อ่านหนังสือ Madiu 1

Madiu1

Yeisu yana tubudelideliyavo badi gavega nagona itubuyegemona.

¹Yeisu Keliso yana gabuyavo ifufudi taidei anafaiweya. Banae ani Deivida unumina wagaine gitubuyegemona, aku Deivida ani Ebelaamo unumina wagaine gitubuyegemo.

²Ebelaamo banae natuna Aisake, Aisake natuna Iyakobo, ada Iyakobo natuna Iyuda, aku wa tubuiyanavo nodi.³Ada banae Iyuda natunavo Felesi ke Sala, aku inadi ani Temali. Ada Felesi natuna Esiloni, aku Esiloni natuna Lama,⁴ada Lama natuna Aminadaba, aku Aminadaba natuna Nasoni, ada Nasoni natuna Salamoni,⁵ada Salamoni natuna Bowasa aku Bowasa inana ani Leyabi. Bowasa natuna Obedi aku Obedi inana ani Luti, ada Obedi natuna Iyese.⁶Aku Iyese natuna Kini Deivida, ada banae Deivida natuna Solomoni aku inana ani nagona Ulaiya vavinena.⁷Ada Solomoni natuna Leoboamu, aku Leoboamu natuna Abaiya, aku Abaiya natuna Asa.⁸Ada Asa natuna Iyeosafadi, aku Iyeosafadi natuna Iyolama, ada Iyolama natuna Usaiya.⁹Usaiya natuna Iyotama, aku Iyotama natuna Eyasi, ada Eyasi natuna Esekaiya.¹⁰Ada Esekaiya natuna Manasa, aku Manasa natuna Emoni, ada Emoni natuna Iyosaiya.¹¹Iyosaiya natuna Iyekonaiya wa tubuiyanavo. Ada badiyavo imiyamiya aku meBabiloni ielai ada tufona moyaidi meIsileli ikiveyabidi inauwedi yadi fafaliya.¹²Ada yadi nau-nai Babiloni muline, Iyekonaiya natuna Salatiyeli gitubuga, ada Salatiyeli natuna Selubabeli.¹³Ada Selubabeli natuna Ebeuda, aku Ebeuda natuna Eliakimu, ada Eliakimu natuna Eso,¹⁴aku Eso natuna Sadoki, ada Sadoki natuna Ekimu, aku Ekimu natuna Eliuda.¹⁵Ada Eliuda natuna Eliesa, aku Eliesa natuna Madani, ada Madani natuna Iyakobo.¹⁶Iyakobo natuna Iyosefa banae Meli moganedi, ada Meli ivenatunena Yeisu Banae ivewagana Keliso.

¹⁷Ada Yeisu Keliso yana unuma-dina adiyegana anafaiweya, aku givevuvu Ebelaamo wagaine ada gielai Deivida wagaine ani adiyoo fotini, aku Deivida wagaine ada gielai tova-nai meIsileli moyaidi ikiveyabidi inauwedi Babiloni wagaine ani kaduwe adiyoo fotini. Ada tova-nai meIsileli inauwedi Babiloni wagaine ada gielai Yeisu Banae Mesaiya wagaine, ani kadu adiyoo fotini.

Yeisu Keliso yana tubuga ifuifufuna.

¹⁸Ada taidei anafaiweya Yeisu Keliso yana tubuga ifuifufuna. Inana Meli ani Iyosefa gisetago-moena aku aimo keke ida miyaluga ke nodi idada aku Meli gilutovonina giveifuga, ada tainei ani Aluwaluwa Tabuna yana toyogina wagaine.¹⁹Aku moganena Iyosefa ani bana kaliva iwakana ke yana dewa bikana, ada keke nuwanuwana yoo matadiya Meli gina kivevovomumu faina, ginuwanuwa vaita ikavuya-deya gina viyoliliyena. ²⁰Ada aimoina ginuwanuwa anafaiweya aku Yaubada yana anelose seyana gienoavaisena, ani gielai wagaine ada givonenaga, “Iyosefa, oyeni Deivida yana tubudelideli, keke una matauta Meli faine aku auwe una vagaulena ke una nagina, faina kwamana kamone ani Aluwaluwa Tabuna giveifugena.²¹Ada kaduwe aimo natuna kaliva gina venatunena ke una vewagana ‘Yeisu’, faina Banae yana kalivayavo yadi dewa koyona wagaine gina kibababaledi.”

²²Aku gaitoma taidei giyegemona velemoena, faina tova tuwaina Yaubada yana vona gavaiyamu yana falofita givonayena ani anafaiweya gina yegemona.²³Ada falofita-nai givonaga, “Wana itana, vavine seyana akeduna matabolana gina veifuga ada natuna kaliva gina venatunena, ada ina vewagana Imanueli.” E, yegana taidei anakivila ani ‘Yaubada ide nodi kamiyamiya’.

²⁴E ada Iyosefa gienovilana ada Yaubada yana anelose giveimeyena anafaiweya gigugai. Ginau Meli givagaulena ada ginauwena yana manuweya.²⁵Aku nodi imiyamiya ada vovona keke gida kiluvaluva aku givenatuna natuna kaliva. Ada Iyosefa kwamana givewagana Yeisu.