Madiu19
Yeisu givewala viyolili faina.
1Aku Yeisu ifufu-dina giluyabu ada Galili gisegena aku gina giluku Yudiya anafafali wagaine. Tainei gufa Yolidani fafaline.2Ada yoo lakaina imuliyena ada wadedeku-deya yadi toveoga gikiveiwakanedi.3Aku Falisiyavo tufodi ielai Yeisu wagaine ke ina galuvaluvana, e ada itolidadanena, ivona, “Gavaiyamu, kai kaliva nuwanuwana vavinena gina viyoliliyedi tamo vuvu gina itanuwagana faina, aga yada veimeya giawaegena o keke?”4Yeisu gilufata, givona, “Kai keke wada veyawa vaita Banae-nai gibubudi ani tuwai-moena ibubuna vaguvagu anatova wagaine-deya ani kaliva ke vavine gibubudi,5ada givona, ‘Taidei faina kaliva inana ke tamana gina miyasegedi aku ginanau ada vavinena nodi ina miyaluga ke adiselu ina vevovo seyana’?6Nagona adiselu imiya tulina tulina ada anaita ani iluwei, aku malinai iveseyana. Taidei faina gavana Yaubada giavina ke givemiyalugedi ani keke tamo gaito gida vemiyadakadi.”7Badi Falisiyavo ivona, “Aku gavana faina Mosese veimeya gisei evona kai kaliva nuwanuwana vavinena gina viyoliliyedi, aga viyolili anamatawa vavinena gina veledi, ayo muliya gina imilidi inanau?”8Yeisu givona, “Imi aseasemi kugadi faina, nuwanuwami taumiyavo yami edaeda wagaine wana gugai. E ada Mosese giawaegemi vavinemiyavo wana viyoliliyedi. Aku tova nagona ibubuna vaguvagu wagaine, Yaubada keke gida awaegemi viyolili faina.9Ada Iya gana vonemi, gavakaliva vavinena gina viyoliliyedi aku vavine evaguna gina nagina, banae giudo. Keke anaawaega ada vavinena gina viyoliliyedi, aku au vuvu seya-moena ani, kai vavinena tauna giawaegena ada mali kaliva nodi iudo. Taidei-mowa wagaine e kaliva yadi nagi gina yawelina.”10Aku Yeisu yana tonogalayavo ivonena, ivona, “Wada vita-moena! Kai kaliva yadi nagi vavinediyavo nodi ani anaveimeya taide anafaiweya, aga kaliva keke idanagi.”11Banae givonaga, “Vona taidei keke vaita kaliva moyaidi adifaiweya ina muliye, aku badi gavega wagaidiya Yaubada veimeya gisena ani adifaiweya ina muliyena.12Faina kaliva yadi vuvu tulina tulina faidiya ada keke inanagi. Tufodi itubuga anafaiweya ada keke inanagi, aku tufodi ani daba ivaina ada keke adifaiweya inanagi. Aku tufodi taudiyavo iawatadi e ada keke inanagi aku Yaubada yana gugai ina gugai faina. Badi gavega adifata vona taidei faina, aga ina muliyena.”Yeisu biyabiyama giawanuwakabubuyedi.
13Kaliva tufodi biyabiyama ialiyedi Yeisu wagaine ada vaita nimana ginasena wagaidiya ke gina veoveola faidiya. Aku tonogalayavo taidei iitana ada iawatadi.14Aku Yeisu givona, “Biyabiyama keke wana awatadi aku wana awaegedi inaelai wagaikuya, faina Yaubada yana ebaveimeya anakalivayavo ani taide biyabiyama-dina anafaiweya.”15Ada nimana gisena biyabiyama wagaidiya ke giawanuwakabubuyedi, e ayo gisegedi aku gitauya ginau.Tokaikaiwabu tubulakaina Yeisu gitolidadanena yawai-vagata faina.
