Filibai3
1Ndə məlìʼ, bəliŋ-bɔŋ, ẗʉʉtə-ii kə́ bʉ̀ʉ mu Tiekətʉ. Ndə məbʉ̀nə bìʼ líʼnə nukə ndə mɔ nɔʼ kə nyɔ̀ʼ tʉ bii kaa nubɛʼkə tʉ mɔ fɛ, bʉʼka i bu kwáa bii.2B̈ii láa bʉə-fɔʼɔ bənu bʉəbʉə, nɔ bʉə-ghɔ̄bə ndə mɔ tʉʼ tíi bɔŋ nə bûhə kə́ bɛ bʉə ndə bɔ̂ŋ tʉʼ lyʉ̀ʉ mbɔ bə nɔ kie ndə məfɔ̀ʼ wo ɔ buŋ kie ŋkwaaNyii, b̈ii láa bɔŋ!3Bʉʼka nɔ bɛ bʉʼʉ bɛ bʉə ndə bə nɔʼ kɛŋ fɔ̀ʼ bɔŋ, bʉʼka bʉʼʉ nɔ tʉʼ lə̀ʼtə Nyii nə Lyʉʉhəkə-i. Bʉʼʉ nɔ tʉʼ ŋàʼtə bʉʼka Klai Jiso, fyiihə-ʉʼʉ tʉʼ shʉ́ə ndəŋ nubə ndə fɔ̀ʼ woməsʉʉ fɛ.4Ndə ŋgie-shʉəŋ-kə, mɔ nɔ kə kə́ kʉ́ʉ kie fyii shʉ́əshʉ́ə ndəŋ fɔʼ-bʉəməsʉʉ-tə. Kaʼ wo kwɔ̀ʼtə mbɔ ɔ kie luu ndə məmɔ̀ʼfyii ndəŋ ntɛ-bənu-maa-hə-ɔ̄ŋ, təmə mɔ nɔ kie luu yɔ́ŋyɔ́ŋ.5Bə nɔ bí mɔ, i tíŋ vyii mbi bə fɔ̀ʼ mɔ. Bə bí mɔ, mɔ kə́ bɛ vaa-lɔʼɔ Isilɛ, lɔ̀ hə kəlɔŋ-Bɛŋnjamɛ, kə́ bɛ kɛŋ vaa sê Hibulu. Ndə mətʉ́ʼ nuʼ-Mushi, mɔ kə́ bɛ wo-Falasi.6Ndə fyii shʉ́əshʉ́ə, mɔ chɔ́ŋhə chɔshi. Ndə mətə́nə ndyʉndyʉ ndə mətʉ́ʼ nuʼ, mɔ bɛ tʉ́ʉnə.7Bɔŋ ndə sii ndə mɔ kə́ kʉ́ʉ kə kie chɔ inchəŋ, mɔ chɔ́ʼ mɛ̀ʼ bʉʼka Klai.8Ndə mə-bìʼ-bìa ndəŋ maa-yɔ̄ŋ, mɔ nɔʼ kə chɔ́ʼ nubə inchəŋ mɛ̀ʼ, bʉʼka fʉʼkə ndə i bɛ tʉ mɔ ndə məkínə Klai Jiso Tiekətʉ-ɔ təmə ntɛ-ɛ ghɔ fɛ. Bʉʼka mbəŋ-ɛŋ, mɔ nɔʼ kə nyíɛ ŋgʉəʼ, bɛ́ fɔbə inchəŋ, bɔŋ lɛ́nə nubə inchəŋ ndə məbɛ fɔ-mɛ̀ʼ-bə mbɔ sii-ɔ chʉʼ bɛ ndə məkie Klai,9baʼa ɔ bɔŋ chʉʼ bɛ fɔkə imɔʼ. Mɔ tʉʼ leʼ kɔ̀ɔtə ndə məbɛ ndyʉndyʉ tʉ Nyii nə yɔŋ-yə ghʉəʼkə ndə i gwè hə ndə mətʉ́ʼ nuʼ fɛ. Məbɛ ɔ ndyʉndyʉ, nɔ bɛ yi-yə ndə i gwè hə ndəŋ məmɔ̀ʼfyii ndə Klai. Nyii nɔ chìi mɔ ndə məbɛ ndyʉndyʉ bʉʼka mɔ məmɔ̀ʼfyii ndəŋ Klai.10Mɔ nɔ tʉʼ kʉ́ʉ ndə məkínə ɔŋ ghɔŋbə ntɛ-kəghʉəʼ ndə i kə bʉ̀nə kóʼhə ɔŋ ndʉʉ ndə ɔ kə