Read Gugai 9

Gugai9

Saulo givevuvu Yeisu wagaine givetumagana.

¹Aku tova tayuwe wagaine Saulo aimo Yeisu yana tonogalayavo giawaawavematausidi vaita gina luvealikadi. Au ginau veyavo anatovegugai aditonagona wagaine²giveola ke leta gina vetokilumidi ada manuwa ebavewala moyaidi melala lakaina Damasiko wagaine gina nauwedi. Ada badi manuwa ebavewala aditonagonayavo leta-nai ina itana ada Saulo anaveimeya ina alamanena, e ada badi gavega Kauveya Yana Wai anatomuliya, kai kaliva o kai vavine, biyavo-dina gina kiveyabidi ke Yelusalema wagaine gina aliyedi.³E, ada gitauya ginaunau Damasiko wagaine aku bademowa ginunuyegemona melala lilivane ani maduga-mowa gabameya-deya malina lakaina ginununa ada Saulo gimalivuyona.⁴Ada gibeu babiya aku bonabona seyana ginogalina givonena, givona, “Saulo, Saulo! Gavana faina ukiveulouloloniku?”

⁵Ada Saulo givona, “Kauveya, o gaito?”
Ada kaduwe bonana ginogali-vagilena, givona, “Iya Yeisu, Iya ukiveulouloloniku.⁶Aku una mididi unana melala lakaina wagaine unaluku, ada wadedeku seyana gaito gina mataweni gavana unagai.”

⁷Aku badi kaliva-dina Saulo ikwayabuna ani meyadi gibovu, au imididi-vagata. Faina bonabona gaga inogalina aku keke tamo gaito idaita.⁸Ada malina-nai giavaina, Saulo gimididi ada matana gialeleleyena aku keke tamo gavana anafaiweya gidaita. Bademowa matana gikoyo-mowa. Ada nimane iabi isivenavenau inauwena Damasiko wagaine.⁹Ada yadayada toiye wagaidiya givematakoyo, ada keke tamo gavana gidakani o gidayui.

¹⁰Aku Damasiko wagaine tonogala seyana gimiyamiya, anayegana Ananaiyasi. Ada vewala seyana giyegemona bana wagaine, ada anavewala-nai wagaine Kauveya gidouwena, givona, “Ananaiyasi!”
Ada givona, “Kauveya, Iyayeku.”

¹¹Ada Kauveya givonena, givona, “Una mididi ke wai anayegana Wai Tunutunugina wagaine unanau Yudasa yana manuweya, ada una tolidadana Saulo banae kwana Tasasi faine. Banae tova malinai giveoveola,¹²ada anavewala wagaine giitana kaliva seyana anayegana Ananaiyasi, o unaelai ada nima unasedi bana wagaine ke ginaita-vagila.”

¹³Aku Ananaiyasi givona, “Kauveya, kaliva moyaidi ivoneku taidei kaliva-nai faine, ani ya kaliva tabutabudiyavo Yelusalema wagaine gikiveuloulolonidi lakaina!¹⁴Ada banae idedeku Damasiko wagaine gielai faina veyavo anatovegugai lakaidiyavo anaveimeya ivelena, ke ime gavega ayegana wagaine aoduodu ani gina kiveyabima ke gina nauwema.”

¹⁵Aku Kauveya givonena, givona, “Unanau, faina taidei kaliva-nai ani Iya gavenuwadadanena ke akuyegana gina kilakaina badiyavo gavega keke meIsileli, ada yadi kini wagaidiya, kaduwe meIsileli wagaidiya.¹⁶Aimo Iya gana vewalena, uloulolo lakaina gina nuwagana akuyegana faina.”

¹⁷Ada Kauveya taidei anafaiweya givona, e ada Ananaiyasi gitauya ginau ada giluku manuwa-nai wagaine Saulo gimiyamiya. Ada nimana gisedi Saulo wagaine aku givona, “Tubuiyaku Saulo, Kauveya Yeisu wai wagaine giyegemona wagainiya tova-nai uelaelai idedeku, ani giimiliku ke unaita-vagila ada Aluwaluwa Tabuna gina vemagani.”¹⁸Ada maduga-mowa gaitoma vaita igana kwanavina anafaiweya ani Saulo matane ibeu, ada giita dewadewa. E au gimididi ada gibabitaiso.¹⁹Ada aa gikani muline, kaduwe yana toyogina ginuwaga-vagilena. Saulo Damasiko wagaine gilumamala.
Ada Saulo Damasiko wagaine gimiyamiya yadayada tufona Yeisu yana tonogalayavo nodi.²⁰Ada manuwa ebavewala wagaidiya maduga-mowa gilukunau ke Yeisu faine gilumamala, givona, “Yeisu Banae Yaubada Natuna.”

²¹Ada badi moyaidi gavega yana laumamala inogalina ani meyadi gisidobodobona ke ivebutu taudiyavo ivetolitoli, ivona, “Taumada! Kaliva-nai badi gavega Yeisu anayegana ivetumaganena Yelusalema wagaine ani gikiveuloulolonidi lakaina. Kaduwe taidei yana vuvuna-nai faina gielai idedeku, ada Yeisu anatomuliyayavo ide wagaideya-deya gina kiveyabidi gina nauwedi veyavo anatovegugai lakaidiyavo wagaidiya.”²²Taidei anafaiweya badi iifuifufu aku Saulo yana laumamala wagaine gitoyogina ada gitoyogi-moena. Ada meIsileli Damasiko wagaine imiyamiya ani giawavetunutunugidi vaita Yeisu velemoena Yaubada givenuwadadanena ani velemoena Venuvenuwadadanina. Ada yana awavetuvetunuga-nai wagaine gitoyogisegedi e ada keke adifaiweya bonana inafata.