16Tova seyana tubulakata seyana gielai Yeisu wagaine givonaga, “Tovewala, gavana iwakana gada gugai ayo yawai-vagata gada nuwaga?”17Yeisu givona, “Gavana faina Iya utolidadaneku gavana iwakana faine? Yaubada Tauna anakaibe-mowa iwakana. Aku kai nuwanuwa yawai-vagata wagaine unaluku, aga Yaubada yana veimeya una itaitaveyabidi.”18Ada bana givona, “Gava veimeya?”Yeisu givona, “Keke una luvealika, keke unaudo, keke una kiyafu, kaliva yadi gugai faidiya keke una awatalatalaina fwayafwaya,19ina ke tama una vemoimoinedi, kaduwe kaliva una nuwakabubuyedi o tauni unuwakabubuyeni anafaiweya.”20Kaliva tubulakaina givona, “Tainei veimeya-dina matatabudi gaitaveyabidi. Aku gavana wagaine gavemaufo e ada gida lubodaku kadu gada gugai?”21Yeisu givona, “Kai nuwanuwa una tunutunugina velemoena Yaubada matane, aga unanau ya lokoloko moyaina una vekimoneyedi ke manina una veledi fanifani, e ada kaikaiwabu velemoena gabameya una nuwagana. Ada unaela una muliyeku.”22Aku kaliva tubulakaina ginogalina Yeisu yana vona, ada au magigina gikokomina ke wa yana nuwavita gitauya ginau. Faina banae yana lokoloko moyai-moena.23Ada Yeisu yana tonogalayavo givonedi, givona, “Gavona velemoena, badi tokaikaiwabu yadi luku Yaubada yana ebaveimeya wagaine ani au vitana velemoena.24Yaku vona gana luvagilena. Tokaikaiwabu faidiya ani vita-moena. Wana itana, kevakeva lakaina anayegana kameli ani kai gina balalava ada vaita gaima matana wagaine gina lukufolega ani gavaiyamu, anafata? Keke. Ada tokaikaiwabu ani ananuwanuwa anafaiweya. Kai badi taudiyavo yadi toyogina wagaine ina balalava ke Yaubada yana ebaveimeya wagaine inaluku, ani ibalalava-wayoga.”25Ada tonogalayavo vona taidei inogalina wagaine, meyadi ibovu ada ivona, “Kai taidei anafaiweya, aga gaito anafaiweya kibababala gina nuwaga?”26Aku Yeisu giitafasedi ada givona, “Kaliva wagaidiya ani gaitoma taidei keke maita meyameyaganina, aku Yaubada wagaine ani gaitoma matatabuna meyameyaganina.”27Ada Pita givonena, givonaga, “Una itana, ime gaitoma moyaina asegedi ada aela O amuliyeni. E ada gavana ana nuwaga?”28Yeisu givonedi, givona, “Gavonemi velemoena, aimo tova gielaelai wagaine gaitoma moyaina adikiveevagu wagaine, Banae Kaliva Natuna yana veimeya anaebavetoga kaikaiwabuna wagaine gina vetoga tova-nai, imi wamuliyeku ani kaduwe veimeya anaebavetoga kaikaiwabuna tuwelo wagaidiya wana vetogami aku meIsileli unumidi adituwelo wagaidiya wana veiveimeya.29Ada badi gavega Iya faikuya inuwanuwa e ada yadi manuwa isegedi o kai tubuiyadiyavo o novudiyavo, kai inadiyavo o tamadiyavo o natudiyavo, kai yadi babi isegedi, ani badi gaitoma-dina fatadi analedi wa anavetutamwata inavaina. Ada kaduwe yawai miyamiyani-vagaina ina nuwagana.30Aku moyaidi tova malinai wai inagonagona ani aimo tova gielaelai wai ina muline-mwena, aku badi gavega tova malinai wai imuline-mwena ani tova gielaelai aimo wai ina nagona.”