1 Urúeigu2
Lagumuhóun Burí gumadi lariñagun Dawidi
1Kei ayarafadeinaali lubéi lounwen Dawidi, aba lariñagun lun Salomón le liráü:2—Au, nadügaali lagumuhóun wéiyaasu kei sun gürigia. Ganigibá, óuseraba kei aban wügüri.3Gúnfulibei lugumadin Aburemei le Bubungiute, lau badügüni lugundan, lau bagunfuliruni lilurudun luma lugumadin, keisi labürüdǘn lidan lilurudun Moisesi lun buidu lan lidin bun lidan sun le badüga luma sun le ñein lumuti bidin.4Lun giñe lachoururuni Aburemei füramasei le buga ladügübei nun, luagu anhein la buidu hóuserun nirahüñü ligibugiñe tau sun hanigi luma tau sun hawani, súnwandan lan ábanba lan hádangiñe niduheñu arúeiha Ísüraeli.5—Guentoti subudi baali lubeigia le ladügübei Hoabü le liráü Seruiá nun, lau láfaraguniña bián hani nisudaranigu heneraaligu, Ábünerü le liráü Nerü, luma Amasá le liráü Héterü ha láfaragubaña bóugudi luéi lidaani wuribu lun lafayeiragüdüniña luagu háfarahan wuriburugu, lun auba lan eredera lau duru luagu áfarahani ligía.6Subudi bumuti le lunbei badügüni. Mígirabei lubeiti lun lounwen lau aban óunweni darangiluti.7Ánhañati lirahüñü Bárüsilai le lílana Galaadü, óuserabaña lau areini, hou hamá buma luagu bidabulan, lugundun seriwitiña meha nun dan le nanurahan luéi bíbiri Abüsalón.8Anihein giñe Simí le liráü Gerá le lídangiñebei lani Benhamín türibu, le Baurimüna, buma. Ligía meha íñaragubalina dan le nídiña lan uburugun Manaímü. Gama lumoun lárigiñe lira, ñǘbuinti eresibirana lidan lidunari Hordán, mósuti buga náfiñurun lun luagu liri Aburemei máfarun nubéi lan.9Ualá ferudunabani. Chuti bau, ani basubudirubei kaba lan badüga lau. Gama lumoun houchabá lun hanarime lan lounwen.Lounwen Dawidi
10Aba lounwen Dawidi, aba labunún hama lagüchagu luburuguterugu Dawidi.11Bián-weinñein irumu lau arúeiha Ísüraeli. Sedü irumu Ebürón, darandi ǘrüwa irumu Herusalén.12Lárigiñe aba larúeihan Salomón leweñegua Dawidi le lúguchi, ani deregüdaguáti larúeihan.Lagumuchagun Adoníasi hama ha afalarubalin
13Aba lidin Adoníasi le tiráü Agitü arihoun Betüsawé to lúguchu Salomón. Aba tálügüdüni:—Lau san buidu biabin?
—Anha —liña lóunabunu.14Lariñagaya:
—Anihein somu katei lun nariñaguni bun.
Tariñaga lun:
—Ariñagabéi.15Lariñaga Adoníasi tun:
—Subudi bumuti lubeigia luagu nun lan yebe yu lan arúeihani, ani aguraba lan yebe sun Ísüraeli lun auba lan urúei. Gama lumoun aba lichugún irichaü lun arúeihani lun Salomón le níbiri lugundun ítara liña lan laranseruni Aburemei.16Guentoti, busentina namuriahan aban fulesei buma. Mamaharabá badügüni nun.
—Badimureha —liña tóunabuni.17Lariñaga tun:
—Ayumuraguatina bun lun bamuriahan luma urúei Salomón lun líchugunu Abiságü to Sunemüna nun lun númarime. Masigenerun lubéi bun.18—Anha, nadimurehaba buagu lun urúei —liña tóunabun Betüsawé.19Aba lubeiti tidin Betüsawé adimureha luma urúei Salomón luagu lufulesein Adoníasi. Aba lásaarun urúei lun leresibirunu lúguchu, aba labuluchagun tigibugiñe. Lárigiñe ábaya lañuurun lárigoun luagu lálana larúeihan, aba lariñagun lun lanügǘn aban haláü tun lúguchu; ábati tañuurun luéigiñe lóunwenren,20aba tariñagun lun:
—Busentina namuriahan murusun fulesei buma. Bégitina bun lun masigenerun bani nun.
