Matia23
1Ndʉʉmɛ, Jiso ghɔ̀ŋ tʉ mbʉ nuɔ-bʉə ghɔŋbə vâafɔʼɔ-bi mbɔ,2“Bʉə dàhə nuʼ-Mushi ghɔŋbə bʉə-Falasi nɔ bɛ bʉə ndə bə kɔ́ ghʉəʼkə tʉ bɔŋ ndə mə-kə́-dàhə nuʼ-Mushi,3nɔ, b̈ii kə́ fɔ̀ʼ bɔŋleʼ chìi nubə nchəŋnchəŋ-ɛŋ ndə bɔ̂ŋ gìe tʉ bii, təmə bɔŋ kə́ fɔ̀ʼ yi-yə ndə bɔ̂ŋ tʉʼ fɔ̀ʼ fɛ. Bʉʼka bɔ̂ŋ tʉʼ lɔ̀ʼ ŋgieNyiikə təmə kə́ fɔ̀ʼ fɛ.4Bɔ̂ŋ tʉʼ kɔ́ʼ bɛʼ-shʉ́əshʉ́ə-kə liɛŋ bʉə ndə i chàa bɔŋ ndə məbɛ̀ʼ, təmə bɔŋ kʉ̀ʉ ndə mətɔ́ŋ bɔŋ məniʼ ndə məbɛ̀ʼ mbʉ kəbɛʼ fɛ.5“Bɔ̂ŋ nɔ tʉʼ fɔ̀ʼ fɔʼtə-ʉə inchəŋ mbɔ b̈ʉə nyíɛ bɔŋ. Kaʼ a lɛ́nə tʉkwiibə-ʉə leʼnə chutəyitə-ʉə, a nyíɛ ndə bɔ̂ŋ nyɔ̀ʼ ŋgieNyiikə kə́ŋhə mu vâa-bəkwo ndə bə túŋ nə gwo-nyaa kɔ́ʼ chɔ bɔŋleʼ chìi səʼ-dədə-tə ndəŋ tiɛŋ ndyihə-ʉə.6Bɔ̂ŋ bɔŋleʼ kə́ kʉ́ʉ yəŋkwɛʼtəŋbə ndə yəŋ-nchəŋtə-bə ghɔŋbə fɔŋkwɛʼtəŋbə mu njaagháaNyii ndə mədùʼ chɔ,7kə́ kʉ́ʉ mbɔ b̈ə kə́ bʉ́ʉnə tʉ bɔŋ ndə yəŋ-vyii-bə, tíi bɔŋ nə bəchicha.8Bə bɔŋ kie ndə mə-kə́-tíi bii nə bəchicha fɛ, bʉʼka bii nɔ kie mbyu chicha imɔʼ, bii bənchəŋ kə́ bɛ bəliŋ.9Kə bii mə tíi wo nə Tie-yii kəwʉʉnəmbi fɛ, bʉʼka bii nɔ kie haʼ mbyu Tie imɔʼ ndə ɔ bɛ yuo.10Byuunɔ, bə kie ndə mətíi bii nə bətiefɔʼɔ fɛ, bʉʼka bii nɔ kie haʼ mbyu Tiefɔʼ imɔʼ ndə ɔ bɛ Wo ndə Nyii Kùŋ Tə́ŋ.11Fɔŋ wokwɛʼtəŋ mu bii nɔ kie ndə məbɛ vaafɔ̀ʼ-yii.12Wo ndə ɔ kóʼhə ŋwɔŋ-ɛŋ ghɔʼ bu nyíɛ ŋwɔŋ-ɛŋ sê, bɔŋ wo ndə ɔ shúʼhə ŋwɔŋ-ɛŋ sê, bə bu kóʼhə ɔŋ ghɔʼ.13“Bɔŋ ŋgʉəʼ kətʉ-bii, bʉə dàhə nuʼ-Mushi leʼnə bʉə-Falasi, bii bʉə làhə shʉ! Bʉʼka bii nɔʼ fʉ̀əŋ chusii tʉ bʉə ndə məŋíi mu Sɔ́ʼ Fɔŋ Yuo. Bii tʉʼ ŋíi nə mbəŋ-yii fɛ təmə bɔŋ bɛ́ŋ mbɔ bəbɛʼbʉə ŋíi fɛ.14[Bɔŋ ŋgʉəʼ kətʉ-bii, bʉə dàhə nuʼ-Mushi leʼnə bʉə-Falasi! Bii bʉə làhə shʉ! Bii nɔ tʉʼ kwò fɔ-bəkwuʼ-bəke-bə. Bii nɔ tʉʼ gháaNyii duhəduhə kə́ làhə shʉ mbɔ bii bɛ ndyʉndyʉ. Bʉʼka yɔ̄ŋ-yə, fɛʼɛ-yii bu yi shʉ́ə daa.]15Ŋgʉəʼ kətʉ-bii, bʉə dàhə nuʼ-Mushi leʼnə bʉə-Falasi, bii bʉə làhə