1 Urúeigu10
Tidin lurúeite Sabá ebeluha lumoun Salomón
1Aba taganbun lurúeite Sabá ladimurehoun luagu luagu Salomón lun luéirigun Bungiu, aba tidin Herusalén lun tóuchaguni lau burí álügüdahani le hénrenguti. Aba tachülürün lau saragu wendei, hau kameyu barüina ibiñein, luma saragu golu luma dübü burí gebegiti. Dan tachülürünbei ligibugiñe Salomón, aba tálügüdüni luagu sun le taritagubei,3aba lóunabuni Salomón sun le uágubei tálügüdaha. Úati ni kata uáguti tálügüdei lun ibidiñe lan lóunabagüle lun.4Dan tarihini lurúeite Sabá lichú lau Salomón tuma palasiu to ladügüboun,5éigini le luágubei lidabulan, fulasu le ñein habéi lani úfisigu, hadaüragun lumusuniña, lani eseriwihatiña uniñein, luma burí adagaragüdüni gudawarügüti le ladagaragüdübei ténpulurugu, aba taweiridun tanigi,6aba tariñagun lun urúei:—Inarüni le naganbubei buagu nageira;7gama lumoun nafiñerunbei, ladüga ariha naali lan lau nagu. Lidan liricha katei, mariñawagúnti ni lamidan nun, lugundun wéiritimati lichú bau, gíbetima búmati sügǘ lau le uágubei naganba.8Mosu weiri lan hagundan búmarigu, óunwenbu funa giñe hagundan ha eseriwidubaña bun, luagu bubaduñanu lan súnwandan, aganbahei lichú lau bererun!9Biniwalá Aburemei le Bubungiute luagu lubuidun larihin buagun, aba lederegeruni arúeihani Ísüraeli bun! Luagu ínsiñehabuni le luágubei Aburemei lun Ísüraeli súnwandan, ru laadibu urúeime lun bagumadihan lau irichaü luma úarani!10Aba tederegerun widü-milu-sedü-san-duusu líburu golu luma saragu ibiñein luma burí dübü gebegiti lun urúei. Machülüti ibiñein gíbeti ítara ni aban wéiyaasu Ísüraeli kei le tedewehabei lurúeite Sabá lun urúei Salomón.11Bóugudin luéi lira, waporu buga to anügüboun golu Ofirügiñe, barütu giñe saragu fulansu luma burí dübü gebegiti.12Lau fulansu ligía, aba ladügün urúei baranda tuagu ténpulu luma tuagu palasiu, adügati giñe gidara tuma árüpa houn áfarutiña. Marihíngili saragu fulansu sándalu ítara fadá lumoun dan le.13Ru lumuti giñe urúei Salomón sun le tamuriahabei lurúeite Sabá luma tun, bóugudin luéi le ledewehabei tun. Lárigiñe aba tagiribudun tageiroun úara hama tánigu ha ñǘbuinbaña tuma.
Laganbahoun luagu Salomón luma lirisin
14Golu le leresibirubei Salomón sagü irumu, kei burí bián-wein-widü-milu-gádürü-san líburu,15bóugudin luéi seinsu le hafayeihabei agañeihatiña hama alugurahatiña lun, hama sun lurúeitegu Arawia hama gumadan burí ha fulasurugubaña.16Aba ladügadün Salomón bián-san idaüdinaü wéinamuti lauti golu le badiwati. Tareisi líburu golu luagu kada aban.17Adügagüdati giñe ǘrüwa-san idaüdinaü ñǘbüritimati, lóugiñeraü bián líburu golu badiwati luagu kada aban, aba líchuguni tidan palasiu to gíriboun «Dabíara Líwanuna».18Adügagüdati giñe aban lala urúei lauti marüfíli aba lafuraragüdüni lau golu le tímatimaati.19Sísiñein esütépu luagu lala urúei ligía, ani róunuti íñugiñe libiti labalachagüle, ñeinñein lebu arünaü luagu biángubei louba, hau bián liñún rara lubadu.20Ñéinñanu giñe duusu liñún rara, aban luéigiñe kada louba esütépu. Madügǘnñahagili katei libe lira lidan ni aban arúeihani!21Bóugudin luéi lira, golu sun luerun urúei, luma sun ílagu le tídanbei palasiu to gíriboun «Dabíara Líwanuna». Úati ni kata lauti pülata, ladüga mebegigili meha pülata lidaaniwagu Salomón.22Lugune burí urúei waporu to Tárüsisina, aban wéiyaasu sagü ǘrüwa irumu tiabin úara tuma burí lugune Iramü barüina golu, pülata, marüfíli, babunu hama figaga.23Wéiriguti meha urúei Salomón hawéi híbiri urúeigu lidan irisini luma lidan lichú aau.24Sun gürigia busentiña harihini lun haganbuni lichú au le líchugubei Aburemei lun,25sagü irumu hanügün edewehani lun: Katei le lauti burí pülata luma golu, daüguaü, áruma, katei hémeti gabayu hama mile.Lagañeihan Salomón karü hama gabayu
26Aba lóundarun Salomón saragu karü hama awarihatiña gabayu. Ñeinñoun milu-gádürü-san karü luma, habu duusu-milu agalufehatiña, aba líchuguniña le ñein tubéi burí karü to lánina wuribu luma houn óunigirutiña urúei uburugu Herusalén.27Adügati urúei lun ñein lan saragu pülata kei dübü, luma lun ñein lan saragu hibúari kei tídibu igu áraabuna lidan fulasu mawübüriti.28Uburugugiñe Músuri hanügǘwa gabayu lun Salomón luma Silisiagiñe, ladüga ñeinha hagañeihaña lánigu urúei Salomón.29Aban meha karü Ehiptugiñetu, sisi-san murusun pülata tebegibei, aban gabayu, san-dimí. Sunti urúeigu ha Étüna hama Síriana hámaha lánigu Salomón hóunaha agañeiha.Bible Society of Honduras