²³Aku yadayada gavaiyei giavaidi, meIsileli tufodi ivagauta ke iveimeya aigaigabu vaita Saulo ina luvealikana.²⁴Ada yadayada ke bogi melala lakaina anaebaluku wagaine ibodabodana nuwanuwadi ina luvealikana faina, aku bademowa gaito seyana yadi nuwanuwa Saulo wagaine giawatalatalainena.²⁵Aku bogi seyana wagaine Saulo anatomuliyayavo ikavuya ivagaule inauwena, ada fuwama lakaina wagaine idodona ada melala anakali tutufolegeya iseobuyena babiya ke giota ginau.

Saulo giyewana Yelusalema wagaine.

²⁶Aku Saulo Yelusalema wagaine giyewana ada giyegemona wagaine, ginau tonogalayavo adiyoo wagaine gidaluku aku badi moyaidi imatausena, faina keke ida vetumagane vaita velemoena Yeisu wagaine gida vetonogala.²⁷Aku Banabasi gilemena, ada afositolo wagaidiya ginauwena ke bana faine gikivemalidi, Kauveya waiya giitana kaduwe bonana ginogalina ani giifufuyedi. Kaduwe givonedi, givona, “Banae Saulo wa yana asevatu Yeisu anayeganeya gilumamala Damasiko wagaine.”²⁸Taidei anafaiweya Banabasi givona e ada Saulo badi afositolo wagaidiya giluku nodi imiya Yelusalema wagaine. Ada Saulo wa yana asevatu gilulumamala Yeisu anayeganeya.²⁹Kaduwe meIsileli badi tovona Giliki ani Saulo nodi ivevonavona, aku iveimeya aigaigabu ina luvealikana.³⁰Aku tova-nai tovetumaganayavo ikaiyanogala yadi veimeya faina, Saulo inauwena Sisalia wagaine ada wadedeku-deya waka wagaine iveyagena ke ginau yana melala Tasasi wagaine.

³¹E ayo tovetumagana adiyoo imiyamiya Yudiya, Galili, ada kaduwe Sameliya adifafali wagaidiya ani wa yadi nuwaniwalova nodi imiyamiya, ada yadi vetumagana gitubutubuga. Kaduwe Aluwaluwa Tabuna gikikiveasevatudi ada moyaidi wa yadi matauta Kauveya ivemoimoinena, e ada adiyoo giveiveinala.

Pita kaliva vovona memeluyana gikiveiwakanena.

³²Imiyamiya aku Pita melala tulina tulina wagaidiya ginaunau, ada tova seyana Yaubada yana kaliva tabutabudiyavo melala Lida wagaine imiyamiya ani wagaidiya gina gimadubodadi.³³Wadedeku-deya kaliva seyana ginuwagana, anayegana Iniya. Bana malamala eita gimiyamiya iviya, faina vovona memeluyana.³⁴Ada Pita givonena, givona, “Iniya, Yeisu Keliso gikikiveiwakaneni. Una mididi aivi una uwana.” Ada maduga-mowa Iniya gimididi.³⁵Ada meLida moyaidi kadu kaliva moyaidi imiyamiya laubeu anayegana Seloni wagaine, ani kaliva-nai iitana ada Kauveya Yeisu ivetumaganena.

Pita Tabita alikeya gisiveyawana.

³⁶Aku vavine seyana melala-nai Yofa wagaine gimiyamiya, anayegana Tabita, ada banae tonogala. Vona Giliki wagaine anayegana Dokasa. Ada vavine-nai tova moyaina gugai iwakana gigugugaiyena ada fanifanidiyavo gilemelemedi.³⁷Ada tova tayuwe wagaine Pita gielai melala Lida wagaine, aku Tabita veoga gikimunumunu-moena ke gialika. Ada vovona ikolana ada manuwa getana anatutulagolota wagaine isena.³⁸Aku melala Yofa ani Lida lilivane, ada tonogalayavo Yofa wagaine ikaiyanogala vaita Pita gimiyamiya Lida wagaine e ada kaliva adiselu iimilidi inau Pita ina vagaulena. Inau ada ivona, “Uda maduelai ime wagaimeya.”

³⁹Yadi vona Pita ginogalina ada gimididi nodi inau. Tova-nai giyegemona, iabi ilakavena manuwa getane anatutulagolota wagaine Tabita vovona isena. Ada sikwasikwa moyaidi Pita imidififina aku itagitagiya, ke kaduwe ivewavewalena nuya tulina tulina Tabita gionadi tova-nai aimo wayawaina wagaine.

⁴⁰Au Pita moyaidi givonedi iyegemona melaleya aku tugana givetodonena ke giveoveola Yaubada wagaine. E ada gimiyavilana toalika vovona wagaine ada givona, “Tabita, una mididi!” Au matana giabwana ada Pita giitana ani gimididi givetogana.⁴¹Ada Pita nimane giabi gisivemididina. E ayo tovetumagana ke sikwasikwa nodi gidouwedi iluku tutulagolota-nai wagaine, ada givewaledi Tabita wayawaina.⁴²Ada vavine-nai valeyana gimutula ke meYofa moyaidi inogalina, ada tufona moyaidi Kauveya ivetumaganena.⁴³Ada yadayada moyaina Pita gimiyamiya Yofa. Kaliva seyana anayegana Saimoni nodi, banae kevakeva bubudi anatokidewadewa.