Madiu13
Waifei anatoiyavuyavula anavona matalivulivuna.
1Aku tayuwe yadayada-nai wagaine Yeisu giyegemona manuwa wagaine ada ginau Lavu Galili taliyeya givetoga.2Ada yoo lakaina ivagauta faina, banae waka wagaine giyage givetoga aku yoo-dina ani taliya wagaine imididina.3Ada gaitoma moyaina givewavewaledi vona matalivulivuna wagaidiya, givonaga, “Kaliva seyana ginau ke yana bakula wagaine witi waifeina gina yavuledi. 4Ada waifei giyavuyavuledi aku tufona ibeu wai wagaine, ada manuga iela imadukani-yabudi.5Kadu tufona ibeu kakanafaya wagaine, bana wagaine babi keke badobadona. Ada maduga-mowa waifei ikabu, faina babi keke gidaobu lakaina.6Aku kauwana gilaka wagaine witi kabudi evagudi gikabudi ke imayewadi, faina walamidi keke idaobu velemoena.7Kadu tufona ibeu sikakakama wagaine, ada nodi itabo-tamwai ilaka ani sikakakama gitabo toyogina ke witi gifaimununa.8Aku tufona ibeu babi iwakana wagaine ke itabo iwakana. Ada waifei iveguwa ani tufona guwa inuwagadi analedi (100), tufona sikisiti (60), kaduwe tufona teti (30).9Imi gavega wa tagami ani vona taidei wada nogalina.”Gavana faina Yeisu vona matalivulivuna wagaidiya giifufu?
10Aku Yeisu yana tonogalayavo ielai wagaine ada itolidadana, ivonaga, “Gavana faina vona matalivulivuna wagaidiya uvevewala yoo wagaidiya?”11Ada Yeisu gilufata givona, “Imi wagaimiya ani amiawaega ke Yaubada yana ebaveimeya ananuwanuwa sewasewavuyedi wana alamanedi. Aku badi wagaidiya keke.12Faina badi gavega Yaubada yana vona inogalina ke ivevefaisewana ani badi kaduwe alamana gina veledi, e ada Yaubada anaalamana badi wagaidiya gina tubuga-mowa. Aku gavega Yaubada yana vona keke ida vevefaisewa, badi yadi alamana kabisona ani Yaubada gina vaiyegena wagaidiya.13Taidei faina, yaku ifufu ani vona matalivulivuna wagaine.‘Faina iitaita aku keke idaita ke ida alamane,ada kaduwe inoganogala aku keke nuwadi gida mamali.’14E ada badi faidiya tuwaina Aiseya gifalofisai ani giyegemona velemoena, givonaga,
‘Tova moyaina bonaku wana noganogalinaaku keke nuwami gina mamali.Kaduwe yaku gugai wana itaitanaaku keke ananuwanuwa wana itainana.15Faina ida yoo-nai ani aseasedi ikuga,ada tagadi ikulu, ke matadi ikibodadi.Aku kai ida awaegedi, aga matadiya idaita,ke tagadiya ida nogala,ada aseasedi wagaine nuwadi gida mamalina,e ada wagaikuya ida miyaviladi ke gada kiveiwakanedi.’ Taidei anafaiweya Aiseya givona.16“Aku imiyavo ani ebavemwamwala wagaimiya, faina matami giitaita ke tagami ginoganogala.17Faina gavonemi velemoena, tova tuwaina falofitayavo ke kaliva toyegayegana moyaidi nuwanuwadi lakaina ina itana gaitoma taidei waitaitadi, aku keke idaita. Kaduwe nuwanuwadi ina nogalidi gaitoma taidei wanoganogalidi, aku keke ida nogali.
Waifei anatoiyavuyavula anavona matalivulivuna faina Yeisu gikivemalina.
18“E ada waifei anatoiyavuyavula anavona matalivulivuna, ani taidei anaalamana wana nogalina.19Witi waifei-dina wai wagaine ibeu, ani vaita badi gavega vona inogalina Yaubada yana ebaveimeya faina. Inogalina aku ananuwanuwa keke ida alamane, e ani Seitani gielai ke vona-nai ibakulina aseasedi wagaidiya ani givaiyavulena.20Aku waifei ibeu kakanafaya wagaine, ani badi gavega Yaubada yana vona inogalina ada maduga-mowa wa yadi vemwamwala ivetumaganena.21Aku vona-nai ani keke idavai ada idasei aseasediya ida miyami. Vaita walamidi keke idasei, e ada tova maufo-moena iatuvefaila. Aku tova-nai vita gina yegemona, o kai yadi awaega Yaubada yana vona wagaine faina, kiveuloulolona ina nuwagana kaliva wagaidiya, maduga-mowa yadi vetumagana-nai ina segena.22Aku waifei giyavuyavulena sikakakama wagaine ananuwanuwa ani taidei anafaiweya. Badi gavega Yaubada yana vona inogalina aku babi anagaitoma moyaina faidiya ivevenuwana lakaina, ada kaikaiwabu ananuwakabubu lakaina aseasedi wagaidiya gifwayautuvidi. E ada taidei gaitoma-dina ani Yaubada yana vona-nai ifaifaimunudi, ada keke ida veveguwa.23Aku waifei ibeu babi iwakana wagaine ananuwanuwa ani badi gavega Yaubada yana vona inogalina ke ananuwanuwa ialamanena, e ada yadi dewa wagaidiya guwa iwakana iseyegemonena. Tufona iveguwa analedi (100), tufona sikisiti (60), ada tufona teti (30).”Lomata anavona matalivulivuna.
