1 Samueli12
Lederegeruni Samueli arúeihani lun Saulu
1Lárigiñe aba lariñagun Samueli hagibugiñe sun Ísüraelina:—Ariha humaali luagu rúhadina lan ugundani hun lidan sun le hamuriahabei numa, ani rúhadina lan hurúeite.2Anihán urúei le lunbei ladundehanün. Auti, wéiyaadina garubaadina, ani añahein nirahüñü haganagua. Au adundehabalün lúmagiñe niñüraü darí guentó;3ani anaha higibugiñe guentó: Anhein barǘ nubalin lilügün aban hídangiñe bágasu o burigü, o anhein yeeda nubéi o óusera nan wuriba aban hídangiñe, anhein fayei lubalina furumiñeguarügü hídangiñe lun nadügün wuribati, gayaraati híchugun nidurun ligibugiñe Wabungiute luma ligibugiñe urúei, nafayeirubei le nadueirubei.4Aban hariñagun:
—Madügüngidibu ni kata líbeina le woun.5Wabureme luma urúei le lanúadirubei, gefentiña luagu madari humá duru nuagu, liña lariñagun Samueli.
Aba hariñagun súngubei:
—Ítara liña.6Aba giñe lariñagun Samueli houn lílana fulasu:
—Wabureme, ligía meha nadagimeinbei hádangiñe Moisesi luma Aarón asagaraña wagüchagu Ehiptugiñe.7Aranse humá lubeiti lugundun nadimureha huma ligibugiñe Wabureme libügürü sun katei buiti le adüga laalibei woun luma houn wagüchagu.8Dan le lídinbei Hakobu hau ladügawagun Ehiptun, aba híchugun Ehiptuna lidere dan houn, aba hayahun wagüchagu lun Wabureme, aba lóunahani Wabungiute Moisesi luma Aarón, aba hasagaruniña wagüchagu ñéingiñe, aba híchuguniña lidoun fulasu le.9Gama lumoun hagía, aba habulieidagun luéi Wabureme le Wabungiute, aba líchuguniña lábugiñoun lubafu Sísara le hábuti lisudaranigu Habín le lurúeite Asoru, luma labun habafu Filistéana luma lurúeite Moabü, ha ageindagubaña kóntüra hagía.10Gama lumoun lárigiñe aba hadariragun houngua luagu afigouhaaña lan ligibugiñe Wabureme, lau hígiruni Wabungiute lun háhuduragun houn ámuñegueinarügü liyawa Baali luma Asütárüte, aba hamuriahan luma Wabungiute lun lesefuruniña lábugiñegiñe habafu háganiñu, adügeina daradu luma luagu lúnrügü lan háhuduragua.11—Ábati lóunahani Wabureme Herubaali, Barakü, Hefüté luma Samueli lun hesefurunün lábugiñegiñe habafu háganiñu, ítara liña habagaridun darangilañu.12Gama lumoun huguya, dan le harihinbei luagu lageindagua lan Naasü le urúei Amonna huma, aba hamuriahan urúei numa lun ladundehanün, ani Aburemei le Wabungiute ligía hurúeitebei.13Gama lumoun anihán urúei le hanúadirubei. Rula Wabureme urúei le hamuriahabei hun.14Guentó, lunti wíchugun uéiriguni lun Wabureme, wáhuduragun lun, woudin lau le lubeibei madüraagunga waméi lilurudun, lun wabagaridun keisi lugundan Wabureme dandu wagía kei warúeite, ítara luba buidu lan lidin woun.15Lugundun ánhawa midin lau le lubeibei, lun wamaharun lun lugumadin, labeichubadiwa lau sun warúeite.16—Mánhingicha wamá lubeiti le ñéingiñe wabéi, ábame warihini óunwenbu katei le lunbei ladügüni Wabureme wagibugiñe.17Máhuyunti lubeigia huya guentó, ladüga lidaani lan alubahani adian? Namuriaháti luma Wabureme, ábame lóunahan wayuhuru luma huya, subudi humaamugei luagu wuriba lan le hadügübei amuriaha urúei.18Ábati lamuriahan Samueli luma Wabureme lidan oura ligía, aba lóunahan Wabureme wayuhuru luma huya; ábati hanufudedun lílana fulasu saragu luéi Wabureme luma luéi Samueli.19Ligíati hariñagunbei sun hagía lun Samueli:
—Bafurieida wawagu lun Wabureme le Bubungiute hawagu bubueingu ha, móunwegun wamaamuga, ladüga gánwoungüda wamaali wafigoun lau wamuriahan aban urúei.20Lariñaga Samueli houn:
—Manufudeda humá. Inarüni luagu wuriba lan le hadügübei; gama lumoun guentó, madireira humá luéi Wabureme, huduguarügü humá lun tau sun hanigi.21Mafalara humá búngiugu ha mama Bungiu, ha siñabei hídehan ni hasalbahan lugundun mama hamá Bungiu.22Luagu liri Wabureme, mígirun lubadün, lugundun busenti lun lánigu humá.23Ánheinti au, mafigouhanbadina ígirei nayumuragun huagu, nayumuraguba huagu súnwandan. Narufudahaba hun lun háyeihan aban igaburi buiti, le úaraguati.24Le lunbei hadügüni lun inebe lan Wabureme hun, hudugua huguyame lun lau sun hinarün, tau sun hanigi, luagu sun le adüga láalibei huagu.25Gama lumoun anhein ítarameme huba lubéi adügei le wuribabei, hagünrinchawaguba dandu huguya kei hurúeite.
Bible Society of Honduras