Iyoni5
Yeisu kaliva seyana gikivebwainina gufa etobwebwetuna lilivane.
1Ada tayuwe tova-nai muline e au meIsileli yadi tafalolo anaabutu seyana ivemwamwalena, ada Yeisu gilaka Yelusalema.2Ada giluku Yelusalema ginaunau aku giyegemona gufa etobwebwetuna seyana, vona Ibeliu ivewagana Bedesida, wada sifi yadi ebaluku anawana lilivane. Gufa-nai afaine ani ebaveyawai faifi iyogo balawalilivugina, seyana seyana wa anakwalala.3Ada ebaveyawai wagaidiya ani kaliva moyai-vagaidi toveoga ienoliyaliya, anafaiweya badi matadi koyo-moena, badi tovefela, ke badi vovodi memeluyadi, [ada biyavo-dina ibodabodana gufa yana yavivila faina.4Taide anafaiweya ibodaboda faina tamo tova ani Yaubada yana anelose seyana gina obuelai ada gufa gina luvivivilina. Ada gavakaliva kai gina maduobu gufa anakiveyauvivila-nai wagaine aga gavaveoga givaina ani gina bwaina.]5Ada kaliva seyana wadedeku gimiyamiya, banae wa veogina malamala teti-eita.6Ada Yeisu giela kaliva-nai giitana gienobalabala, ada gialamanena ani tayuwe anafaiweya gimiyamiya tova manamanawena ada gitolidadanena, givona, “Gavaiyamu, nuwanuwa una veiwaka?”7Ada toveoga-nai gilufata, givona, “Kauveya, akutolema keke. Tova-nai gufa giavivila, keke tamo gaito gida nauweku gufa wagaine. Gabalabalalava ke gaobuobu vaita gana maduluku, aku bademowa seyana gaito wai ginago gimadumadu obu.”8Ada Yeisu givonena, givona, “Una mididi, avaya unawai una nudadana.”9Ada maduga-mowa kaliva gibwaina ada anavaya giwai ginunudadana.Aku yadayada-nai kaliva-nai giveiwaka ani Sabate wagaine,10e ada meIsileli aditonagonayavo ani kaliva-nai giveiwaka ivonena, “Malinai Sabate, ada adaveimeya giawatada keke kana faifaisewa, e ada keke wa aawaega ke avaya unawai!”11Aku banae gilufata, givona, “Kaliva-nai gikiveiwakaneku ani banae givoneku, givona, ‘Avaya unawai una nudadana.’”12Ada badi itoliyena, “Gavakaliva taide givoneni, ‘Avaya unawai una nudadana’?”13Kaliva-nai gibwaina ani keke gida alamane gaito banae, faina wadedeku-deya yoo lakaina imiyamiya ada adimwatuguya Yeisu bademowa giamwaku ginau.14Muliya Yeisu kaliva-nai ginuwagana manuwa tabu wagaine ada givonena, givona, “Uitana, bade uveiwaka! Ya dewa koyona unasege-vagaidi aenanai gaitoma koyo-moena gina yegemo wagainiya.”15Ada Yeisu yana ifufu giavaina, kaliva-nai gitauya ginau ada meIsileli aditonagona giawatalatalainedi, givona, “Banae kaliva-nai gikiveiwakaneku ani anayegana Yeisu.”16Ada Sabate wagaine gaitoma-dina taidei Yeisu gigugugaiyedi faina, meIsileli aditonagonayavo ikikiveuloulolonina.17Aku Yeisu givona wagaidiya, givona, “Iya Kamaku yadayada seyana seyana gifaifaisewa ada gielai malinai, ada Iya kaduwe gafaifaisewa.”18Ada bademowa meIsileli wai ilelelena ke Yeisu ina luvealikana, aku au Bana yana vona faina inuwakoyo-mowa ada ivebutu toyogi-moena ilelele ke gavawai wagaine ina luvealika. Keke vaita Sabate anaveimeya veyawai gaga giyaweyawelina faina, aku kadu Yaubada giawavetamanena evona Tama-moena. Ada yana vona ananuwanuwa inuwanuwayena ani Tauna gikikilakaina vaita Yaubada nodi iveaigaigabu.