kwú bɔŋleʼ nyíɛ ntɛ ŋgʉəʼ ndə ɔ kə nyíɛ, ndə məbɛ ndə ɔ ndəŋ kwu-i,11kə mbɔ ndəŋ fia təmiyɔŋ mɔ bu yi bʉ̀nə kóʼ ndʉʉ ndə mɔ kwú.12Mɔ tʉʼ ghɔ̀ŋ mbɔ mɔ nɔʼ kie nubə-ɔ̄ŋ inchəŋ fɛ byuunɔ mɔ nɔʼ bɛ tə gɛ̀ kùu fɛ, bɔŋ mɔ nɔ bíe kɔ̀ɔtə shʉ́əshʉ́ə ndə məyá i bɛ yɔŋ-yə, bʉʼka Klai Jiso nɔʼ yá mɔ ndə məbɛ yi-yə.13Bəliŋ-bɔŋ, mɔ chʉʼ lʉ̀ mbɔ mɔ nɔʼ yá tə i bɛ yɔŋ-yə fɛ. Bɔŋ mbyu kənu imɔʼ ndə mɔ tʉʼ chìi nɔ bɛ mbɔ mɔ nɔ tʉʼ lèʼnə fɔkə ndə mɔ nɔʼ tíŋ kɔ́ bɔ̌ŋ, kə́ kɔ̀ɔtə ndə məmɔ̀ʼ ghɔkə-ɔŋ ndəŋ yi-yə ndə i bɛ bəshʉ mɔ.14Mɔ nɔ tʉʼ kɔ̀ɔtə ndə mənyʉ́ʉ ndʉʉ-ɔ̄ gɛ̀ dàa liʼ-ghɔ̄ ndə məkie kɛŋbə ndə i bɛ yuo ndə Nyii tʉʼ tíi bʉʼʉ ndə məkɛ̀ŋ bʉʼʉ nə yɔŋ tíŋ hə bɔ̌ŋ Klai Jiso.15B̈ʉʼʉ bənchəŋ ndə bʉʼʉ nɔʼ tə̀ŋ mu Nyii kie ntɛ-ŋkwɔʼtə-ɔ̄ŋ. Bɔŋ kaʼ bəbɛʼbʉə mu bii kie ntɛ ŋkwɔʼtə kədɔŋ, təmə Nyii bu ŋɔ́ʼhə shʉtə-ii ghɔ, b̈ii kínə yɔ̄ŋ-yə.16Kaʼ bɛ bə ŋgwɔ ka, b̈ʉʼʉ yá fɔkə ndə bʉʼʉ nɔʼ kie tə́nə chɔ nə shʉəŋ.17Bəliŋ-bɔŋ, b̈ii kə́ lʉ̀ fʉʼ ndəŋ mɔ, tʉ́ʼ shʉtə-ii ndəŋ bʉə ndə bɔ̂ŋ tʉʼ lʉ̀ hə kəwu-baʼa.18Bʉʼka bʉə buŋmbi, ndə mɔ nɔʼ kə kə́ shyíi bii, bɔŋ kə́ bìʼ shyíi bii nduɔ nə shʉmə shʉmə-ɔŋ, bɔ̂ŋ nɔ tʉʼ chí mbi nə bʉə ndə bɔ̂ŋ tʉʼ dʉ̀ʉhə ntəŋ ndə i bɛ te kwu-Klai ndəŋ tyʉntɔɔnəkə.19Ndyiʼtə-yʉə nɔ bɛ məkwú bɛ́, bənyii-bʉə nɔ bɛ tɔbə-ʉə, bɔ̂ŋ kə́ ŋàʼtə ndə nu-kətʉvyiinə-bə, mɔ̀ʼ fyiihə-ʉə haʼ ndəŋ fɔ-kəchisê-bə.20Bɔŋ lɔʼɔ-yʉʼʉ nɔ bɛ yuo, bʉʼʉ kə́ chyìi Ŋkwaa-yʉʼʉ ndə məgwè hə chɔ, ndə ɔ bɛ Jiso Klai Tiekətʉ.21Ɔ bu chìi ntɛ mbʉə-lʉ́ʉtə-ɔ̄ŋ ndə bʉʼʉ kie nɔ bə̀ŋ, mbɔ bʉʼʉ chʉʼ kie yi-yə ntɛ mbʉə ndə bɛ mbʉə məgʉ́ə, kə́ fɔ̀ʼ nə ntɛ-kəghʉəʼ ndə ɔ kie ndə məshúʼhə fɔbə chɔ sê inchəŋ kə́ gìe kətʉ-bɔŋ.
Wycliffe Bible Translators, Inc.