Jɔŋ11
1Wobɛʼ ndə yie-e kə́ bɛ Lasalɔ nɔ kə́ yɔ́ʼyɔ́ʼ, kə́ bɛ wo-Bɛtani, kə́ bɛ lɔʼɔ ndə ɔ̃ kə chí chɔ ghɔŋbə bəliŋ-bi Mɛli ghɔŋ Mata.2Nɔ bɛ Mɛli ndə ɔ kə yóʼ Tiekətʉ nə ŋgwo-lùŋ-mə, yʉ̀əʼtə wubə-i nə nyu-kətʉ-hə-i le, ndə liŋ-iŋ Lasalɔ kə́ yɔ́ʼyɔ́ʼ.3Ndʉʉmɛ, bəliŋ-bi bəke tə́ŋ ntəŋ tʉ Jiso ghɔ̀ŋ mbɔ, “Tiekətʉ, tieŋkɔŋ-aŋ ndə a kʉ̀ʉ ɔ daa nɔ tʉʼ yɔ́ʼyɔ́ʼ.”4Bɔŋ Jiso kʉ̂ʉ yʉ́ yɔ̄ŋ-yə ghɔ̀ŋ mbɔ, “Yɔʼkə-ɔ̄ŋ kʉʉ lìʼ nə kwu fɛ. I nɔ bɛ ndə məgʉ́ə Nyii mbɔ VaaNyii chʉʼ kie məgʉ́ə tíŋ hə bɔ̌ŋ ghɔ.”5Jiso nɔ nə kʉ̀ʉ Mata ghɔŋ Mɛli liŋ-iŋ leʼnə Lasalɔ.6Ndʉʉ ndə ɔ kə yʉ́ mbɔ Lasalɔ tʉʼ yɔ́ʼyɔ́ʼ, ɔ káa kəyəŋ ndə ɔ kə bɛ chɔ ndəŋ chîbə ibûu.7Yɔ̄ŋ-yə kʉ̂ʉ tíŋ, ɔ ghɔ̀ŋ tʉ vâafɔʼɔ-bi mbɔ, “B̈ʉʼʉ bìʼ gɛ̀ mu Judia.”8Mbʉ vâafɔʼɔ-bi ghɔ̀ŋ tʉ ɔŋ mbɔ, “Chicha, i chʉʼ dɔ̀ŋnə ndə bəntəŋbəshʉ-bʉə-Juu kə́ kʉ́ʉ a ndə mətúŋtə a fɛ, a kə́ kʉ́ʉ ndə məbìʼ gɛ̀ chɔ la?”9Jiso bə̀ŋhə tʉ bɔŋ mbɔ, “M̃bi fíi nɔ, i bɛ bəchî njuɔ bûu nə wuŋ buŋ jʉ́ fe? Kaʼ mbi fíi wo kə́ tòʼ, ɔ mə leʼ wɔ̀tə fɛ, bʉʼka ɔ tʉʼ nyíɛ kɛʼɛ-kəwʉʉnəmbi-ɔ̄.10Bɔŋ kaʼ wo kə́ tòʼ hə mu kənjəŋ, ɔ wɔ̀tə bʉʼka mbɔ kɛʼɛ bɛ mu mbʉə-ɔ fɛ.”11Ɔ kʉ̂ʉ gìe nubə-ɔ̄ŋ liʼ, ghɔ̀ŋ tʉ bɔŋ mbɔ, “Tieŋkɔŋ-yʉʼʉ Lasalɔ nɔʼ káa, bɔŋ mɔ bu gɛ̀ chɔ̀ʼhə ɔŋ.”12Vâafɔʼɔ-bi ghɔ̀ŋ tʉ ɔŋ mbɔ, “Tiekətʉ, kaʼ ɔ nɔʼ káa təmə ɔ bu lɔ̀ hə sê.”13Bɔ̂ŋ kə́ kwɔ̀ʼtə mbɔ Jiso nɔ kə kə́ ghɔ̀ŋ mbɔ ɔ nɔ kɛŋ dùʼdùʼ sê ndə