24Aku Yeisu kaduwe vona matalivulivuna seyana giifufuyena, givonaga, “Yaubada yana ebaveimeya taidei anafaiweya. Kaliva seyana witi waifei iwakadi giyavuledi yana bakula wagaine.25Aku bogi seyana moyaidi idaudau aku kaliva-nai nibaina gielai ke lomata waifeidi kaduwe giyavuledi witi adimwatuguya, ada gitauya ginau.26Aku tova-nai witi itabo ada iveguwa, ani kaduwe lomata itabo.27“Ada tonibakula yana togugaiyavo ielai bana wagaine ivona, ‘Kauveya, witi waifei iwakana ya bakula wagaine ubakulina, aku gavaiyamu ada lomata kaduwe itabo?’28“Banae givona, ‘Tainei ani nibaiku seyana yana gugai.’“Ada togugaiyavo itolidadana, ivona, ‘Ada gavaiyamu, nuwanuwa ime anana lomata ana abudi?’29“Aku bana givona, ‘Auwe, keke lomata wana abudi. Faina kai wana abudi aga witi nodi wana abu-tamwaidi.30Auwe ginamiya ke witi ada lomata nodi inatabo-tamwai analaba witi-moena anaitalaga anatova. Ada toitalaga gana vonedi lomata ina maduabudi, ada ina itavadi ina kabudi. Aku muliya e witi ina talana ada yaku aa anamanuwa wagaine ina dodona.’”
Musita waifeina ada falawa anayisti anavona matalivulivuna.
31Yeisu kadu vona matalivulivuna seyana giifufuyena, givona, “Yaubada yana ebaveimeya vaita musita waifeina anafaiweya, ani kaliva givai gibakulina yana bakula wagaine.32E, aku waifei moyaidi wagaidiya ani musita waifeina kabiso-moena, aku ginatabo ginalaka ada gavana gitabotabo bakula wagaine ani matatabuna gina tabosegedi. E, anaetowava vaita ai anafaiweya, e ada manuga inaelai ada adiuba ina bubudi lagana wagaidiya.”33Kaduwe Yeisu givona matalivulivuna-vagila, givona, “Yaubada yana ebaveimeya vaita falawa anayisti anafaiweya. Vavine seyana yisti ivaina ke falawa lakaina negenine iluvilana. E ada tainei gaitoma-nai kabiso-moena ani giluku-nau falawa wagaine ke matatabuna gilutuga.”34Ada gaitoma-dina taidei moyaina ani Yeisu giifufuyedi vona matalivulivuna wagaidiya. Keke gida ifufu-mowa kaliva wagaidiya aku vona matalivulivuna gaga wagaidiya.35Taidei anafaiweya gidewa e ada gavana tuwaina falofita givonayena ani gina yegemona velemoena, givonaga,“Gana ifufu wagaidiya vona matalivulivuna wagaidiya.Gaitoma-dina sewasewavuyena babi anaebavevuvuwagaine, ani tova malinai gana ifufuyedi.”
Lomata anavona matalivulivuna Yeisu gikivemalina.
