1 Krónikasi13
Lasaminarun Dawidi lanügünu bágüsi lun Herusaléun
1Fiu dan lárigiñe aba lálügüdagun Dawidi lungua hama sun ábutigu,2lárigiñe aba lariñagun houn sun lílana Ísüraeli:—Anhein mariban lubéi larihín hun, anhein busén Wabureme le Wabungiute, óunaha wamá awisaraña wapaisanun ha añaheinguabaña lidan líbiri fulasu Ísüraeli, hama giñe fádirigu hama Lewitagu ha haburuguterugubaña luma lidan múa le ñein lubéi hameiliha animaalugu, amisurahaña lun hóundarun wamoun.3Lun wanügünu lubagüsin Wabungiute, lugundun bulíeiguaadiwa tuéi lúmagiñe lidaani Saulu.4Aba hánharun sun lílana fulasu lun ladügǘniwa ítara, ani maribanti lábürühan saminaü le houn súngubei.
Lóuchagun Dawidi lanügünu lubagüsin Aburemei
5Aba lóundaruniña Dawidi sun Ísüraelina lúmagiñe Sioru lidan fadaguaü luma Ehiptu darí lubenari Amatü, lun tanügün lubagüsin Aburemei Kiriatü-hearimügiñe lun Herusaléun.6Lárigiñe, hau sun Ísüraelina úara luma, aba houdin Kiriatü-hearimü, lememe Baalá lóubawagu Hudá, lun hanügünu lubagüsin Aburemei ñéingiñe to uáguboun laguarúa liri Wabureme le gámabalin lálana larúeihan hagibuagu kátaña garünatiña.7Aba híchugunu bágüsi tidoun aban kareta iseri, aba hanügünu lúbiñegiñe Aminadábü. Usá luma Ayó hagía abugurubarun kareta.8Sunti dan le, aningirán bugati Dawidi hau sun Ísüraelina eremuheina luma abinaheina lau sun here ligibugiñe Aburemei, áfareina híbiri árüpa, panderu, pülatíyu luma íñaaheina fidu.9Dan hachülürünbei lidan fulasu le asubudirúabei kei léfereegüle Kidón türigu, aba línchuni Usá lúhabu lun lágüdahanu bágüsi ladüga hachugeragun bágasu ha achawahabarun karü.10Gama lumoun aba lagañidun Aburemei luma Usá luéigiñe línchuni lúhabu tuagun bágüsi, aba lagidaruni libagari ñein guánarügü.11Ábati lagañidun Dawidi saragu luéigiñe lagidaruni Aburemei libagari Usá, ligía líchugunbei Péresi-usá lírime fulasu ligía, ligía líribei chülǘ lumoun dan le.12Gama lumoun weyuméme ligía, aba lanufudedun Dawidi saragu ligibugiñe Aburemei aba lagúaragun ariñaga:—Kaba numegen anügoun lubagüsin Aburemei núbiñoun!13Manügǘntu lubeiti bágüsi luburuguterugun Dawidi, aba lariñagun lun tanügün lúbiñoun Owedi-edomu, aban wügüri le uburuguna Gatü.14Rédeitu lubagüsin Bungiu ǘrüwa hati lúbiñe Owedi-edomu. Aba labiniruniña Aburemei liduheñu Owedi-edomu lau sun le lánibei.
Bible Society of Honduras