məkáa, Jiso bɔŋ nɔ kə kə́ ghɔ̀ŋ bə mbɔ ɔ nɔʼ kwú.14Ndʉʉmɛ, Jiso yɔ̀ʼ tiɛŋ-ɛŋ tʉ bɔŋ mbɔ, “Lasalɔ nɔʼ kwú.15Bɔŋ bʉʼka bii, tʉʉ-ɔ nɔ tʉʼ bʉ̀ʉ mbɔ mɔ kə bɛ chɔ fɛ, mbɔ bii chʉʼ mɔ̀ʼfyiihə-ii ndəŋ mɔ. Bɔŋ b̈ʉʼʉ gɛ̀ nyíɛ ɔŋ.”16Ndʉʉmɛ, Tɔmɔ ndə bə kə́ tíi ɔ nə vaanyii , gìe tʉ bəbɛʼbə vâafɔʼɔ ndə ghɔŋ bɔŋ kə bɛ mɔʼɔ mbɔ, “B̈ʉʼʉ gɛ̀ ghɔ, bʉʼʉ bɔŋ chʉʼ kwú mɔʼɔ.”17Ndʉʉ ndə Jiso dàa Bɛtani, bə shyíi ɔ mbɔ Lasalɔ la nɔʼ bɛ mu sě-e ndə chîbə kwi nduɔ.18Bɛtani nɔ nə kwɛ̀ʼtə hə mbʉə Jɛlosalɛŋ tə kə́ gɛ̀ nə bəghǔu ŋkɔŋ nə bəghǔu təghyʉʉ tətaa.19Tʉ bʉə-Juu buŋmbi nɔʼ gwè tʉ Mata ghɔŋ Mɛli ndə məgwè yʉ̀əʼ shʉmə hə shʉ-bɔŋ bʉʼka liŋ-yʉə ndə ɔ kə kwú.20Mata kʉ̂ʉ yʉ́ mbɔ Jiso tʉʼ gwè, ɔ gɛ̀ bìatə ɔŋ bɔŋ Mɛli shi káa mu njaa.21Mata ghɔ̀ŋ tʉ Jiso mbɔ, “Tiekətʉ, a kʉ̌ʉ nɔʼ kə bɛ fɛ̄ŋ, təmə liŋ-ɔŋ kə kwú fɛ.22Bɔŋ nduɔ mɔ nɔ kínə mbɔ nukə təmiyɔŋ ndə a bíʼtə tʉ Nyii, Nyii bu kɔ́ tʉ a.”23Jiso ghɔ̀ŋ tʉ ɔŋ mbɔ, “Liŋ-aŋ bu bʉ̀nə kóʼ.”24Mata ghɔ̀ŋ tʉ ɔŋ mbɔ, “Mɔ nɔ kínə mbɔ ɔ bu bʉ̀nə kóʼ ndʉʉ ndə bʉə ndə bɔ̂ŋ nɔʼ kwútə bu bʉ̀nə kóʼ ndəŋ ndyiʼtə-kəchî-kə.”25Jiso ghɔ̀ŋ tʉ ɔŋ mbɔ, “Mɔ nɔ bɛ məbʉ̀nə kóʼ ghɔŋbə məchímbi. Wotəmiyɔŋ ndə ɔ bɛ́ŋ mɔ, kaʼ ɔ kwúkwú, ɔ bu kie məchímbi.26Wotəmiyɔŋ ndə ɔ tʉʼ chí mbi bɛ́ŋ mɔ, kʉʉnə nyíɛ kwú fɛ. A bɛ́ŋ yɔ̄ŋ-yə mɛ?”27Ɔ ghɔ̀ŋ tʉ ɔŋ mbɔ, “Əŋ Tiekətʉ! Mɔ nɔ bɛ́ŋ mbɔ a nɔ bɛ mbʉ Wo ndə Nyii Kùŋ Tə́ŋ, mbʉ VaaNyii