Nu-kɛ̀ʼ-bə17
1Mbyu wontəŋNyii mu bʉəntəŋNyii təkwiitia ndə bɔ̂ŋ kə kie bəbaŋ gheghe le gwè ghɔ̀ŋ tʉ mɔ mbɔ, “Gwè, mɔ bu dʉ̀ʼ tʉ a, ntɛ ndə Nyii bu kwɛ̀ sɔ́ʼ fɔŋ sɔkʉʉ, yəŋkwɛʼtəŋ-ghɔ̄-kə ndə bə bɔ́ŋ mbʉə ŋgwɛŋhə buŋmbi.2Bəfɔŋ kəwʉʉnəmbi-bɔ̄ŋ nɔʼ gháa bəsəŋ ghɔŋ bɔŋ, bʉə-kəwʉʉnəmbi nɔʼ búu bʉʼka ndʉʼ-sɔkʉʉ-mə-i ndə bɔ̂ŋ nú.”3LyʉʉhəNyiikə jyʉ́ʉhə mɔ, mbʉ wontəŋNyii lʉ̀ mɔ gɛ̀ nə mɔ mu kwɔŋkəyəŋnə. Mɔ nyíɛ woke, ɔ kə́ dùʼ ndəŋ nyaa bʉəbʉəbɛʼ ndə ɔ bɛ kəmbuu buuŋ, bə nyɔ̀ʼ yietə yə̀ŋ mbʉə-e fúu ndə i tʉʼ chɛ̀ŋtə Nyii, mbʉ nyaa-ghɔ̄ kie tʉbə təkwiitia nə ndʉʉhə wuŋ.4Mbʉ woke nɔ kə mɔ̀ʼ ndyi kəmbuu fʉ́əŋ leʼnə ndyi-kəmbuu-buuŋ-hə mbʉə-ɔ, leʼnə fɔ-ŋgwuŋ-bə mbʉə-ɔ ndə bə chìi nə goo leʼnə ŋgoʼ-chuɔŋ-chyʉʉchyʉʉ-hə ghɔŋbə səŋ-chuɔŋ-chyʉʉchyʉʉ-bə, ɔ yá ndʉ̂ʉ kəghɔ-ɔ ndə bə chìi nə goo, i kə́ bɛ ilə́ŋnə nə nu-bʉəbʉə-bə ghɔŋbə fɔ-nyàatə-bə ndə i gwè hə ndə məgháa bəsəŋ-bi.5Bə nyɔ̀ʼ yie chutəyi-ɔ ndə i bɛ yie ŋguu mbɔ, “Babilɔŋ shʉ́əshʉ́ə, ŋkwê bəsɔkʉʉ, naa ndə ɔ gwè nə nu-nyàatə-bə inchəŋ kəchisê.”6Mɔ nyíɛ mbʉ woke, ndə ɔ nɔʼ búu nə fɔbʉə-bʉə-Nyii-kə, bʉə ndə bə yítə bɔŋ bʉʼka bɔ̂ŋ kə́ kwə́ʼ shʉəŋ ntaa te Jiso. Ndʉʉ ndə mɔ kə nyíɛ ɔŋ, i chàa mɔ.7Bɔŋ mbʉ wontəŋNyii bíʼtə tʉ mɔ mbɔ, “Chìi ka i chàa a?” Mɔ bu kɛ̀ʼ ŋguu tʉ a te woke-ɔ̄ leʼnə mbʉ nyaa bʉəbʉə, ndə ɔ kie tʉbə təkwiitia nə ndʉʉhə wuŋ, ndə i bɛ̀ʼ ɔ.8Mbʉ nyaa bʉəbʉə ndə a kə nyíɛ nɔ, nɔ kə fəŋ bɛ ŋɛnə bɔŋ nɔʼ kwú, bɔŋleʼ bʉ̀nə bɛ ndə məkóʼ mu byʉʉ ndə i gòʼ təmə kie liʼ-i fɛ, kə́ gɛ̀ bə bʉ́əhə ɔŋ. Bʉə ndə bɔ̂ŋ bɛ kəchisê ndə bə kə gòʼ təmə nyɔ̀ʼ yietə-ʉə mu ŋwɔʼnə məchímbi lʉ̀ hə ndəŋ ŋgwunə fɛ, i bu chàa bɔŋ ndə mənyíɛ mbʉ nyaa bʉəbʉə bʉʼka ɔ nɔ kə bɛ, təmə bɔŋleʼ kə bíe