1 Krónikasi15
Lanügünu Dawidi lubagüsin Aburemei Herusaléun
1Aba lábunaguagüdün Dawidi muna burí lungua lidan uburugu le gíribei Dawidi, aranse ligía aban ubaraü tun lubagüsin Aburemei tidan aban kianpu to lararamagüdüboun.2Ábati lariñagun:—Ua hamá amu lun hanaahanu lubagüsin Aburemei haweidigia Lewitagu, lugundun anúadira laaña Aburemei lun hanaahanu lubagüsina daradu luma lun heseriwidun lun súnwandan.3Lárigiñe aba lóundaruniña sun Ísüraelina uburugu Herusalén lun hanügünu lubagüsin Aburemei lidoun fulasu le laranserubei tubá.4Óundara lumutiña giñe ladügawagun Aarón hama Lewitagu.5Hádangiñe ladügawagun Keatü, óundaraguatiña san-wein: Urieli, le ábuti hama liduheñu.6Hádangiñe ladügawagun Merarí, bián-san-wein: Asaíasi le ábuti hama liduheñu.7Hádangiñe ladügawagun Gerüsón, san-darandi: Hoeli le ábuti hama liduheñu.8Hádangiñe ladügawagun Elisafán, bián-san: Semaíasi le ábuti hama liduheñu.9Hádangiñe ladügawagun Ebürón, gádürü-wein: Elieli le ábuti hama liduheñu.10Hádangiñe ladügawagun Usieli, san-duusu: Aminadábü le ábuti hama liduheñu.11Lárigiñe aba lagúarun Dawidi lun Sadoku luma Abiatárü ha fádirigu, lun Urieli, Asaíasi, Hoeli, Elieli luma Aminadábü ha Lewitagu,12lariñaga houn:
—Huguya le hábutigubei haduheñu Lewitagu, harumaguagüda humá hungua según igaburi huguya hau sun hiduheñu, lun gayaraabei lan hanügünu lubagüsin Aburemei, le Lubungiute Ísüraeli lidoun fulasu le naranserubei tubá;13lugundun kei madügün hubalin lidan furumiñeti wéiyaasu, aba lagidaruni Aburemei le Wabungiute habagari fiu wádangiñe, lugundun málügüdahan wamá luma lidan lubudubu.14Ábati harumadaguagüdün fádirigu hama Lewitagu houngua keisi igaburi lun gayara lan hanügünu lubagüsin Aburemei le Lubungiute Ísüraeli.15Aba hanügünu ligibuagu bián wewe hégewagu, kei meha ligaburi lariñagagüdüni Aburemei lun Moisesi.16Ariñagati giñe Dawidi houn hábutigu Lewitagu lun híchugun eremuhatiña ha áfarutiña sun tuwuyeri árüpa luma pülatíyu hádangiñe hani türibu, lun eremuheina hamá áfareina hagíame, lun harufuduni hagundan.17Aba híriduni Lewitagu Emán, le liráü Hoeli, luma giñe Asafü, le liráü Berekíasi le liduhe Emán; hádangiñe ladügawagun Merarí, hama haduheñu ha furumiñebaña, lun Etán, liráü Kusaíasi;18iridúatiña giñe ámuya haduheñu ha furumiñebaña ha lánina libiaman gumadi hani eseriwidutiña: Sakaríasi, Haasieli, Semiramótu, Heieli, Uní, Eliabü, Benaíasi, Maseíasi, Matatíasi, Elifeléu, Meküneíasi, luma Owedi-edomu labu Heieli, ha óunigirubaña bénabu.19Emán, Asafü luma Etán ha eremuhabaña, hagía etenirubaña lun háfaruni pülatíyu le lauti buronse.20Sakaríasi, Asieli, Semiramótu, Heieli, Uní, Eliabü, Maseíasi luma Benaíasi, hagía áfarubaña sun tuwuyerigu árüpa kei háfarun ladügawagun Elamü.21Ánheinti Matatíasi, Elifeléu, Meküneíasi, Owedi-edomu, Heieli luma Asasíasi, hagía áfarubaña árüpa kei ladügawagun Semü, agumeserei uremu.22Kenaníasi, le hábuti Lewitagu, ligía arihubei lau uremu ladüga geremuhaditi wügüri ligía.23Berekíasi luma Elikaná, hagía óunigirubarun bágüsi.24Sewaníasi, Hosafátü, Natanaéli, Amasái, Sakaríasi, Benaíasi luma Elieserü ha fádirigu, hagía íñaahabarun fidu tigibugiñe lubagüsin Aburemei. Túniri giñe bágüsi Owedi-edomu luma Heiasi.25Ábati lidin Dawidi, ábutigu Ísüraelina hama hábutigu súdaragu lau ugundani anügoun lubagüsina lidaradun Aburemei lúbiñegiñe Owedi-edomu.26Keiti íderagua lániña Aburemei Lewitagu ha anaahabarun bágüsi, aba háfarun sedü bágasu ñǘbürigiña hama sedü harahüñü mudún.27Aban tidáü daüguaü to tautu linu fínutu luáguboun Dawidi, ítara giñe hadaüragun sun Lewitagu ha anügübarun bágüsi, eremuhatiña, luma Kenaníasi le abugurubalin uremu; ñeinñoun giñe aban Tidáü Dúnigu to tautu linu luagu Dawidi.28Ítara liña hanügünu sun Ísüraelina lubagüsina lidaradun Aburemei, agúaraheina, eremuheina, luma áfareina lau ugundani.29Dan tachülürünbei lubagüsina lidaradun Aburemei luburuguterugun Dawidi, aba taganaridun Mikali, to liráü Saulu funederarugugiñe; dan tarihinbalin Dawidi abinaha lau ugundani, aba liyereegudun tun.
Bible Society of Honduras