ndə ɔ kie ndə məgwè mu kəwʉʉnəmbi.”28Ndʉʉ ndə Mata kə gìe yɔ̄ŋ-yə, ɔ gɛ̀ tíi Mɛli liŋ-iŋ, gìe tʉ ɔŋ bɔ̌ŋbɔ̌ŋ mbɔ, “Chicha nɔ bɛ fɛ̄ŋ kə́ tíi a.”29Mɛli kʉ̂ʉ yʉ́ lɔ̀ hə sê nəndʉʉnəndʉʉ gɛ̀ bìatə tʉ ɔŋ.30Jiso chʉʼ kə gwè mbʉ mu lɔʼɔ fɛ, ɔ nɔ nə bíe kəyəŋ ndə Mata kə bìatə ɔŋ chɔ.31Ndʉʉ ndə bʉə-Juu ndə ghɔŋ bɔŋ kə bɛ mɔʼɔ mu njaa, bɔ̂ŋ kə́ yʉ̀əʼ shʉmə shʉ-bɔŋ, nyíɛ ndə Mɛli lɔ̀ hə sê nə ndʉʉ fyú mbi, bɔ̂ŋ gɛ̀ hə bɔ̌ŋ ɔŋ, kə́ kwɔ̀ʼtə mbɔ ɔ tʉʼ gɛ̀ ndəŋ mbʉ sě gɛ̀ kə́ gwía chɔ.32Ndʉʉ ndə Mɛli gwè dàa kəyəŋ ndə Jiso kə bɛ chɔ, gwù sê bəshʉ ɔ, kə́ ghɔ̀ŋ tʉ ɔŋ mbɔ, “Tiekətʉ, a kʉ̌ʉ nɔʼ kə bɛ fɛ̄ŋ, təmə liŋ-ɔŋ kə kwú fɛ.”33Ndʉʉ ndə Jiso kə nyíɛ ɔŋ, ɔ kə́ gwía, leʼnə bʉə-Juu ndə ghɔŋ bɔŋ kə́ bɛ mɔʼɔ kə́ gwíatə ghɔ, tʉʉ-i byʉ́ʼ daa, mu fyii-i kɔ́ ŋgʉəʼ tʉ ɔŋ.34Ɔ ghɔ̀ŋ mbɔ, “Bii tyúu ɔ fa?”Bɔ̂ŋ ghɔ̀ŋ tʉ ɔŋ mbɔ, “Tiekətʉ, gwè nyíɛ.”35Jiso gwía.36Ndʉʉmɛ, bʉə-Juu ghɔ̀ŋ mbɔ, “B̈ii nyíɛ! Ntɛ ŋkʉ̂ʉ ndə ɔ kie tʉ ɔŋ nyíɛ!”37Bɔŋ bəbɛʼbə ghɔ̀ŋ mbɔ, “Mbəŋ-ɛŋ ndə ɔ nə kə́ ŋɔ́ʼhə shʉ fʉ̀əŋtəshʉ, kə mə yá ɔ tʉ́ʼ təmə ɔ kwú fɛ fe?”38Tʉʉ Jiso bìʼ byʉ́ʼ, ɔ gɛ̀ mbʉə mbʉ sě. Mbʉ sě nɔ nə bɛ mbyuʼ ndə i bɛ ndəŋ ŋgoʼ, bə lʉ̀ ibɛʼ-yə ŋgoʼ chíe chu-i chɔ.39Jiso ghɔ̀ŋ mbɔ, “B̈ii chɔ̀ʼhə mbʉ ŋgoʼ.”Mata, liŋ mbʉ kəŋkwu wo, ghɔ̀ŋ mbɔ, “Tiekətʉ, ɔ nɔʼ lùŋ nduɔ, bʉʼka laa nɔ chîbə kwi ndə bə tyúu ɔ.”40Jiso ghɔ̀ŋ tʉ ɔŋ mbɔ, “Mɔ chʉʼ kə ghɔ̀ŋ tʉ a