1 Samueli20
Líderaguni Yónatan Dawidi
1Aba lanurahan Dawidi Naiotugiñe, aba lidin le ñeinhin lubéi Yónatan, lariñaga lun:—Ka san nadügübei? Ka nidurunbei? Ka figóu nadügübei lun búguchi, láluahanbei láfarunina?2Lariñaga Yónatan lun:
—Mítaranbei! Máfarun lubadibu! Subudibéi luagu madügün lan núguchi ni kata wéiriti o ñǘraüti masubudiragüdüngalei nun. Kábati uagu laramudagua lau katei le nuéi? Mítaranbei!3Gama lumoun lariñaga Dawidi lun:
—Subudi lumuti búguchi buidu buidu luagu hínsiñe nan bun, mabusenrunbeiti basubudiruni luéi bírudun. Gama lumoun fiñutina lidan liri Wabureme luma buagu guánarügü luagu yarafa nan lun óunweni!4Ábati lariñagun Yónatan lun:
—Ka babusenrubei nadügün luagu bufulesein?5Lariñaga Dawidi lun:
—Kei haruga lubéi fedu le lánina iseri hati, lunti nañuurun eiga luma urúei. Gama lumoun ígiraba lun naramudagun áraabu darí rábounweyu, gumugu weyu haruga.6Ánheinti álügüdaha búguchi nuagu, bariñagame lun luagu amuriahatina lan üma buma lun nidin Belén, lubá hadügüni niduheñu adagaragüdüni le lánina sagü irumu.7Anhein óunaba: Magadiñeti, gayaraabei nerederun darangilu; gama lumoun anhein agañida, basubudirubei luagu aranse lan lun ladügün wuribati nun.8Adügabéi lubeiti fulesei le nun, kei bubuein lubéi au, ani fiñuhadiwa umadaguaü ligibugiñe Wabureme. Gama lumoun anhein au lubéi gadurunbei, áfarabana, mama mosu banügünina ligibugiñoun búguchi.9Lariñaga Yónatan lun:
—Maritaguabéi lira! Anhein nasubudira luagu aranse lan núguchi lun ladügün wuribati bun, nasubudiragüdübei bun.10Ábati lariñagun Dawidi lun:
—Kaba awisarana ánheindügü óunaba búguchi wuriba?11Lariñaga Yónatan lun:
—Keimoun numa. Keimoun áraabu.
Aba houdin áraabu,12aba lariñagun Yónatan lun Dawidi ñein:
—Fiñutina bun lidan liri Wabureme le Lubungiute Ísüraeli luagu nóuchuba lan nasubudiruni le laritagubei núguchi haruga luma gumugu weyu haruga kei oura le. Anhein mariban lubéi laritagun bubá, nóunahaba awisarabu;13gama lumoun anhein haritagua lubéi ladügün wuribati bun, béilana Wabureme here ánhabu mawisarun nan, íderaguanabume anuraha. Íderagualabu Wabureme kei buga líderaguni núguchi!14Ánheinti wínwangidina lubeime lidan dan ligía, bóuseraname lau areini le aubei lóuserabu Wabureme. Ánheinti hilaadina lubeime,15bóuserañame niduheñu lau areini; Lagünrinchagubaña Wabureme báganiñu sunsuinagubei!