—Aba lóunabunu:
—Amuriahabéi le babusenrun núguchu, masigenerun nubéi bun.21—Ígiraba lun tichugún Abiságü to Sunemüna lun Adoníasi lúmarime —tiña lun.22—Kámegia bamuriahóun Abiságü to Sunemüna lun Adoníasi? —Liña lóunabunu urúei lúguchu. Lúnrügaali giñe bamuriahan numa lun nederegeruni arúeihani lun ladüga níbugaña lan, luma ladüga lúmagiñeñanu lan fádiri Abiatárü luma Hoabü le liráü Seruiá!23Lárigiñe lariñaguni le, aba láfiñurun urúei Salomón luagu Aburemei:
—Béilana Aburemei lau lihürü lúhabu, anhein mafarún Adoníasi luéigiñe katei le lariñagubei.24Fiñutina luagu Aburemei le íchugubalina luagu haláü lánina arúeihani le lala Dawidi le núguchi adüga ligía lun harúeihan niduheñu, luagu lóunweba lan Adoníasi uguñe!25Lárigiñe aba líchugun dimurei lun Benaíasi le liráü Hoyadá lun láfaruni Adoníasi hilagubei; aba lidin, aba láfaruni.26Aba lariñagun urúei lun fádiri Abiatárü:
—Beiba Anatótu, lidoun bumúan! Yuuti lun bafarún, gama lumoun máfarun nubadibu ladüga anaaha baaru lubagüsin Aburemei ligibugiñe núguchi Dawidi, ani súfurihadibu úara luma.27Ítara liña lagidaruni Salomón Abiatárü lídangiñe afadirihani lun Aburemei, aba lagunfuliruni le meha lariñagubei Aburemei Silá hawagu liduheñu Elí.28Lúmagiñeñein yebe Adoníasi Hoabü, gama lumoun mídinti meha lúmagiñe Abüsalón; dan lubeiti laganbuni Hoabü uganu, aba léibaagun lisanduariunrugun Aburemei aba laramudagun lidan latarü.29Aba lariñawagún lun Salomón luagu anihein lan Hoabü aramudagua lisanduariunrugu Aburemei ani latarürugu lan laramudagua. Ábati lóunahani Salomón Benaíasi le liráü Hoyadá áfarei,30aba lidin Benaíasi Sanduariurugu, aba lariñagun lun Hoabü:
—Rúhali urúei lúrudu lun báfuridun.
Lariñaga Hoabü lun:
—Uá! Yaaba nounwe!
Aba lidin Benaíasi ariñagei le lariñagubei Hoabü lun urúei.31Ábati lóunabun urúei:
—Ru waméi lugundan lun. Áfarabei ábame bábununi, darú báamugei lidurun láfarahan Hoabü lúbiñegiñe núguchi luma nuéi.32Lábürügüdübei Aburemei lidurun lounwen guánarügü luagun, lugundun miraguati Hoabü bián wügüriña buítiña sügǘ lau ibidiñoun lun núguchi: Ábünerü, le liráü Nerü, hábuti súdaragu Ísüraelina, luma Amasá, le liráü Héterü, hábuti súdaragu Hudá.33Lábürühaba lidurun hóunwegun luagun Hoabü luma hawagun ladügawagun súnwandan. Anhein lidarangilan Aburemei súnwandan lúmabei lan Dawidi luma hama ladügawagun ha arúeihatiña lárigiñe luma lálana arúeihani.34Ábati lidin Benaíasi áfarei Hoabü. Aba labunún Hoabü lúbiñe lidan fulasu mageirawati.35Lárigiñe aba líchuguni urúei Benaíasi hábutime súdaragu leweñegua Hoabü, rulei fádiri Sadoku leweñegua Abiatárü.36Lárigiñe aba lóunahan luagu Simí, aba lariñagun lun:
—Bunaguabá aban buban Herusalén lun baganóun ñein. Gama lumoun máfuridaba ñéingiñe lun bidin lidoun amu fulasu,37lugundun weyu báfuridun lun bánhiñuraguni liraüraü duna Sedurón, chourubéi luagu bóunweba lan, ani bídangiñetime.38Aba lóunabuni Simí urúei:
—Nadügübei le hariñagubei.
Lüti Simí aganawa Herusalén.39Gama lumoun ǘrüwa irumu lárigiñe, aba hanurun bián lidamun, aba houdin aganawa luma Akisü le liráü Maaká, le lurúeite Gatü. Dan laganbunbei Simí luagu añahein lan bián lidamun hagía Gatü,40aba lásaarun aba líchugun sádili luagu lilügün burigü aba lidin Gatü, le ñein lubéi Akisü, áluahaña lidamun. Dan lagiribuduña lubéi Simí Gátügiñe hau lidamun,41aba lasubudiruni Salomón luagu furí lan Simí Herusaléngiñe lun lidin Gatü, luagu anite lan agiribuda.42Ábati lóunahan urúei luagu Simí, aba lariñagun lun:
—Ma fiñugüda numutibu luagu Aburemei ani wéridinabu luagu weyu lanme báfuridun Herusaléngiñe lun bidin lidoun amu fulasu, chouru lan luagu bóunweba lan? Ma funagia bariñahare nun luagu buidu lan, ani badügübei lan le nubeibei?43Kagia uagu magunfulirun bubalin báfiñurun lun Aburemei, madügünbei le nubeibei?44Subudi bumuti wuribati le buga badügübei lun Dawidi le núguchi. Ligía ladügünbei Aburemei lun lagarabaagun wuribati le buga badügübei buagun.45Gama lumoun labinirúba urúei Salomón, ani deregüdagu luba haláü le lánina larúeihan Dawidi ligibugiñe Aburemei súnwandan.46Lárigiñe aba líchugun urúei dimurei lun Benaíasi le liráü Hoyadá, aba lidin áfarei Simí. Ítara liña lederaagüdün arúeihani lúhaburugu Salomón.
Bible Society of Honduras