shʉ! Bʉʼka bii tʉʼ tòʼ ghʉ́ʉ byûu-mbi-tə inchəŋ ndə məchìi mbyu wo-imɔʼ ɔ gwè tʉ Nyii-bʉə-Isilɛ, bɔŋ ndʉʉ ndə ɔ bɛ́ŋ, bii chìi ɔ bɛ ŋkɔʼ-viʼi-Sata-mə vɛʼ bûu tə chàa bii.16“Ŋgʉəʼ kətʉ-bii, bəfʉ̀əŋtəshʉ ndə bɔ̂ŋ tʉʼ dʉ̀ʼ fia, kə́ ghɔ̀ŋ mbɔ, ‘Kaʼ wo kàa njaafɛ̀ʼndɛŋNyii, i bɛ nubɛʼkə fɛ, bɔŋ kaʼ ɔ kàa goo ndə i bɛ mu njaafɛ̀ʼndɛŋNyii, ɔ bu yaʼ tʉ́ʼ nukə ndə ɔ kàa.’17Bii bənɔ̌ʼɔ ndə shʉtə-ii nɔʼ fʉ̀əŋtə! Gʉ́ə yɔ̂ŋ-yə, mbʉ goo mɛ, kə mbʉ njaafɛ̀ʼndɛŋNyii ndə i chìi mbʉ goo, i bɛ tʉ́ʉnə?18Bii bɔŋleʼ kə́ ghɔ̀ŋ mbɔ, ‘Kaʼ wotəmiyɔŋ kàa yəŋ-fɛ̀ʼndɛŋNyii-kə mu njaafɛ̀ʼndɛŋNyii i bɛ nubɛʼkə fɛ, bɔŋ kaʼ ɔ kàa kɔkə ndə i bɛ chɔ, ɔ bu yaʼ tʉ́ʼ nukə ndə ɔ kàa.’19Shʉ-yii chíe ka mənɔ! Gʉ́ə yɔ̂ŋ-yə, mbʉ kəkɔ mɛ, kə mbʉ kəyəŋfɛ̀ʼndɛŋNyii ndə i chìi mbʉ kəkɔ, i bɛ fɔ-kəchɔŋ-kə?20Nɔ, wotəmiyɔŋ ndə ɔ kàa yəŋ-fɛ̀ʼndɛŋNyii-kə nɔ kàa yɔŋ leʼnə fɔbə inchəŋ ndə i bɛ ndəŋ ghɔ.21Wotəmiyɔŋ ndə ɔ kàa njaafɛ̀ʼndɛŋNyii nɔ kàa yɔŋ ghɔŋbə Nyii ndə ɔ tʉʼ chí chɔ.22Wotəmiyɔŋ ndə ɔ kàa yuo nɔ kàa yetə-Nyii-kə ghɔŋ mbʉ Nyii ndə ɔ yétə ndəŋ ghɔ.23“Ŋgʉəʼ kətʉ-bii, bʉə dàhə nuʼ-Mushi leʼnə bʉə-Falasi, bii bʉə làhə shʉ! Bʉʼka bii tʉʼ gyʉ̀əhə vâa-bəfɔ nuʼ-mbɔʼ-bə-ii yəŋbə wuŋ, bii kɔ́ yəŋkə imɔʼ tʉ Nyii, bɔŋ lèʼnə nukwɛʼtəŋbə ndə i bɛ mu nuʼ-Mushi nə məchʉ̀ə ŋkwɛ ndyʉndyʉ, mədʉ̀ʼ tʉvyiikə leʼnə məgìe shʉəŋ. Bii nɔ kie ndə məchìi nubə-ɔ̄ŋ təmə mɛ̀ʼtə bəbɛʼbə fɛ.24Bii bəfʉ̀əŋtəshʉ ndə bii tʉʼ dʉ̀ʼ fia, bii nɔ tʉʼ fʉ́əʼ muumə-ii bʉʼka mənú dyikə, bɔŋ kə́ nú nyaa-bəkatə muŋgɔ!25“Ŋgʉəʼ kətʉ-bii, bʉə dàhə nuʼ-Mushi leʼnə bʉə-Falasi, bii bʉə làhə shʉ! Bʉʼka bii nɔ tʉʼ sʉ̀ ndʉ̂ʉ ghɔŋbə belebaŋ njəŋmbi bɔŋ muhə-i kə́ bɛ ilə́ŋnə nə ntɔmə leʼnə məkwò fɔbə.26Bii bəfʉ̀əŋtəshʉ bʉə-Falasi! B̈ii fəŋ sʉ̀ mu ndʉ̂ʉ ghɔŋ belebaŋ, njəŋmbi chʉʼ leʼ tʉ́ʉnə ghɔ.27“Ŋgʉəʼ kətʉ-bii, bʉə dàhə nuʼ-Mushi leʼnə bʉə-Falasi, bii bʉə làhə shʉ! Bʉʼka bii nɔ bɛ nə sětə