mbɔ kaʼ a mɔ̀ʼfyii-a ndəŋ mɔ, a nyíɛ məgʉə-Nyii fe?”41Bɔ̂ŋ chɔ̀ʼhə mbʉ ŋgoʼ, Jiso chɔ̀ʼhə shʉ-i ghɔʼ ghɔ̀ŋ mbɔ, “Tie-ɔ, mɔ nɔ kɔ́ ndɔ a mbɔ a nɔʼ yʉ́ mɔ.42Mɔ nɔ kínə mbɔ ã nɔ yʉ́ mɔ təvɛʼtəvɛʼ, mɔ bɔŋ kə́ gìe yɔ̄ŋ-yə ndə məkwáa bʉə-bɔ̄ŋ ndə bɔ̂ŋ tə́ŋtə yə̀ŋhə mɔ nɔ, bɔ̂ŋ chʉʼ bɛ́ŋ mbɔ nɔ tə́ŋ aŋ tə́ŋ mɔ.”43Ndʉʉ ndə ɔ kə gìe nubə-bɔ̄ŋ liʼ, ɔ tíi nə gyʉʉ dədə mbɔ, “Lasalɔ, lɔ̀ hə sê, kóʼ gwè mbi.”44Mbʉ wo ndə ɔ nɔʼ kə kwú kóʼ gwè mbi, kwiitə-i ghɔŋbə fʉəŋtə-i bə kɔ́ʼtə nə ndyi-kəfyuʼ-hə bɔŋleʼ lʉ́əŋtə shʉ-i nə ndyi. Jiso ghɔ̀ŋ tʉ bɔŋ mbɔ, “B̈ii yɔ̀ʼtə mɛ̀ʼtə ɔŋ, ɔ̈ gɛ̀.”45Buŋmbi bʉə-Juu ndʉʉmɛ, ndə ghɔŋbə Mɛli kə́ gwè mɔʼɔ, nyíɛ nukə ndə Jiso kə fɔ̀ʼ, bɛ́ŋ ɔŋ.46Bɔŋ bəbɛʼbə gɛ̀ tʉ bʉə-Falasi, gɛ̀ shyíi bɔŋ nə nukə ndə Jiso nɔʼ fɔ̀ʼ.47Ndʉʉmɛ, bətiefɛ̀ʼndɛŋNyii ghɔŋbə bʉə-Falasi chə̀ŋtə mbʉ kaŋsotə, ghɔ̀ŋ tʉ bɔŋ mbɔ, “Bʉʼʉ bu chìi ka? Bʉʼka wo-ɔ̄ nɔ tʉʼ chìi nubəcheʼbə buŋmbi.48Kaʼ bʉʼʉ mɛ̀ʼtə ɔŋ chɔ, bʉə bənchəŋ bɛ́ŋ ɔŋ, bʉə-Luŋ bɔŋleʼ gwè fí yəŋ-gháaNyii-kə-ʉʼʉ ghɔŋbə lɔʼɔ-yʉʼʉ.”49Bɔŋ mbyu wo-imɔʼ mu bɔŋ ndə yie-e kə bɛ Kaifa, kə́ bɛ ɔ bɛ tiefɛ̀ʼndɛŋkwɛʼtəŋNyii ndə ŋgʉʼʉmbi-ghɔ̄, ghɔ̀ŋ tʉ bɔŋ mbɔ, “Bii kɛŋ kínə nubɛʼkə fɛ.Tiefɛ̀ʼndɛŋkwɛʼtəŋNyii ndə ɔ̃ fɛ̀ʼndɛŋ tʉ Nyii50Bii kínə mbɔ bʉ̀ʉ m̈byu-wo-imɔʼ kwú yie bʉə bənchəŋ tə chàa mbɔ bʉə bənchəŋ kwú fe?”51Ɔ kə gìe yɔ̄ŋ-yə nə yi-yə ghʉəʼkə fɛ, bɔŋ bʉʼka mbɔ ɔ kə bