Loma16
Paulo yana nuwakabubu tubuiyanavo imiyamiya Loma wagaine.
1Tubuiyakuweyavo, nuwanuwaku gana ifufuyemi novuda Fibe faine, banae gaawaveiwakanena. Bana givedikoni toekalesiya imiyamiya melala Senikeliya wagaine ani wagaidiya.2Ada kai Loma wagaine gina yegemo aga wa yami vemwamwala wana vagaulena ke wana itaveyabina, faina bana novumi Kauveya yana yoo wagaideya. Imi yana kaliva tabutabumiyavo faina, gilubodami wanadewa anafaiweya. Kai vavine-nai gavana tamo yana nuwanuwa aga wana lemena, faina mine-nai yana leme lakai-vagaina wagaikuya kaduwe kaliva moyaidi wagaidiya.3Yaku nuwakabubu wana inanana Filisila ke moganedi Akwila nodi wagaidiya, badi Iya nodi avetogugai Yeisu Keliso yana gugai wagaine.4Tova seyana badi adiselu ialamanena kabisona ida gilagi, aku auwe yawaidi iawaegena ke yawaiku ikibababalena. Tainei faina gavesiule lakaina wagaidiya. Ada keke Iyayeku gagana aku kaduwe badi keke meIsileli tovetumaganayavo adiyoo moyaidi ivesiule.5Kaduwe yaku nuwakabubu tovetumagana wagaidiya, gavega ivagavagauta Filisila ke moganedi nodi yadi manuweya.Epinito wana vonena yaku nuwakabubu wagaine. Banae tubuiya aseaseku, kaliva-nai Eisiya anafafali wagaine gimaduvetumagana Keliso wagaine.6Kaduwe yaku nuwakabubu Meli wagaine, banae gifaisewa toyogina faimiya.7Yaku nuwakabubu Adulonaiko ke Yuniyasi adiselu wagaidiya, badi yaku yoo meIsileli, tuwaina Iya badi nodi amiyamiya deliya Yeisu Keliso faine. Kaliva-dina adiselu wa adivemoimoina afositoloyavo matadiya, ada Keliso nodi imadu veseyana aku Iya muliya.8Kaduwe yaku nuwakabubu Amifiliato wagaine, banae Kauveya nodi kaveseyana ada tubuiyaku velemoena.9Ubano banae ide nodi kafaifaisewa Keliso faine, ada kadu tubuiyaku velemoena Sitakisi, badi adiselu yaku nuwakabubu wagaidiya.10Kaduwe yaku nuwakabubu Apelesi wagaine, banae uloulolo ginuwagana Keliso faine aku gitoyogitagonena, e ada wa anaawaveiwaka. Ada badi gavega imiyamiya Alisitobulo yana manuweya, ani yaku nuwakabubu wagaidiya.11Kaduwe yaku nuwakabubu Elodiyoni wagaine, banae yaku yoo meIsileli. Kaduwe yaku nuwakabubu badi gavega Nakiso yana manuweya imiyamiya, biyavo-dina Kauveya ivetumaganena ani wagaidiya.12Kaduwe yaku nuwakabubu Talaifina ke Talaifosa wagaidiya, badi vevine-dina adiselu igugai iwakana Kauveya faine. Ada kaduwe Pelisisi wana vonena yaku nuwakabubu wagaine, banae gifaisewa toyogina Kauveya faine.13Yaku nuwakabubu Lufuso wagaine, banae togugai iwakana Kauveya faine. Ada kaduwe inana badi Iya kaduwe iawavenatuneku, ani yaku nuwakabubu wagaidiya.14Kaduwe yaku nuwakabubu taidei biyavo-dina wagaidiya, Asinikilito, Filigoni, Emesi, Fateloba ke Emasi ada tubuiyadeyavo badi nodi imiyamiya.15Kaduwe yaku nuwakabubu Filologo ke Yuliya wagaidiya, kaduwe Neliusa wa novuna nodi, ke Olimupa, ada Yaubada yana kaliva tabutabudiyavo moyaidi badi nodi imiyamiya.16Taumiyavo nodi wana venuwaga wagaine, wa yami nuwakabubu tubuiyamiyavo wana vesiuleyedi. Keliso anatovetumagana adiyoo tulina tulina yadi nuwakabubu iimilina wagaimiya.
Paulo yana vona anaebalauyabu.
17Aku tubuiyakuweyavo, gaveolemi toyogina ada badi gavega vewala tuli-moena ivevewala ani wagaidiya matami gina faifaila. Biyavo-dina yadi vewala keke ida veaigaigabu Keliso anavaleya iwakana nodi, aku vewala-nai wagaine gavekwavekwageya isisilakaina ada ludaka ikikiveyegemonina. Badi kaliva-dina wana velovogedi.18Faina badi gavega taidei anafaiweya idewadewa ani keke ida faifaisewa yada Kauveya Keliso faine, aku taudiyavo gagana faidiya inuwanuwa. Bona-itudi digadigagidi ke yadi awayafayafa wagaidiya badi gavega nuwadi keke mamalidi ani ifwayanegenegedi.19Aku imiyavo ani moyaidi bademowa valeyami inogalina vaita Keliso wamatawalewaleyena velemoena, e ada gavemwamwala lakaina faimiya. Aku nuwanuwaku wana vetonuwanuwa velemoena e ada dewa iwakadi gagana nuwami gina vaivaina aku dewa koyona faidiya keke wana nuwanuwa.20E ada Yaubada Banae nuwaniwalova giveleveleda ani tova kabisona Seitani yana toyogina ginamadu kivekabekabebena ke wana vagatagotagona.Yada Kauveya Yeisu Keliso yana nuwadogeya gina lemelememi.
Tovetumagana imiyamiya Paulo nodi ani yadi nuwakabubu meLoma wagaidiya.
21Timoti banae Iya nodi afaifaisewa Keliso faine ani yana nuwakabubu wagaimiya, anafaiweya kaduwe Lukiyo, Yeisoni ke Sosifato, badi yaku yoo meIsileli.22Iya Tetiyo leta taidei gavetokilumina Paulo faine, ani yaku nuwakabubu wagaimiya Kauveya anayeganeya.23Kaduwe Gaiyasi yana nuwakabubu wagaimiya, bana yana manuweya Iya gamiyamiya, ada tovetumagana adiyoo bana yana manuweya ivagavagauta ani yadi nuwakabubu wagaimiya. Ada kaduwe Elasito banae kabemali yadi mani anatoitaveyabina ke tubuiyana Kwatasi, badi adiselu yadi nuwakabubu wagaimiya. [24Yada Kauveya Yeisu Keliso yana nuwadogeya wana miyamiya. Ika anafaiweya.]Yaubada anaawadavadava.
25Aku Yaubada kana awadavadavana. Banae-nai anafaiweya yami vetumagana gina kivetoyogina yaku valeya iwakana wagaine. Taidei valeya-nai ani Yeisu Keliso faine gaawaawamogatala. Tuwai-bulubuluna tutuya gavaiyei bademowa kasegedi wagaidiya ada gielai malinai, Yaubada yana nuwanuwa gikiveyabina sewasewavuyena,26aku malinai giawamogatalena. Taidei valeya-nai ani mamalina giyegemona vona-dina wagaidiya falofitayavo ivetokilumina, ada Yaubada miyamiyani-vagaina giveimeya ke yana nuwanuwa sewasewavuyena yana kalivayavo ina awamogatalena kaliva yoo tulina tulina wagaidiya, e ada Yaubada ina vetumaganena ke ina vemoimoinena.27Yaubada Banae anakaibe Tonuwanuwa velemoena ani anayegana kana kilakaina-vagata Banae Yeisu Keliso anayeganeya, keke ginaavai. Ika, anafaiweya.Iyayeku Paulo