fɛ bɔŋleʼ bɛ ndə məbʉ̀nə gwè.9Yɔ̄ŋ-yə nɔ tʉʼ dʉ̀ʼ nu-mukətʉ-súunə-kə, mbʉ bətʉ təkwiitia nɔ bɛ kwɔŋhə təkwiitia ndə mbʉ woke dùʼ ndəŋ ghɔ,10bɔ̂ŋ nɔ bɛ bəfɔŋ təkwiitia ghɔ. Bəfɔŋ itaa nɔʼ byùutə, imɔʼ kə́ bíe sɔ́ʼ, ibɛʼ-yə kə́ bíe ndə məkóʼ kəkʉə, bɔŋ ndʉʉ ndə ɔ bu kóʼ kəkʉə nɔ ɔ sɔ́ʼ haʼ ndəŋ kʉʉkə məniʼ.11Bɔŋ ndə mbʉ nyaa ndə ɔ nɔʼ nə fəŋ bɛ təmə bɔŋ kə leʼbíe nduɔ fɛ, nɔ bɛ fɔŋ ndə ɔ tyúnə bɔ̌ŋ fəŋ vɛʼ təkwiitia. Ɔ nɔ bɛ ndə bəbɛʼbəfɔŋ-bīŋ təkwiitia ghɔ ɔ bɔŋ-kə́-leʼ gɛ̀ bə bʉ́əhə ɔŋ.12Mbʉ ndʉʉhə wuŋ ndə a kə nyíɛ nɔ bɛ bəfɔŋ wuŋ ndə bɔ̂ŋ gòʼ təmə nɔʼ chʉ́ʉhə ndə məsɔ́ʼ lɔʼɔ kətə̂ŋ fɛ. Bɔ̂ŋ bɔŋ bu kie ghʉəʼkə ndə məsɔ́ʼ nə bəfɔŋ ndə vaa kəkʉʉ məniʼ, ghɔŋbə mbʉ nyaa bʉəbʉə.13Bəfɔŋ-bɔ̄ŋ wuŋ nɔ kie ŋgiekə imɔʼ, bu kɔ́ kuŋhə-ʉə ghɔŋbə ghʉəʼkə-ʉə tʉ mbʉ nyaa.14Bɔ̂ŋ bu lɔ̀ hə bɔ̌ŋ mbʉ Vaabinjyʉʉ nə chɔ̂ bɔŋ mbʉ Vaabinjyʉʉ ghɔŋbə bʉə ndə bə nɔʼ kə tíi bɔŋ, séʼ bɔŋ, bɔ̂ŋ bɔŋleʼ kə́ tə́nə ndəŋ shʉəŋ, bu ghɔ́ʼ bɔŋ bʉʼka mbʉ Vaabinjyʉʉ nɔ bɛ Tiekətʉ bətiekətʉ bɔŋleʼ kə́ bɛ Fɔŋ bəfɔŋ.15Mbʉ wontəŋNyii ghɔ̀ŋ tʉ mɔ mbɔ, “Mbʉ muu ndə a kə nyíɛ kəyəŋ ndə mbʉ sɔkʉʉ dùʼ chɔ, nɔ bɛ bie-bʉə-hə ghɔŋbə nuɔ-bʉə-tə buŋmbi leʼnə lɔʼ-bətə̂ŋ-tə ghɔŋbə ŋgie-bətə̂ŋ-bə.16Mbʉ ndʉʉhə wuŋ ndə a nyíɛ, ghɔŋbə mbʉ nyaa bʉəbʉə bu bàa mbʉ sɔkʉʉ. Bɔ̂ŋ bu chìi ɔ nʉ̀ʉ fuŋ, bɛ kənchiʼtʉʉ, kwó mbɔʼ-mbʉə-e bɔŋleʼ tɔ̀ŋ ɔŋ nə viʼi.17Bʉʼka Nyii nɔʼ kɔ́ mu fyii-bɔŋ mbɔ b̈ɔ̂ŋ fɔ̀ʼ nukə ndə mbəŋ-ɛŋ Nyii kie mu fyii-ɔ, ndə məkie gyʉʉ imɔʼ chɔ̀ʼhə ghʉəʼkə-ʉə kɔ́ tʉ mbʉ nyaa bʉəbʉə ndə məsɔ́ʼ fɔŋ, tʉ nukə ndə ŋgieNyiikə ghɔ̀ŋ i fyú shʉəŋ.18Mbʉ woke ndə a kə nyíɛ, nɔ tə́nə ndə fɔŋ kəyəŋkwɛʼtəŋ ndə ɔ tʉʼ gìe kətʉ bəfɔŋ kəchisê bənchəŋ.”
Wycliffe Bible Translators, Inc.