Gugai28
Paulo yana miya Melita wagaine.
1Tova-nai bademowa akayovilakata imula wagaine, ada anakalivayavo ivonema taidei imula-nai anayegana Melita.2Ada anakalivayavo ivesiuleyema ke inuwakalikaliyema lakaina. Ai ikulina ke avevala, faina wei gilugalugaga ada tulutuluna.3Ada Paulo gina ai gikikwakwakwa giela gilevalevadi ani ai yana luginagina faina, mota koyo-moena giluluvealika giyegemona ada Paulo nimana giyova gikudaveyabina.4Ada badi meMelita iitana mota Paulo nimane gikwaikwaiyoyo ada taudiyavo iveifuifufu, ivonavona, “Kaliva taidei velemoena toluvealika. Gilubodana leyageya gida alika aku au givelubwaibwaina. Ada tainei faina yada yaubada-nai kaliva koyodi givematavulogidi ani keke gida awaege banae wayawaina ginamiya.”5Aku Paulo mota-nai gilukakina ke ai alalata wagaine gibeu, ada keke tamo vita gida nuwaga.6Aku kaliva-dina iveyamasena evona vaita vovona gida tubuga o kai gida madualika. Ada iboda tova manamanawena aku keke tamo gavana gida yegemona Paulo wagaine, e ada yadi nuwanuwa isevedavedamedi ke ivona, “Kaliva taidei banae yaubada seyana.”7E aku kaliva seyana gimiyamiya, anayegana Pabiliyasi. Banae imula-nai anatoveimeya lakaina, ada bana yana babi taliya lilivane ime alaka. Ada kaliva-nai gisivaivaima yana manuweya ada yadayada toiye wagaidiya giitaveyabi-dewedewema.8Aku tamana giveoga anaiviya gimiyamiya. Vovona gilukalalava kaduwe gikamomadu. E ada Paulo giluku toveoga-nai wagaine ada giveoveola Yaubada wagaine, ada nimana gisena bana wagaine ke gikivebwainina.9Ada bana gibwaina wagaine, au toveoga moyaidi imula-nai wagaine imiyamiya ani ielai ada Paulo Yaubada giveoveolena badi faidiya ke ibwaina.10Ada nuwakabubu moyaina ivelema, ada aimo tova-nai akidewadewa anayage faina, e aku amaga ke amagufa ivaidi ada idododi waka wagaine yamana faine.Melita isegena aku inau Loma.
11Ada Melita wagaine vaikoi toiye amiyamiya aku waka seyana wagaine ayage anau. Waka-nai anayegana ‘Natuyuweyuwe Yaubada’, ada gielai melala anayegana Alekisanidia wagaine-deya ke imula-nai wagaine gimiyamiya, faina mala yana tova.12Ada anau melala anayegana Sailakusu wagaine aluku ke wadedeku-deya yadayada toiye amiyamiya.13Kaduwe ayage-vagila ke anau melala anayegana Legiumi wagaine. Mala gilavuna mala iwakana gielai, ada atauya-vagila amadumadu ke yadayada anavelu wagaine aluku melala anayegana Futioli.14Ada wadedeku-deya tovetumagana tufodi anuwagadi ke ivagaulema anau yadi manuweya, ada wagaidiya amiyamiya yadayada seveni. Ada muliya asegedi aku agemeya anaunau Loma wagaine. 15Ada moyaima anaunau aku badi tovetumagana Loma wagaine valeyama inogalina, e ada itauya inamadu bodebodema. Tufodi nodi avenuwaga maketi anafafali Afiya wagaine, kaduwe tufodi melala anayegana Manuwa Wakawaka Toiye wagaine avenuwaga. Ada Paulo giitadi ayo Yaubada wagaine givesiule ada giasevatu.16Tova-nai Loma wagaine ayegemona, ada kabemali Paulo iawaegena ke manuwa seyana wagaine anakaibe gina miyamiya aku tolugaviya seyana gina itaitaveyabina, keke ginaota faina.Loma wagaine Paulo gilumamala meIsileli wagaidiya.