36E ayo Yeisu yoo gisegedi aku giluku manuwa wagaine. Ada yana tonogalayavo ielai wagaine, ivona, “Lomata bakuleya anavona matalivulivuna ani gavana anaalamana? Uda kivemalina wagaimeya.”37Yeisu givonaga, “Banae kaliva-nai witi waifeina iwakana gibakulina ani Banae Kaliva Natuna.38Aku bakula ani babi matatabuna, ada waifei iwakana ani badi kaliva-dina Yaubada yana ebaveimeya wagaine imiyamiya. Aku gudana ani badi kaliva-dina Seitani yana ebaveimeya wagaine imiyamiya.39Ada kaliva nibaina banae gudana anatobakula ani Seitani. Witi anaitalaga anatova ani tainei tova anaebalauyabu, ada toitalaga-dina ani Yaubada yana aneloseyavo.40Ada gudana iabudi ke iveividi ada ai alalata wagaine ikabudi, ani anafaiweya tova anaebalauyabu wagaine gina yegemona.41Banae Kaliva Natuna yana aneloseyavo gina imilidi yana ebaveimeya matatabuna wagaine ke ina vagauwidi biyavo-dina kaliva inagonagoyedi ke ina koyokoyona, kaduwe badi gavega tova moyaina Yaubada yana veimeya igadibudibusoyogena.42Ada ina batugedi ai alalata wagaine, wadedeku-deya ina tagiya lakaina ke ina kudaligoligota.43E ayo badi yegayegadiyavo, ani Tamadi Yaubada yana ebaveimeya wagaine ina vemalina vaita kauwana anafaiweya. Imi gavega wa tagami ani vona taidei wada nogalina.”Vona matalivulivuna tulina tulina.
44Kaduwe Yeisu givona matalivulivuna, givonaga, “Yaubada yana ebaveimeya anafaiweya lokoloko kaikaiwabuna isewavuyena babi negenine. Aku aimo-yo seyana kaliva ginuwagana ada kaduwe givetavu-vagilena. Ada wa yana vemwamwala nodi ginau ada yana lokoloko matatabuna givekimonedi ada manina givaina, ada giyewana ke babi-nai gikimonena.”45Kaduwe vona matalivulivuna seyana giifufuyena, givonaga, “Yaubada yana ebaveimeya anafaiweya kaliva seyana ginau ke fwalu iwakana gilelele gina kimonena faina.46Ada gilelele ani seyana kaikaiwabuna velemoena ginuwagana aku fatana lakaina. E ada giyewana ke yana lokoloko matatabuna givaidi givekimonedi, ada mani givaina ke ginau fwalu-nai gikimonena.”47“Kaduwe Yaubada yana ebaveimeya anafaiweya vaita guvata lavu wagaine isegena ada igana tulina tulina iveonadi.48Ada tova-nai guvata gimaga, toyauba itai gilaka avaleya ada igana iwakadi ivaidi idododi fuwama wagaidiya. Aku igana koyodi isegedi.49Taidei anafaiweya tova anaebalauyabu wagaine gina yegemona. Yaubada yana aneloseyavo ina obuelai ke kaliva koyodiyavo ina luvisidi kaliva iwakadiyavo wagaidiya-deya,50ada ai alalata wagaine ina batugedi. Wadedeku-deya ina tagiya lakaina aku ina kudaligoligota.”51Ada Yeisu yana tonogalayavo gitolidadanedi, givonaga, “Gavaiyamu, vona matalivulivuna moyaina gaifufuyedi ani nuwami gimalina?”Badi ivona, “Ika, aalamanena.”52Ada Yeisu givona wagaidiya, givonaga, “Iwakana. E ada kaduwe nuwami gida malina taide yaku vona faine. Kai imiyavo ada kadu badi gavega bademowa alaalamanimiyavo Yaubada yana veimeya tuwaina-deya faidiya ani wana vetonogala Yaubada yana ebaveimeya wagaine, aga imiyavo vaita toni manuwa kaikaiwabuna seyana anafaiweya. Bana yana manuwa wagaine-deya yana kaikaiwabu evagudi giseseyegemonedi kadu yana kaikaiwabu tuwaidi, e ada gaitoma-dina wagaidiya kaliva gina lemelemedi.”
MeNasaledi Yeisu keke ida vemoimoine.
53Tova-nai Yeisu yana ifufu matalivulivuna giavaina, tayuwe fafali-nai gisegena54aku giyewana tauna yana melala Nasaledi wagaine. Ada yadi manuwa ebavewala wagaine giluku givewavewala, ada badi ivanevanenegena ani meyadi gisidobodobona ke ivona, “Kaliva taidei ani gadedeku-deya yana nuwauya ke kaduwe gugai-dina toyogidi givaidi?55Aku banae ani au manuwa anatoiyogona natuna, kaduwe inana adiyegana Meli. Ada tainavo kaalamanedi Iyemesa, Iyosefa, ke Saimoni, ada Yudasa.56Novunavo kaduwe nodi kamiyamiya. E, banae wagaideya giveinala. Aku gadedeku yana alamana taidei givai?”57E ada idibusoyogena.Aku Yeisu givonedi, givonaga, “Falofita ani fafali moyaina wagaidiya kaliva ivemoimoinena. Aku tauna yana yoo yana fafali wagaine ke tauna yana gabumomo ani keke ida vemoimoine.”58E ada badi meNasaledi keke ida vetumagana faina, ada keke gugai ebameyasidobodobo moyaina gida gugaiyedi wadedeku.