Ítara liña ladügün Yónatan aban daradu luma Dawidi,17ani luaguméme ínsiñeni le luágubei Yónatan lun Dawidi, ábaya láfiñurun lun, ladüga hínsiñeti lun saragu kei línsiñegua lungua.18Lárigiñe aba lariñagun lun:
—Haruga fedu le lánina iseri hati, keiti málabei lan bubara luagu dábula, bemegeirúaba.19Gama lumoun luágume lǘrüwan weyu, ligíatimaba larihín luagu ua ban. Beiba lubeiti lidoun fulasu le ñein lubéi baramudagua ligira buga, ábame berederun lurugabu saragu dübü lügüra.20Ábame nachüürün ǘrüwa gimara luagun oubaü ligía, kamá hamuga nóuchaguña,21nariñagameti lun nubúein: “Beiba áluahoun gimara”. Ánhana ariñaga lun: Ñáhounmemeñoun gimara budaboun, gayaraabei báfuridun darangilu, masuseredunbei ni kata bun. Fiñú numuti bun lidan liri Wabureme.22Gama lumoun ánhana ariñaga lun: “Yagürounmémeñoun gimara”, beiba ladüga ligía labusenrubei Wabureme, lun bidin.23Luáguti füramasei le wadügübei wámagua, Wabureme gefenbei luagu lun súnwandan.24Aba laramudagun Dawidi áraabu, danti lachülürünbei fedu le lánina iseri hati, aba lañuurun urúei lun leigin.25Aba lañuurun le ñeinñaha lubéi lañuura súnwandan, lubadu touba muna. Aba lañuurun Yónatan ligibugiñe, Ábünerü añuura lóubagiñe. Málati lubara Dawidi.26Weyu ligía, mariñagunti Saulu ni kata, laritagun luagu ladüga lan wiye lan Dawidi ligibugiñe Bungiu weyu ligía.27Gama lumoun le libiaman weyu, malamémeti lubara Dawidi. Ábati lariñagun Saulu lun Yónatan:
—Ka san uagu miabin lubéi liráü Hesé eiga ni wurinouga ni uguñe?28Lariñaga Yónatan lun:
—Amuriahati Dawidi üma numa lun lidin Belén.29Ayumuraguati nun lun níchugun üma lun, lun lidin adagaragüda lageira hama tílana luban. Ariñagati giñe nun luagu anhein lan nadüga fulesei le lun, léibaaguba lan giñe arihaña liduheñu. Ligía lébubei miabin lan eiga luma urúei.30Ábati lagañidun Saulu lun Yónatan, aba lariñagun lun:
—Tiráü úguchuru wuribatu! Ibidiñeti funagia nun luagu buguya lan lubuidun-agei lumada liráü Hesé lun busiganu bun luma tun búguchu?31Sun dan wínwanñu lan Dawidi ligibuagu ubóu le, ni buguya, ni barúeihan, machourunbei. Óunahaba lubeiti áluahei, banügeime nun, lugundun lunti lounwen!32Lariñaga Yónatan lun:
—Kábagia uagu lounwe? Kagia ladügübei?33Aba liñuruni Saulu larufunte lun yebe límiruni Yónatan lau, lauti lira aba lasubudiruni Yónatan luagu anihein lan lidan lúguchi lun láfaruni Dawidi hilagubei.34Ábati lásaarun Yónatan lau igañi luéigiñe dábula, aba méiginhali lan lidan éigini le lánina libiaman luéyuri fedu ladüga híruti luagu Dawidi ladüga lanabaguni Saulu le lúguchi.35Larugan binaafin, aba lidin Yónatan áraabu, lidan oura le lariñagubei lun Dawidi, barüina ligía aban lubúein nibureingili,36aba lariñagun lun:
—Éibaaguaba áluahoun gimara burí to nachüühan.
Aba léibaagun musu sun aniha lan Yónatan achüüra aban gimara áfaagueina lun ladagarun dise luéi.37Dan le lachülürünbei lubúein le ñeinhin lubéi tábürüha gimara, aba lagúaragun Yónatan lun lau sun lumalali:
—Yagürounmémeñoun gimara!38Ábaya lagúaragun Yónatan lun lubúein:
—Furesebá, éibaaguaba, merederaguabá!
Aba labudahanu lubúein Yónatan gimara, aba lanügünu lun,39gama lumoun mefenti luagu ni kata ladüga Yónatanrügüñein luma Dawidi asubudirei haseinin.40Lárigiñe aba lederegerunu Yónatan lárumate lun lubúein, aba lariñagun lun, lun lanügünu tárigoun uburugun.41Kei lidin lubúein, ítara láfuridun Dawidi lanagangiñe saragu dübü ligía, dan lachülürün ligibugiñe Yónatan, aba lélemuchun ǘrüwa wéiyaasu dagá lerebe múarugu. Ábati hachuuragun houngua, aba hayahun darí lagalumadun Dawidi.42Ábati lariñagun Yónatan lun Dawidi:
—Beiba darangilu, ladüga fiñún le wadügübei wagía biángubei, lidan liri Wabureme wadügei, ani amuriahaadiwa lun ñein lan Wabureme wadan luma lidan hamadagua badügawagun hama nadügawagun. Lárigiñe aba lidin Dawidi luagu léibugun, aba lagiribudun Yónatan uburugun.
Bible Society of Honduras