17Ada yadayada toiye giavaidi, Paulo meIsileli aditonagonayavo Loma wagaine gidouwevagauwidi. Ada bademowa ivagauta-yabu ada givonedi, givona, “Tubuiyakuweyavo, Iya keke tamo gavana koyona gadagai yada yooyavo wagaidiya, keke. Kaduwe adagiduwa tamadeyavo nagona wagaidiya ivewaleda ani keke gada awavekoyoye, keke. Nonogana meIsileli Yelusalema wagaine ikiveyabiku ke iatuegeku meLoma wagaidiya.18Ada Loma kabemali itoliluveluveku evona ina nuwagana tunutunugina gavakoyona gagai ayo ida luvealikaku, aku keke tamo vuvu ida nuwaga faina, nuwanuwadi ina etoyavuku gananau.19Aku badi meIsileli iawafatafata toyogina, ivonedi vaita keke ina etoyavuku. Tainei faina wai seya-moena wagaine akufaiweya gananau, ani gana veola ke Sisa wagaine gana vonayavuga. E ada taidei anafaiweya gaveola, aku keke vaita tamo gavana faina yaku yoo gada awavekoyoyedi banae matane, keke.20Taide vuvuna-nai faina imiyavo gadouwevagauwimi e ada nodi kana ifufu. Banae-nai ide meIsileli moyaida kanuwavetumaganena ginaela gina kibababaleda ani Iya gavetumaganena faina, seini taidei wagaine yogoyogoku gamiyamiya.” Taidei anafaiweya Paulo meIsileli aditonagona givonedi.21Aku meIsileli ivonena, “Keke tamo leta ada nuwaga Yudiya anafafali wagaine o fainiya, kaduwe keke tamo gaito tubuiyada seyana gidaelai idedeku gida awamogatala fainiya o kai gida awavekoyoyeni.22Aku nuwanuwama ya nuwanuwa ana nogalina, faina aalamanena kaliva fafali moyaina wagaidiya taidei Yeisu kwana Nasaledi yana yoo iawavekoyoyedi.”23Taidei anafaiweya ivona aku yadayada ivenuwadadanena ke kaduwe ina vagauta-vagila faina.Ada yadayada-nai ginuwagana wagaine, meIsileli tufona moyaidi ivagauta ke ielai manuwa-nai wagaine Paulo gimiyamiya. Ada yana kivemala malabutuya givevuvuna ani ginauwena-deya mala givebogina. Giifufuyedi Yaubada yana ebaveimeya faina, ada Mosese yana veimeya kadu falofita yadi vetokiluma Buki Tabu wagaine, gavana ivonavona Yeisu faine ani giveyawana badi wagaidiya. Faina nuwanuwana nuwadi gina kanidi vaita Yeisu velemoena Mesaiya, Banae-nai ibodabodana.24Ada tovanenega tufodi Paulo yana vona ivetumaganena, aku tufodi keke ida vetumagana.25Ada nodi ivevonavona e ada ivebutu itautauya, aku nagona Paulo vona seya-moena giifufuyena wagaidiya, givona, “Aluwaluwa Tabuna yana vona tamamiyavo nagona wagaidiya ani givona velemoena, tainei falofita Aiseya awane givonayena,26‘Unanau yoo taidei wagaidiya ada una vonedi,“Tova moyaina bonaku wana noganogalina aku keke nuwami gina mamali.Kaduwe yaku gugai wana itaitana aku keke adinuwanuwa wana itainana.”27Faina ida yoo-nai ani aseasedi ikuga ada tagadi ikulu ke matadi ikibodadi.Aku kai ida awaegedi aga matadiya idaita ke tagadiya ida nogala,ada aseasedi wagaine nuwadi gida mamalinake wagaikuya ida miyaviladi ada gada kiveiwakanedi.’Taidei anafaiweya Aiseya givona.”28Ada kaduwe Paulo givonedi, givonaga, “Tayuwe faine nuwanuwaku wana alamanena, Yaubada kibababala anamatawa ani bademowa giimilina badi keke meIsileli wagaidiya. Ada badiyavo ina venogalena.” [29Ada taidei anafaiweya givona muline, meIsileli itauya inaunau aku nodi ivevonavona toyogina yana vona-nai faine.]30Aku Paulo manuwa-nai wagaine gimiyamiya malamala iluwei, ada manuwa fatana ani tauna gilulufata. Ada gavega moyaidi iela ina madubodana ani givagauledi iluku yana manuweya.31Ada Yaubada yana ebaveimeya faina gilulumamaledi ke kaduwe wa yana asevatu givevewaledi Kauveya Yeisu Keliso faine. Ada keke tamo gaito gida galuvaluva ke gida awata. Taidei anafaiweya.