1 Samueli23
Lesefuruni Dawidi uburugu Keilá
1Luagu aban weyu, aba hábürühan Filistéana luagun uburugu Keilá, aba híweruhani türigu le sun liñabei lewenihóun. Dan le labahüdawagunbei katei le lun Dawidi,2aba lidin, aba lálügüdahan luma Wabureme. Lariñaga lun:—Bíchuguba üma nun lun nidin ageindagua hama Filistéana ha?
Lariñaga Wabureme lun:
—Beiba, áfaraguabaña, sefu báamugei uburugu Keilá.3Gama lumoun hariñaga luwügüriñan Dawidi lun:
—Hanufudeediwa ligía ya Hudá, hanufudetimabadiwa ánhawa ñüdün Keilá ageindagua hama Filistéana.4Ábayati lálügüdahan Dawidi luma Wabureme, lariñaga Wabureme lun:
—Beiba uburugun Keilá, lugundun nederegerubaña Filistéana búhaburugun.5Aba lidin Dawidi habu luwügüriñanigu uburugun Keilá, aba hageindagun hama Filistéana ñein, aba háfaraguniña sunsuinagubei, aba hanügüniña habiñanigu. Ítara liña lesefuruniña Dawidi lílana Keilá.6Lidan bugati lanurahan Abiatárü le liráü Aimelekü lumoun Dawidi, barǘ lumuti buga tidáü dúnigu lúmagua.7Keiti ariñawagúaali lan lun Saulu luagu anihein lan Dawidi Keilá, aba lariñagun lúnguarügü:
—Deregelá Wabungiute núhaburugun, lugundun lau lebelurun uburugun, siñaali láfuridun.8Lárigiñe aba lóunahan Saulu hawagu sun lánigu lun houdin Keilá, lun hegeyedaguni Dawidi hau sun luwügüriñanigu.9Gama lumoun kei lasubudiruni Dawidi luagu busén lan Saulu lábürühan luagun, aba lariñagun lun fádiri Abiatárü lun lanügüni tidáü dúnigu lun, lun lálügüdahan luma Wabureme.10Aba lariñagun Dawidi:
—Wabureme Lubungiute Ísüraeli, subudi lumuti bubuein luagu busén lan Saulu liabin agünrinchaguei uburugu Keilá nadüga.11Liábinba san Saulu áluahana ítara kei naganbuni? Hederegerubadina san lílana Keilá lun? Wabureme Lubungiute Ísüraeli, ayumuraguati bubuein bun lun bariñaguni lun!
Lariñaga Wabureme lun:
—Anha, liábinba Saulu.12Ábati lariñagun Dawidi lun:
—Hederegerubadiwa san lílana Keilá au hau nánigu lun Saulu?
Lariñaga Wabureme lun:
—Anha, hederegerubadün.13Ábati láfuridun Dawidi Keilagiñe hau hawara sisi-san wügüriña aba houdin éibudügü. Danti le laganbubei Saulu luagu anura lan Dawidi Keilagiñe, aba lerederun léibaahani.
Dawidi lidan fulasu mageirawati
14Ábati lerederun Dawidi aganawa lidan burí aramudaguagülei le luágubei aban wübü lidan fulasu mageirawati le lani Sifu, íbiniti sagü lan weyu láluahani Saulu, míchugun lumuti Wabungiute lun.15Lau sun lira, hanufudeti Dawidi luéi Saulu, lugundun busenti láfaruni hilagubei. Ligía lébubei lerederun Oresi, lidan fulasu mageirawati le lani Sifu.16Luagu aban weyu, aba lidin Yónatan le liráü Saulu Oresi arihei Dawidi, lun líchugun anigi lun, luma lun léredagüdüni lemenigin luagu Wabungiute.17Lariñaga lun:—Manufudedabá, lásiñarubadibu núguchi Saulu adarira. Bachülürüba lurúeiteme Ísüraeli, aume bibiaman lidan uéiriguni. Íbini núguchi Saulu, subudi lumuti lira.18Ábati hadügün biángubei hagía aban daradu, aba híchuguni Wabureme kei gefenti. Lárigiñe aba lagiribudun Yónatan lúbiñoun, aba lerederun Dawidi Oresi.19Gama lumoun aba houdin lílana Sifu uburugu Gibeá adimureha luma Saulu, hariñaga lun:
—Anihein Dawidi aramudagu wamúanrugu luagu wübü Akilá, uburugu Oresi, luéigiñe suru libiti fulasu mageirawati.20Danme lubeiti labusenrun urúei liabin, gayaraati liabin, wederegerubei lun.21Lariñaga Saulu houn:
—Binilaün Wabureme luagu nagudemedun hun!22Guentó ayumuraguatina hun lun hidin hasubudireime fulasu le ñein lubéi buidu buidu, luma ka lan arihubalin ñein, lugundun aganbatina luagu sumadi lan.23Ariha huméi sun fulasu buidu buidu le ñein lubéi laramudagua, danme chouru humaali, ábame hiabin ariñagei nun, ábameti nidin huma. Ani anhein inarüni lubéi luagu anihein lan lidan fulasu ligía, náluahabei buidu buidu hadan sun lánigu Hudá külán.24Aba hagiribudun lílana Sifu haburuguterugun. Dawidi bugati hau lánigu lídanñanu fulasu mageirawati le lani Maón luagu fulasu mawübüriti le luéigiñebei suru libiti fulasu mageirawati;25ábati lidin Saulu hau lumutuniña áluahei. Dan lasubudirunbalin Dawidi, aba laragachun luagun wübü le lídanbei fulasu mageirawati Maón. Dan lasubudirunbalin Saulu, aba lidin lidoun fulasu mageirawati Maón éibaahei Dawidi.26Saulu hau lumutuniña luéigiñe aban louba wübü, Dawidi hau lánigu luéigiñe le aban oubaü óufudaheina lun hadisedun luéi Saulu. Danti le geyegua laali Saulu hau lumutuniña Dawidi hau sun lánigu, yarafaali lun hárügüdüniña,27aba liabin aban ariñaahati lun Saulu:
—Giribubá furese urúei, ladüga beluha Filistéana uburugun.28Ábati lígiruni Saulu léibaahani Dawidi, aba lidin ageindagua hama Filistéana. Ligía lébubei líchugun liri fulasu ligía: «Luwübürina fánreinguaü».29Ñéingiñe aba lidin Dawidi aganawa lidan aramudaguagülei le lani En-gadü.
Bible Society of Honduras