1 Timoti3
Ekalesiya anatonagonayavo yadi dewa faina.
1Taidei seyana vona wa anavetumagana. Vetonagona ekalesiya wagaine ani gugai iwakana, ada kai gaito nuwanuwana gina vetonagona aga tainei yana nuwanuwa-nai iwakana.2Ada tonagona anaveimeya ani taidei anafaiweya. Banae kaliva-nai gilubodana gina dewadewa iwakana tova moyaina kaliva matadiya, banae keke mata vevivevinena au vavinena adikaibe-mowa. Bana gilubodana tauna yana dewa gina itaveyabidi velemoena, wa yana nuwauya tauna gina awatana e ada keke ginadewa anafaiweya kwavakwava, banae wa anavemoimoina, kaliva gina sivaivaidi yana manuweya, ada bana yana vewala anafata asease gina onana.3Kaduwe, keke gida luboda gufa toyogina ginayuga kwavakwava, keke gina vemunumunuga, aku analauboda nuwanuwaobuna ada bonana bikana. Banae keke gida luboda kaliva nodi tova moyaina ina gavekwavekwageya, ada keke analauboda banae giba o kai mani gina itaitaluvadigedi.4Ada kaduwe gilubodana gina vetoveimeya iwakana tauna yana manuwa anatomiya wagaidiya ke gina itaveyabi-dewedewedi, ada natunavo gina kivetunutunugidi ke yadi tagakulu gina awatana aku tamadi ina vemoimoinena.5Faina kai kaliva seyana keke anafata tauna yana manuwa anatomiya gina veimeyedi e ada bonana keke inaabi, aga gavaiyamu Yaubada yana ekalesiya gina itaveyabidi?6Kai banae Yeisu anatovetumagana evaguna, aga keke gida luboda gida vetonagona aenanai gina nuwalaka faina wamadu venuwadadanena. E ada Seitani yana nuwalaka faina anamatavuloga ginuwagana anafaiweya, banae kaliva-nai kaduwe anamatavuloga gina nuwagana.7Kaduwe ekalesiya anatonagona-nai gilubodana yana dewa iwakana, e ada badi gavega keke Keliso ida vetumagane ani ina alamanena vaita banae kaliva iwakana. Kai keke, aga ina awavekoyoyena ada ginabeu Seitani yana dai wagaine.Tolemeyavo adiveimeya.
8Ada kaduwe anafaiweya tolemeyavo. Gilubodana inadewa iwakana ke kaliva ina vemoimoinedi velemoena, keke meyadi lagalagana, keke gufa toyogina anatoyuga-faila, kaduwe keke gida luboda ina vefwayafwaya aku kaliva yadi giba ina vaivaidi.9Gilubodana Yaubada yana nuwanuwa-nai malinai Keliso giivemogatalina wagaideya, ani wa yadi nuwafou yegayegana ina vetumaganena ke ina matawalewaleyena.10Muliya-yo badi gavega kana venuwadadanedi ina vetoleme, nagona yadi dewa kanaita-dewedewena. Ada kai yadi nuwanuwa ke yadi dewa iwaka-moena ina seseyegemonena e ada keke tamo gaito anafaiweya gina awavekoyoyedi, aga au kana silakaidi ina vetoleme.11Aku kaduwe vavinediyavo anafaiweya, gilubodadi inadewa tunutunugina e ada wa adivemoimoina, keke kaliva o kai vevine ina veveloidi e ada adiyegana ina kikivekoyodi, ada wa yadi nuwauya taudiyavo ina awatadi e ada keke inadewa anafaiweya kwavakwava. Ada kaduwe wa adivetumagana yadi gugai moyaidi wagaidiya.12Toleme analauboda keke mata vevivevinena au vavinena adikaibe-mowa, ada natunavo ke yana manuwa anatomiya gina itaveyabi-dewedewedi.13Kai badi toleme Keliso yana yoo adamwatuguya ina gugai iwakana, aga kaliva ina vemoimoinedi e ada taidei wagaine ina asevatu-mowa yadi vetumagana Yeisu Keliso wagaine.Yada tafalolo vuvuna Yaubada givemogatalina ani nuwanuwa lakaina.
14Natuku, ganuwavetumagana vaita tova kabisona ganaelai wagainiya. Aku ida kivetunutunuga gavetokilumina taidei ya leta wagaine15e ada kai yaku yewa anatova gana seliyena, aga taidei leta-nai wagaine una alamanena gavaiyamu kadadewa Yaubada yana yoo wagaidiya. Tainei yoo-dina ani Yaubada miyamiyani-vagaina yana ekalesiya, ada anafaiweya ogola toyogidi manuwa iwaiwailakaina, tainei anafaiweya ideyavo Yaubada yana yoo gagana ani nuwanuwa velemoena kawaiwailakaina.16Vona velemoena yada tafalolo vuvuna Yaubada givemogatalina ani nuwanuwa lakaina. Taidei vuvuna-nai ide kaliva wa yada vemoimoina taudeyavo kaawaawaegeda Yaubada wagaine ke katafatafalolo, ani taidei anafaiweya.Banae givekaliva, kaliva vovona giosena. Bana kaliva yegayegana ani Aluwaluwa Tabuna giseyegemonena. Aneloseyavo iitana. Valeyana kaliva ilumamalena badi gavega keke Yaubada ida alamane ani adimwatuguya fafali moyaina wagaidiya. Kaliva babiya ivetumagana wagaine. Yaubada gisilakaina gabameya wa yana iwakana mamalina nodi.
E, taidei anafaiweya yada alamana Yeisu Keliso faine.