1 Krónikasi26
Óunigirutiña bena ténpulurugu
1Dan lafanreinhóunbei lidaani eseriwiduni hadan óunigirutiña bena, ítara liña ligaburi herederun:Hádangiñe ladügawagun Koré, Meselemíasi le liráü Koré, le liráü Ebiasáfü.2Lirahüñü Meselemíasi: Sakaríasi le íbugañaü, Hediaeli le habiaman; Sewadíasi háürüwan; Hatüniéli hagadürün;3Elamü haseingün; Hoanán hasisin, Elioenái hasedün.4Lirahüñü Owedi-edomu: Semaíasi furumiñeti; Hosabádü habiaman; Hoá háürüwan; Sakarü hagadürün; Natanaéli haseingün;5Amieli hasisin; Isakárü hasedün; Peulutái hawidün. Lugundun biní lumuti Bungiu Owedi-edomu lau líchugun saragu isaanigu lun.6Garahüñüti meha Semaíasi bián wügüriña irahüñü ha agumadihabaña hadan haduheñu lugundun ganigitiña.7Lirahüñü Semaíasi: Otuní, Rafaili, Owedi, Elisabádü, Eliú, Samakíasi, wügüriña ganigitiña súngubei.8Sun ha, ladügawagun Owedi-edomu hama lirahüñü hama líbirigu, sun hagía wügüriña ganigitiña según benefaü le aubei heseriwida. Hadan súngubei, ǘrüwa-wein-biámañanu ladügawagun Owedi-edomu.9Lirahüñü Meselemíasi hama líbirigu: Disiwídüñanu, sun hagía wügüriña ganigitiña.10Lirahüñü Osá, ladügawagun Merarí: Simürí le ábuti, lau sun mama lan ligía íbugañaünbei, aba líchuguni lúguchi ábutime;11Ilükíasi habiaman, Tewalíasi háürüwan; Sakaríasi hagadürün. Lirahüñü Osá hama líbirigu, tareisiñanu hadan súngubei.12Afanreinhóuatiña óunigirutiña bena lidan sétanu. Dandu hagía keisi hábutigu hama hapanaagu, yuuti eseriwiduni ténpulurugu houn.13Adüga hamuti ubunuruni luagu kada bena hadan iduheñu, lidan ubunuruni ñéinñanu dandu íbugañanu kei amulenugu.14Lun Semaíasi latokara bena le luéigiñebei oubaü le ñéingiñe lubéi laboucha weyu, lun Sakaríasi le liráü latokara le luéigiñebei nórute.15Lun Owedi-edomu latokara le luéigiñebei suru, houn lirahüñü latokara lun hóunigirunu rumu to lagei éigini tidan ténpulu.16Lun Supimü luma Osá latokara oubaü le ñeinhin lubéi lálüda weyu, le ñéingiñe lubéi bena Saleketü, luagun lémeri amudeiruni.
Ítara liña ligaburi lafanreinhóun eseriwiduni:17Sagü weyu ñéinñanu sisi óunigirutiña bena luéigiñe oubaü le ñéingiñe lubéi laboucha weyu, gádürü luéigiñe nórute, gádürü luéigiñe suru hama biama lun kada rumu lagei éigini.18Lidan bürürü, luéigiñe oubaü le ñeinhin lubéi lálüda weyu, ñéinñanu gádürü luéigiñe ebeluruni hama biama lun guánarügü bürürü.19Ítara liña ligaburi lafanreinhóun hafisiute óunigirutiña bena ha ladügawagun Koré luma Merarí.
Amu eseriwidutiña ténpulurugu
20Amu Lewitagu arihubaña lau lóunigirun tirisin ténpulu luma lagei idewesei le sagüráubei.21Hádangiñe lirahüñü Ladán, ha ladügawagun Gerüsón luma Heieli,22lirahüñü Heieli, Setamü luma Hoeli ha lamulenu, hagía arihubaña lau tirisin ténpulu.23Hádangiñe ladügawagun Amürámü, Isarü, Ebürón luma Usieli,24Sebueli le ladügawagun Gerüsón luma Moisesi ligíatima arihubei lau tirisin ténpulu.25Ha liduheñu luéigiñe lóubadina Elieserü: Reawíasi le liráü Elieserü; Isaíasi le liráü Reawíasi; Horamü le liráü Isaíasi; Sikürí le liráü Horamü luma Selomitü le liráü Sikürí.26Selomitü hau lamulenu, hagía arihubaña lau burí lagei ílagu sagüráuti le lanúadirubei Dawidi, hábutigu iduheñu hama hábutigu súdaragu lun Bungiu.27Katei le burí hárügüdün wuriburugu ani aba hadireiruni lun layusurún tidan litenpulun Bungiu.28Ñeinñein giñe burí ílagu sagüráuti le lanúadirubei Samueli, Saulu le liráü Kisü, Ábünerü le liráü Nerü luma Hoabü le liráü Seruiá. Sun katei sagüráuti le anuadirúaalibei le, lábugiñeñein laríaahan Selomitü hama lamulenu.29Hádangiñe ladügawagun Isarü, ha arihubaña lau burí katei bóugudi umuti le lani Ísüraeli kei úfisigu luma kei aguseragüdütiña: Kenaníasi hama lirahüñü.30Hádangiñe ladügawagun Ebürón, ha etenirubaña lun haríaahaniña Ísüraelina luéigiñe oubaü le ñéingiñe lubéi lálüda weyu libiti Hordán, dandu lidan burí katei luáguti Bungiu kei lidan leseriwidun lun urúei: Asawíasi hama liduheñu, milu-sedü-san wügüriña ganigitiña.31Lidan irumu bián-wein lidan larúeihan Dawidi, aba lariaahóun tidan líburu to ñein lubéi habürüdǘwa ladügawagun Ebürón, aba ladarirún luagu añahein lan wügüriña ganigitiña hadan uburugu Haserü le Galaadüna. Heríasi, ligía meha hábutibei ladügawagun Ebürón;32bián-míluñanu-sedü-san hábutigu iduheñu, ligía hama liduheñu. Aba líchuguniña urúei Dawidi lun harihin hau türibu ha lani Rubén, ha lani Gadü hama hamidan türibu ha lani Manasési, lun sun katei le luáguti Bungiu o luáguti lan urúei.Bible Society of Honduras