1 Urúeigu16
1Ábati ladimurehan Aburemei luma Heú, le liráü Ananí lun lariñagun lun Baasá:2«Múarugugiñe nabudabu, aba níchugunibu lábutime Ísüraeli. Gama lumoun kei ladüga Heroboamü, afigougüda baali Ísüraeli. Gáñigüda báadina lau bifigoun.3Nagumucha lubeiti bau luma hau biduheñu, kei nadüga houn liduheñu Heroboamü le liráü Nabatü.4Furumiñeguarügü biduhe óunweti uburugu, héigibei ounli; le óunweti áraabu, héigibei dunuru áraabuna».5Le líbiri asusereduti luáguti Baasá luma burí katei le ladügübei, anihein bürüwañu tidan liliburuna asusereduti hawaguti lurúeitegu Ísüraeli.6Aba lounwen Baasá, aba hábununi uburugu Tirüsá. Aba larúeihan Elá le liráü leweñegua.7Siadi lumuti Aburemei Baasá hau sun liduheñu liyumulugugiñe profeta Heú, le liráü Ananí, lugundun mabuidunti buga lóuserun ligibugiñe Bungiu. Gáñigüda lumuti Baasá Bungiu, lugundun ítara liña lóuserun kei lóuserun Heroboamü hau sun liduheñu, ha lagünrinchagubaña Bungiu.
Larúeihan Elá luma Simürí Ísüraeli
8Lidan irumu wein-sisi lárigiñe larúeihan Asá Hudá, ligía lagumeserun Elá le liráü Baasá arúeiha luagu Ísüraeli uburugu Tirüsá, aba larúeihan luagu bián irumu,9gama lumoun aba leledegun Simürí lubá, aban lani úfisi le arihubei tau karü to lánina wuribu. Luagu aban weyu dan le uburuguñein lubéi Tirüsá Elá, aba látagun darí labacharuadun lúbiñe Arüsá le hábuti nadagimeintiña lun.10Sódini aba lachülürün Simürí, aba láfaruni, lun larúeihan leweñegua, lidan wein-sédühali irumu lau larúeihan Asá Hudá lasusereda katei le.11Kei lagumeserun Simürí arúeiha, aba láfaraguniña liduheñu Baasá, mígirunti ni aban wügüri le liduhe o lumada le gayaraati lafayeiragüdün luagu lounwen.12Aba lubeiti láfaraguniña Simürí sun liduheñu Baasá, kei buga lasiadiruni Aburemei Baasá liyumulugugiñe Heú le profeta,13ladüga sun lifigoun Baasá luma lifigoun Elá, le liráü, ligiaméme figóu le aubei hafigougüdei Ísüraeli, agañidagüdei Aburemei le Lubungiute Ísüraeli lau háhuduragun houn guáriua.14Le líbiri asusereduti luáguti Elá luma sun katei le ladügübei, anihein bürüwañu tidan liliburuna asusereduti hawaguti lurúeitegu Ísüraeli.15Lidan irumu wein-sedü lau larúeihan Asá Hudá, dan le aranseñu haña lan súdara Ísüraelina lun hábürühan luagun luburugute Filistéa le Gibetón, ligía lagumeserun Simürí arúeiha Tirüsá. Gama lumoun sédürügüñein weyu larúeihan,16lugundun weyuméme ligía le haganbunbei súdaragu ha tídanbaña kianpu-agei luagu iñuragua lan Simürí lungua luagun urúei, ani áfarala lan, sun ha tídanbaña kianpu-agei aba híchuguni Omurí le hábuti súdara lurúeiteme Ísüraeli.17Ábati mageindagunhali lan Omurí hau sun súdaragu Ísüraelina hama lílana Gibetón, aba hábürühan luagun Tirüsá.18Dan larihin Simürí luagu ragüwa lan uburugu, aba lebelurun tidoun palasiu, aba lágudunu laugua, ítara liña lounwen.19Lasuseredunbei ítara, ladüga figóu burí le ladügübei, luma luriban lóuserun ligibugiñe Bungiu, lugundun adüga lumuti figóu lememe burí ladügübei Heroboamü, figóu le giñe aubei lafigougüdaña Ísüraelina.20Le líbiri asusereduti luáguti Simürí luma luáguti leledegun lubá urúei Elá, anihein bürüwañu tidan liliburuna asusereduti hawaguti lurúeitegu Ísüraeli.Larúeihan Omurí Ísüraeli
21Ábati hafanreinragun lílana Ísüraeli lidan biama, híbiri lúmagiñe Tibüní le liráü Ginatü, lun ligíaba lan urúei, híbiri lúmagiñe Omurí.22Lagumuhóun dan, héretiña lánigu Omurí hawéi lánigu Tibüní. Aba lounwen Tibüní, aba larúeihan Omurí.23Lidan irumu darandi-aban lau larúeihan Asá Hudá, ligía lagumeserun Omurí arúeiha Ísüraeli, arúeihati luagu duusu irumu, arúeihati sisi irumu lídangiñe duusu irumu ligía Tirüsá.24Aba lagañeihani luwübüri Samaria lúmagiñe Sémerü luagu san-bián-wein-seingü líburu pülata, aba lábunagun aban uburugu baríeiruati ñein aba líchugun Samaria luagu fulasu ligía, lugundun Sémerü lan meha líribei labureme wübü ligía.25Mabuidunti lóuserun Omurí ligibugiñe Bungiu, wuribatimati sügǘ hau urúeigu ha lubaabaña,26adaagua lumuti libe figóu le meha ladaagubei Nabatü, le aubei lafigougüdaña giñe Ísüraelina, agañidagüdei Aburemei lau háhuduragun houn guáriua.27Le líbiri asusereduti luáguti Omurí luma sun katei le ladügübei, anihein tidan líburu to lauboun asusereduti hawaguti lurúeitegu Ísüraeli.28Aba lounwen, aba hábununi Samaria. Aba larúeihan Aabü le liráü leweñegua.Larúeihan Aabü Ísüraeli
29Lidan irumu darandi-widü lárigiñe lagumeserun Asá arúeiha Hudá, ligía lagumeserun Aabü le liráü Omurí arúeiha Ísüraeli. Arúeihati wein-biama irumu lidan Ísüraeli uburugu Samaria.30Gama lumoun mabuidunti lóuserun ligibugiñe Bungiu, wuribatimati sügǘ hau urúeigu ha lubaabaña,31adüga lumuti figouméme le buga ladügübei Heroboamü le liráü Nabatü. Bóugudin luéi lira aba lamarieidun tuma Hesawéli, to liráü Etü-baali, le lurúeite Sidón, darí láhuduragun lun Baali,32aba ladügün aban latarü lun Baali uburugu Samaria.33Adügati giñe aban liyawa Asera, le aubei lagañidagüdei Aburemei le Lubungiute Ísüraeli sügǘ hau sun lurúeitegu Ísüraeli ha lubaabaña.34Lidan lidaani Aabü, aba lararamagüdüniya Iyeli, le Betelina uburugu Herikó. Luagu Abirámü, le liráü le íbugañaü líchigei iderebugu, luagu Segubu le amuleñein líchigei bena, kei buga lariñaguni Aburemei liyumulugugiñe Hosué le liráü Nun.Bible Society of Honduras