Read 1 Pita 3

1 Pita3

Vemoimoina tovetumagana adalauboda, vevine ke moganemiyavo faimiya.

¹Ada kaduwe anafaiweya, imi vevine naginagi ani taumiyavo wana awaegemi ke moganemiyavo yadi veimeya dibune wana miyamiya. Kai tufomi moganemiyavo Yaubada yana vona keke ida vetumagane, aga meyameyaganina yami dewa bikana ke yami vemoimoina wagaidiya yadi nuwanuwa wana kiviladi e ada Yeisu ina vetumaganena. Keke vaita yami ifufu wagaine yadi nuwanuwa wana kiviladi, aku au yami dewa yegayegana ada kadu yami vemoimoina ina itaitana ayo ina nuwavilana.³Keke wana galuvaluva ke taumiyavo amiaiwaka wana seseyegemonedi vovo anaveigavu wagaidiya, anafaiweya kuluwami wana lulumetadi, o kai ododo kaikaiwabudi fatadi lakaina wana veveyagedi, o kai nuya lunamanamalidi wana oseosedi. Keke gida luboda vovo anaveigavu nuwami gina vaivai,⁴aku aiyada amiaiwaka gida yegemona nuwainagemi wagaine-deya. Veigavu-dina wagaidiya wada veiveigavumi ani nuwanuwa bikana ada nuwaniwalova. Ida veigavu-dina Yaubada matane ani gaitoma lakaina, ada keke ginaavai.⁵Faina badi tova tuwaina anavevine tabutabudiyavo wa yadi nuwavetumagana Yaubada wagaine iawaegedi, ani tainei anafaiweya taudiyavo iveiveigavudi. Ee, moganediyavo ivemoimoinedi ada yadi veimeya dibune imiyamiya.⁶Ebaita seyana ani Sela. Badi moganedi Ebelaamo ivemoimoinena lakaina ada ivewagana ‘kauveya’. E ada kai wanadewa iwakana Sela anafaiweya ada keke maita gavana faine wana matamatauta, aga imi vaita velemoena Sela natudiyavo.

⁷Aku imi moganediyavo ani kaduwe anafaiweya. Vavinemiyavo nodi wana miyamiya aku nuwami gida malina vaita badi yadi toyogina keke anafaiweya kaliva. Ada kaduwe yawai-vagata-nai Yaubada wa yana nuwadoga giavetavetalena ani imiyavo ke badiyavo nodi aigaigabuya wanuwagana, e ada wa yami vemoimoina wanadewa iwakana wagaidiya. Taidei anafaiweya wana dewedi e ada yami veoveola Yaubada gina nogalina, ada keke tamo gavana gina siveyeveyewa.

⁸Ebalauyabu, ani matatabumi wanaelai seyana nuwanuwa wagaine, ada tubuiyamiyavo adilutovona wana lutovoni-vaisedi. Tamami Yaubada seya-moena ada wavegabu seyana, e ada tubuiyamiyavo wana nuwakabubuyedi vaita badi amitubulugayavo anafaiweya. Ada kaduwe, wa yami nuwakabubu wana nuwakalikaliyedi. Ada keke wana nuwanuwa toyogina taumiyavo amiyegana faine, aku wa yami nuwaobu wana nuwanuwa.⁹Kai kaliva inadewa koyona wagaimiya, aga keke kaduwe dewa koyona wagaine wana lufata wagaidiya. Ada kai wa yadi vona koyodi ina awalavemi, aga keke wana fataveyewa vona koyona wagaine. Keke anafaiweya wanadewa, aku aiyada badi idewa koyona wagaimiya ani wana awanuwakabubuyedi. Faina taidei Yaubada yana nuwanuwa faimiya, ada gidouwemi ke taidei anafaiweya wana dewadewa e ada gina awanuwakabubuyemi faine.¹⁰Taidei dewa-nai faina vona seyana Buki Tabu wagaine ivetokilumina ani givona,
“Kai nuwanuwami wa yami vemwamwalawana miyamiya ada kai amiiwakana tova ke tovawana nuwanuwagana, aga gilubodami vona koyonake fwaya keke awamiya gina yegeyegemona.¹¹Dewa koyona wana vedomobubusediaku wanadewa iwakana.Ada nuwami wana sevelavelalaina ke kukuya wagaine wana miyamiya.¹²Gilubodami taidei anafaiweya wanadewa, fainatoyegayegana wagaidiya Yaubada matana gise-vagaina ke giitaitaveyabidi,ada kaduwe yadi veola givenovenogalena.Aku badi gavega dewa koyona igugugaiyena ani givevenibainedi.”Taidei anafaiweya Deivida awane Yaubada givona.

