Read MATEYO 27

MATEYO27

Yesu bamutwala kuli Pilato

¹Ulukelo basimapepo bakindami bonse na bakalamba ba bantu balikumene baumfwana fintu bengepaya Yesu.²Balimukakile bamupiita bamutwala ku mulashi Pilato.

Imfwa yakwa Yuda

³Lintu Yuda uwamufutwike amwene ukuti Yesu bamupingwila imfwa, alilangulwike pali fintu akitile. Abwesesyemo ulupiya lwa siufele amakumi yatatu kuli basimapepo bakindami nentungulusi,⁴ukuti, “Nalibembwike, pantu nafutwike umuntu uwakaele!”
Bamwaswike ukuti, “Uyo Mulandu obe!”

⁵Yuda aposele ulupiya mwi Tempele nokuyaikulika.

⁶Basimapepo bakindami batolele ulupiya nokulanda ukuti, “Ulu lupiya lwamulopa, takyasuminisiwa mwifunde lyesu ukulubika mukipao kya mwi Tempele.”⁷Eikyo baumfwene ukusitamo ibala lyakwa kabumba wa nongo, umwakulasika bamwisa.⁸Ekintu iyi nkende nandakayi itilwa ukuti “Ibala lya mulopa.”

⁹Ifyalandilwe kuli kasesema Yeremia fyalifikilisye ukuti, “Bapiitile ulupiya lwa siufele amakumi yatatu emutengo untu abena Israeli bamusitisisyepo,¹⁰bailesitamo ibala lyakwa kabumba wa nongo ngafintu Imfumu yalandile.”

Yesu na Pilato

¹¹Yesu bamutwele kumulashi Pilato uwamwipwisye ukuti, “Busye uuli Mfumu yaba Yuda?” Yesu ayaswike ukuti, “Naulanda.”¹²Lelo lintu basimapepo bakindami na bakalamba balemwebelela, tayaswikepo nangu kimo.

¹³Pilato amwipwisye ukuti, “Busye tauleumfwa ifintu fyonse ifi fintu balekwebelela?”

¹⁴Lelo Yesu alikene ukwasukapo isiwi nangu limo, iki kyalengele Pilato ukupapa.

Yesu bamupingwila ukufwa

¹⁵Lyonse pe Pasaka, umulashi alebakakwilapo umufungwa umo untu abantu balefwaya.¹⁶Pali iyi nsita kwali umufungwa umo uwali naisibikwa uwaleitwa ukuti Balaba.¹⁷Lintu ibumba lyakolongene, Pilato abepwisye ukuti, “Busye ninani mulefwaya imikakwile pali Balaba na Yesu uwitwa Klistu?”¹⁸Pilato alisibe ukuti baaletele Yesu kuli ena pamulandu nomufimbila.

¹⁹Lintu Pilato ali naikala pakipuna kya bupingusi umukasi wakwe amutumine amasiwi ukuti, “Wikita nangu kimo pali uyo muntu wakaele, ninkyusiwa apakalamba mukiloto pamulandu noyo muntu.”

²⁰Lelo basimapepo bakindami naba kalamba basongelekenye abantu ukuti balombe ukubakakwila Balaba elo Yesu ena bamwipaye.²¹Pilato aipwisye ibumba nakabili ukuti, “Busye pali aba babili, ninani mulimukufwaya imikakwile?”
Bayaswike ukuti, “Balaba!”

²²Pilato abepwisye ukuti, “Busye nomba inkite syani kuli Yesu uwitwa Klistu?”
Bonse bayaswike ukuti, “Mutanikeni!”

²³Lelo Pilato abepwisye ukuti, “Mulandu nsi akitile?”
Batampile ukubilisya nomba ukukilapo ukuti, “Mutanikeni”

²⁴Lintu Pilato amwene ukuti tapali kintu engakita kuti ifimfulunganya fyaimafye, aabulile amensi, asamba kuminwe pamenso yabantu bonse nokulanda ukuti, “Nsiliimo muli iyi mfwa ya uyu muntu, mulandu wenufye!”

²⁵Ibumba lyonse lyayaswike ukuti, “Lekeni umulopa wakwe ube pali fwebo napabana besu!”

²⁶Pilato abakakwilile Balaba, kabili panuma alopola Yesu abapele ukuti bayemutanika.

Abasilika bapunika Yesu

²⁷Abasilika ba mulashi batwele Yesu mukipango, elo bakolonganika nempuka ya basilika yonse.²⁸Yesu bamufulile insalu syakwe nokumufwika umwingila wakasika.²⁹Bapikwile iŋana yamyunga bamufwika kumutwe, nokumufumbatika itete kukulyo. Balemufukamina nokumupunya ukuti, “Mulopwe kanabesa wemfumu ya Bayuda!”³⁰Balemumfwisila amate, bamupoka itete balamuma ku mutwe.³¹Lintu bapwisisye ukumupunika, bamufulile umukansu bamufwika insalu syakwe, Elo bamutwala mukumutanika.

Yesu bamutanika

³²Lintu baleya, bakumenye umwaume uwalefuma ku Sirene isina lyakwe ni Simoni, kabili abasilika bamupatikisye ukupiita umusalaba wakwa Yesu.³³Bafikile kunkende iyaleitwa Gologota, ikilepilibula ukuti, “Inkende ya Fipaanga”.³⁴Bapele Yesu umwangasi wasankana nendusya ukuti anwe, lelo panuma abika palulimi, alikene ukunwa.

