ábame wanügüni bun tidan ugunei baranahagiñe darí Hope. Buguyahalime ariha lau lanügǘniwa ñéingiñe lun Herusaléun».17Lárigiñe aba lóunahan Salomón abahüdaña sun terencha ha aganóubaña Ísüraeli, lárigiñe meha labahüdüniña Dawidi le lúguchi, sánñanu-dimí-san-ǘrüwa-milu-sisi-san.18Aba líchugun ǘrüwa-wein-diisi-milu anaagutiña ílagu, gádürü-wein-milu nadagimeintiña dübü áraabu hama ǘrüwa-milu-sisi-san adundehatiña.
Bible Society of Honduras