1 Krónikasi23
Hawadigimari Lewitagu
1Dan le wéiyaali Dawidi saragu, aba líchuguni liráü le Salomón lurúeiteme Ísüraeli,2aba lóundaruniña sun ábutigu Ísüraelina, fádirigu hama Lewitagu.3Ábati habahüdǘn Lewitagu ha daranditi irumu hau lun iñun, darandi-widü-míluñanu wügüriña.4Aba híchugun wein-gádürü-milu hádangiñe lun hagíaba la ábutigu lidan tábunawagun ténpulu, sisi-milu lun hagíaba lan úfisigu hama aguseragüdütiña,5gádürü-milu lúniri bena, hámaya gádürü-milu ha lúnbaña háfarun lidan leremuhóun lun Bungiu tau burí tuwuyerigu árüpa luma pülatíyu le ladügagüdübei Dawidi lun katei ligía.6Aba lafanreinhaniña Dawidi lidan sétanu según hibe lirahüñü Lewí: Gerüsón, Keatü luma Merarí.7Lirahüñü Gerüsón: Ladán luma Simí.8Ǘrüwañanu lirahüñü Ladán: Heieli le íbugañaü, Setamü luma Hoeli.9Ǘrüwañanu giñe lirahüñü Simí; Selomitü, Asieli luma Arán. Hagía hábutigubaña iduheñu hádangiñe ladügawagun Ladán.10Gádürüñanu lirahüñü Simí: Háatü, Sisá, Heusu luma Beriá.11Háatü meha íbugañaünbei, Sisá lárigili; gama lumoun kei mibe habéi harahüñü Heusu luma Beriá, lun heseriwidun, aba habahüdǘn kei ábanrügü iduheñu.12Gádürüñanu lirahüñü Keatü: Amürámü, Isarü, Ebürón luma Usieli.13Lirahüñü Amürámü: Aarón luma Moisesi. Aarón lanúadirubei Bungiu lun líchuguni idewesei le sagüráutimabei, lun lágudahan kupali ligibugiñe Bungiu, lun leseriwidun luma lun lariñaguni abiniruni súnwandan, wadagimanu le, yuubei lun Aarón hama lirahüñü súnwandan.14Moisesi, le luwügürin Bungiu, abahüdǘwati giñe hadan lani Lewí türibu hau sun ladügawagun.15Lirahüñü Moisesi: Gerüsón luma Elieserü.16Sebueli, ligía furumiñetibei hadan lirahüñü Gerüsón.17Furumiñeti liráü Elieserü, Reawíasi, ligíarügüñein liráü, gama lumoun gíbetiña lirahüñü Reawíasi.18Furumiñeti liráü Isarü, Selomitü.19Lirahüñü Ebürón: Heraíasi, le furumiñeti; Amaríasi, habiaman; Haasieli, háürüwan; Hekamán, hagadürün.20Lirahüñü Usieli: Mikaíasi, le furumiñeti, Isíasi le habiaman.21Lirahüñü Merarí: Malí luma Musí. Lirahüñü Malí: Eleasárü luma Kisü.22Hilati Eleasárü marahüñüga wügüriña, würiñarügüñanu lirahüñü, aba hamarieidun hama lirahüñü Kisü le hayawürite.23Ǘrüwañanu lirahüñü Musí: Malí, Éderü luma Herimótu.24Hagía ha ladügawagunbaña Lewí según haduheñu ha bürüwañubaña keisi hábutigu haduheñu ha weinti irumu hau lun iñun, ha gafisiutebaña ténpulurugu.25Ariñagaali meha Dawidi:—Rúhali Aburemei le Lubungiute Ísüraeli darangilaü houn lumutuniña, rulei Herusalén lun ligíaba lan hábiñe lun sun dan.26Ligía moun laali lubéi hanaahanu Lewitagu lani Bungiu kianpu ni burí katei le ayusurúbei tidan lun kultu.27Aba lubeiti habahüdǘn ladügawagun Lewí keisi lagumuhóun laritagun Dawidi ha weinti irumu hau lun iñun,28aba herederun lábugiñe hagumadin fádirigu ha ladügawagun Aarón, lun heseriwidun ténpulurugu, lun harihin lau bürürü, tau burí rumu luma lau larumadun burí ílagu sagüráuti, luma burí líbiri fisiu ténpulurugu.29Hagía arihubaña tau fein sagüráutu to ichugúboun aban tárigi aban, tau fulúaru to luntu idewesei fulúaruautu, tau furidasi to tautu fein maganatu lébini, lau burí idewesei le furidu, tau masa luma sun ihürü luma amisuraagülei.30Gasu giñe ñéinbaña lan ténpulurugu sagü binaafin luma rábounweyu lun heteingiruni Bungiu luma lun heremuhan lun,31luma dan le lichugúniwa sun adagaragüdüni le gudawarügüti lun Bungiu lidan luéyuri emeraaguni, lidan fedu lánina iseri hati luma lidan burí fedu le buíduburiti, eseriwida lun Bungiu súnwandan, según ha iridútiña.32Hagía giñe óunigirubarun kianpu lánina óundaruni luma Bungiu tuma sanduariu, eseriwida ténpulurugu hama hábirigu ha ladügawagun Aarón.
Bible Society of Honduras