³⁵Lintu bamutanike, balependula pakwakana insalu syakwe.³⁶Nokwikala pansi balamulinda.³⁷Pamulu wamutwe wakwe babikilepo akapampa apalembelwe umulandu untu bamwipailepo ukuti, “Uyu ni Yesu Imfumu ya Bayuda.”³⁸Batanikepo notupondo tubili kamo kukulyo nakambi kukuso.

³⁹Abapita nsila balepukunya imitwe nokutuka Yesu insele,⁴⁰balelanda ukuti, “Ewebo walelanda ati kuti wabongolola itempele nokulikula nakabili munsiku sitatu! Ngoli Mwana wakwa Lesa ipususye! Ikila pamusalaba!”

⁴¹Mu musango umowine basimapepo bakindami na bakafundisya ba Mafunde na bakalamba ba bantu balemupunika ukuti,⁴²“Alepususya bambi, lelo ena teti aipususye! Nga nimfumu yabena Israeli, akoke pamusalaba! Elintu twalamusumina!⁴³Aketekele muli Lesa, ale Lesa namupususye ngalimutemwa, pantu alelanda ati, ‘Ndimwana wakwa Lesa!’”

⁴⁴Notupondo tubili utwatanikwe pamo nao twalemusalula.

Imfwa yakwa Yesu

⁴⁵Ukufuma lintu akasuba kafikile pamutwe pansita ya 12 koloko mukyalo monse mwafiitile nafititi, ukufika napansita ya 15 koloko.⁴⁶Pansita ya 15 koloko Yesu alilile mwisiwi ilikalamba ukuti, “Eloi, Eloi, Lama sabakatani?” Ikilepilibula ukuti, “Lesa wandi, Lesa wandi, Nikinsi mwandekelesesya?”

⁴⁷Lintu bamo pabaali nabeminina palya baumfwile ifi, balandile ukuti, “Aleita Eliya.”⁴⁸Palyapene, umo pali bena abutwike ayapiita umwepu atubika mu mwangansi wakantuka, autunga kwitete nokupa Yesu ukuti anwe.

⁴⁹Lelo bambi balandile ukuti, “Tulolele, tumone Eliya ngalaisa mupususya!”

⁵⁰Kabili lintu Yesu apundile isiwi lyapamulu, awe aleka nomweo.

⁵¹Pali ilya nsita insalu baali nabatanika mwi Tempele yalepwike pabili ukufuma pamulu ukufika pansi. Isonde lyalitentele, amabwe yalilepawike,⁵²imanda syaliswike, abantu bamusilo abengi abali nabafwa balibusiwe.⁵³Bafumine mu manda, napanuma yakubuka kwakwa Yesu baile mumusumba wamusilo, nokuyamonekela kubantu abengi.

⁵⁴Lintu umukalamba wabasilika nabasilika abalelinda Yesu baumfwile makumba nokumona ifintu fyonse ifyakitike, bakwetwe nomwenso nokulanda ukuti, “Mukisinka uyu muntu aali Mwana wakwa Lesa!”

⁵⁵Kwali banamayo abengi, abaletamba akatalamukila, bakonkele Yesu ukufuma ku Galili kukulamutangata.⁵⁶Pali bena pali Mariya Mangadelena, Mariya nyina wakwa Yakobo na Yosefu, nanyina wabana bakwa Zebedee.

Ukusikwa kwakwa Yesu

⁵⁷Lintu kyali ikyungulo, kwaisile umukankala ukufuma ku Alimateya isina lyakwe ni Yosefu, kabili nao ali musambi wakwa Yesu.⁵⁸Aile kuli Pilato mukulomba ikitumbi kyakwa Yesu. Pilato apele insambu ukuti bapele Yosefu ikitumbi.⁵⁹Eikyo Yosefu apiitile umubili wakwa Yesu aupomba munsalu iyipya,⁶⁰aubika namumanda yakwe iipya intu afonkwele mwilibwe. Elo akunkulusisyapo ilibwe ilikalamba pamwinsi wamanda aya nokuya.⁶¹Mariya Magadalena na Mariya mubiye bali nabekala kulyakwine apalungatene nemanda.

Balonda imanda

⁶²Ubusiku bwakonkelepo, panuma yabusiku bwakupekanya, basimapepo bakindami naba Falise baile kuli Pilato.⁶³Balandile ati, “Mwemfumu, natwibusya fintu ulya muntu wabufi alelanda lintu ali umumi ukuti, ‘Nkabuka nakabili panuma yansiku sitatu.’⁶⁴Peleni abakulonda imanda yakwe bwino bwino mpanka nobusiku bwabutatu, pakuti abasambi bakwe bekeyamwiba elo bakaleyeba abantu ukuti nabuka kubafwa. Ubu bufi bwakulekesya bukabipapo ukukila ubwakwambilapo.”

⁶⁵Pilato abebele ukuti, “Piiteni abakulonda, musininkisye ukuti balonda bwino bwino imanda ngafintu mwisibe.”

⁶⁶Efintu bailefenenkesyapo, basyapo nabasilika bakulonda.