Kai uloulolo kana nuwagana yada dewa iwakana faina.

¹³Aku kai tova moyaina wa yami idibumwaiga dewa iwakanaga wana gugugaiyena, aga gavaiyamu, tamo gaito gina veumagigiyemi? Keke tamo.¹⁴Aku kai yami dewa iwakana faina uloulolo wana nuwagana, aga Yaubada gina awanuwakabubuyemi. Badi ikiveuloulolonimi ani keke wana matamatausedi ada kaduwe keke nuwami gina nauna faine,¹⁵aku aiyada nuwainagemiya Keliso wana vemoimoinena, Banae yami Kauveya tabutabuna, keke maita wa yana koyona aku yegayega-vagaina. Banae wanuwavetumaganena gina kwayabumi ke gina lemelememi yawaimi matatabuna wagaine ada aimo nodi gabameya wanamiya-vagata, e ada gilubodami taidei yami nuwavetumagana-nai vuvudi wana alamane-dewedewena. Wana alamane-dewedewena e ada bademowa kikidewedewemi ke laufata wana alamanena, e ada gavatoveya tamo gaito gina tolidadanemi, ginavona, “Gavana faina Yeisu wavetumagane?” aga wanamadu kivemala iwakana wagaine,¹⁶aku wa yami nuwanuwa bikana ke wa yami vemoimoina nodi. Imi bademowa Keliso nodi waveseyana faina, gilubodana yami dewa wana itaveyabidi ke nuwafoumi ani yegayegana, keke bwanebwanenena wakoyona faina. E ada badi gavega ina awavekoyoyemi faina imi Keliso yana yoo, ani aimo yami dewa iwaka-vagaina ina itana e ada ina vovomumu yadi awavekoyo faidiya.¹⁷Kai Yaubada yana nuwanuwa anafaiweya ada yada dewa iwakana faina uloulolo kana nuwagana, aga ina iwaka-moena ayo kai yada dewa koyona faina uloulolo kana nuwagadi.¹⁸Waitana, Keliso kaduwe uloulolo ginuwagana yada koyona faidiya. Banae yegayega-vagaina nonogana ide keke maita yegayegadeyavo ani faideya gialika. Gialika tova seyanaga e ada gina vagauleda kananau Yaubada wagaine. Vovona iluvealikana, aku Yaubada Aluwaluwana gisiveyawana¹⁹ada gitoyogivelena. E ada Keliso ginau toalika yadi fafaliya ke gilumamala badi aluwaluwadi yogoyogona wagaidiya.²⁰Taidei toalika-dina aluwaluwadi, ani tuwai-moena Nowa yana toveya badi keke nuwanuwadi ina awaegedi Yaubada yana veimeya wagaine. Ada Nowa aki giyogoyogona aku Yaubada wa yana atuvefaila giboda tova manamanawena vaita ida nuwavilana, aku keke. Ada tova-nai Nowa aki giyogo-yabuna ani keke kaliva moyaidi idayage, au adieita gagana kibababala inuwagana gufa wagaine.²¹Taidei gufa-nai ani yada vonaluvefosa babitaiso faina, babitaiso-nai wagaine tova malinai gikibababalemi. Babitaiso tainei ananuwanuwa ani keke vaita bwanene-mowa ginakola-yavule, aku aiyada babitaiso-nai wagaine kavonadabadaba vaita bademowa kanuwavilana yada dewa koyona wagaidiya-deya, ayo Yaubada nuwafouda anabwanene givaiyegena. Taidei amikibababala gikivemeyameyaganina faina Yeisu Keliso alikeya giyawa-vagila,²²ada gilaka gabameya ke Yaubada aiyatagine gimiyamiya, ivi-nai wa anavemoimoina lakaina wagaine. Ada gabama anaaneloseyavo, ada anatoveimeya, ke anatotoyogina, ani matatabudi Yaubada gisedi Yeisu yana veimeya dibune.