ndə bə nɔʼ yóʼ nə fʉ̀əŋ ndə i tʉʼ fyùʼ njəŋmbi bɔŋ mu-i kə́ bɛ ilə́ŋnə nə ghʉəʼ-bəŋkwubʉə-bə leʼnə fɔ-fɛ̀-bə.28Nɔ, mbəŋ-yii ghɔ nɔ tʉʼ dʉ̀ʼ mbɔ bii bɛ ndyʉndyʉ njəŋmbi tʉ bəbɛʼbʉə, bɔŋ mu fyiihə-ii kə́ bɛ ilə́ŋnə nə məlàhə shʉ leʼnə məbə́ʼ nuʼ.29“Ŋgʉəʼ kətʉ-bii, bʉə dàhə nuʼ-Mushi leʼnə bʉə-Falasi, bii bʉə làhə shʉ! Bʉʼka bii bɔ́ŋ sě-bʉəyʉkəŋgieNyii-tə bɔŋleʼ shʉ̀tə sě-bʉə-tə ndə bɔ̂ŋ kə tə́nə ndyʉndyʉ i bʉ̀ʉ,30kə́ ghɔ̀ŋ mbɔ, ‘Kaʼ baʼa kʉ̌ʉ nə bɛ vɛʼ bətie-baʼa, təmə baʼa kə́ fúu nuɔ baʼa bɔŋ ndə məchìi fɔbʉə-bʉəyʉkəŋgieNyii-kə bɛ́ kəghɔ-baʼa fɛ.’31“Nɔ, bii nɔ bɛ́ŋ nə mbəŋ-yii mbɔ bii la bɛ vâa-bʉə ndə bɔ̂ŋ kə yítə bʉəyʉkəŋgieNyii.32B̈ii gɛ̀ lɛ nə shʉbə ndə məmìʼtə fɔ̀ʼ ndə bətietie-bii kə chʉ́ʉhə.33Bii yɔhə, ŋgwie-kəfɛfɛ-hə, bəkɔ b̈ii láa ŋgwɔŋ Nyii ndə məgɛ̀ mu viʼi təka?34Ndʉʉghɔfii, mɔ bu tə́ŋ bʉəyʉkəŋgieNyii tʉ bii ghɔŋbə bʉə-mukətʉ-súunə leʼnə bʉə dàhə nuʼ-Mushi, bii bu yítə bəbɛʼbə, kwɛ̀ŋ bəbɛʼbə yítə, gwúutə bəbɛʼbə mu njaagháaNyiihə-ii bɔŋleʼ chɔ́ŋhə bəbɛʼbə lɔ̀ hə ndə yəŋkwɛʼtəŋkə imɔʼ dàa ndə ibɛʼ-yə,35mbɔ fɔbʉə-bʉə-bənchəŋ-kə ndə bɔ̂ŋ tə́nə ndyʉndyʉ ndə i nɔʼ nə bɛ́ kəwʉʉnəmbi-fɛ̄ŋ, yi shíʼ kətʉ-bii, lʉ̀ hə ndəŋ fɔbʉə-Abɛ-kə ndə ɔ nə kwú kə́ bɛ ndyʉndyʉ, tə gɛ̀ dàa ndə fɔbʉə-Sakalia-kə vaa-Balakia ndə bii kə yí ntəŋntəŋ njaafɛ̀ʼndɛŋNyii ghɔŋbə yəŋ-fɛ̀ʼndɛŋNyii-kə.36Nɔʼ m̈ɔ shyíi bii nə shʉəŋ mbɔ nubə-ɔ̄ŋ inchəŋ bu kwétə kətʉ ŋgwie-wo-ɔ̄ laa nɔ.37“A goo Jɛlosalɛŋ! A goo Jɛlosalɛŋ! Yəŋkwɛʼtəŋkə ndə bii yítə bʉəyʉkəŋgieNyii bɔŋleʼ túŋtə bʉə ndə bə tə́ŋ bɔŋ tʉ bii. Bɛ vɛʼsɛʼɛ ndə mɔ nɔʼ kʉ̀ʉ ndə məchə̀ŋtə bii ndə ŋkwê ŋgwo chə̀ŋtə vâa-bi, kwóhə tɔʼɔ bəghɔnə-ɔŋ le, təmə bii bɔŋ kʉ̀ʉ fɛ.38B̈ii nyíɛ, njaa-yii nɔ káa kəghɔ-bii bɔŋleʼ nʉ̀ʉ fuŋ.39M̈ɔ shyíi bii mbɔ bii bieleʼ nə nyíɛ mɔ fɛ, tʉ bii nə ghɔ̀ŋ mbɔ, ‘Tə Nyii bìʼ wo ndə ɔ gwè yie-Tiekətʉ.’ ”
Wycliffe Bible Translators, Inc.