2 Krónikasi17
Larúeihan Hosafátü Hudá
1Leweñeguati Asá aba larúeihan Hosafátü le liráü, le arufudubalin lere lidan uburugu Ísüraeli.2Ruti súdara lidan sun uburugu baríeiruati le lani Hudá, ru ligía óunigirutiña tuma burí kianpu houn súdaragu lidan sun lumúan Hudá luma luburuguterugu burí Éfürain le lagañeirubei bugaha Asá le lúguchi.3Lúmagiñeñein Hosafátü Wabungiute ladüga óuserati kei meha lóuserun Dawidi le lagücha, meseriwidunti houn liyawa baali,4lun Lubungiute lúguchi leseriwida afalarei lugumadin Wabungiute mafalarungalei hani lílana Ísüraeli hénpulu.5Ligía lederebudagüdünbalin Wabungiute arúeihani lábugiñe lagumadihan, ábatiha híchugun sun Hudaana idewesei lun. Ítara liña lagibedagun lirisin Hosafátü luma laganbahóuniwa luagu.6Falá lumuti lémeri Wabungiute tau sun nanigi, gidaya lumutu hatenpulun gibe tubungiutegu tuma burí liyawa Asera Hudaagiñe.7Lidan lǘrüwan lirumudiri larúeihan, aba lóunahan hawagu Ben-aili, Abüdíasi, Sakaríasi, Natanaéli luma Mikaíasi ha lani úfisigu, lun harufudahan luburuguterugu burí Hudá,8óunaha lumutiña giñe Semaíasi, Netaníasi, Sewadíasi, Asaeli, Semiramótu, Yónatan, Adoníasi, Towíasi luma Towadoníasi ha Lewitagu hama. Ñǘdünti Elisamá luma Horamü ha fádirigu úara hama.9Lóunahanbaliña, lun harufudahan houn lílana Hudá tau liliburuna lilurudun Wabungiute. Aba héibuguni sun luburugute Hudá arufudaheina houn gürigia.10Sunti dan le, sun lurúeitegu burí ageiraü le geyegubei lau Hudá wéiriti hanufude luéi Wabungiute, darí lun málugungubei hamá hageindagun luma Hosafátü.11Lubaragiñe lira, barürügütiñaha fiu Filistéana edewehani luma pülata keisi liseinsuna urúei lun Hosafátü, barǘ hagía Arawiana sedü-milu-sedü-san mudún hama sedü-milu-sedü-san harahüñü gábara lun.12Aba lubeiti aweiridagueina lan lubafu Hosafátü saragu. Bunaguati baríeiru luma burí uburugu tun burí gamasein Hudá13gíbeguati lumegen luburuguterugu burí Hudá, gasudaranigu ligía ha ganigitiña Herusalén14anihán hiri según habürüdǘn hawagu iduheñu:Adüná hau ǘrüwa-san-milu súdaragu keisi gumadan houn hábutigu súdaragu, luéigiñe lóubadina Hudá.15Lóubagiñe Adüná, ñeinñein Hoanán le ábuti hau bián-san-gádürü-wein-milu súdara,16lóubagiñe Hoanán, Amasíasi le liráü Sikürí, le ederegeragubei lungua lau lugundan lun leseriwidun lun Wabungiute, habu bián-san-milu súdaragu ganigitiña.17Luéigiñe lóubadina Benhamín, ñeinñein Eliadá, aban wuriburuguna ganigiti, hau bián-san-milu wügüriña tau gimara luma idaüdinaü le hadáü ageindagutiña,18lóubagiñe Eliadá, ñeinñein Hosabádü hau san-gádürü-wein-milu wügüriña aranseñu lun wuribu.19Lábugiñeñanu bugaha eseriwiduni lun urúei sun ha, bóugudin hawéi ha lóunahabaña urúei lidoun burí uburugu baríeiruati le lani Hudá.
Bible Society of Honduras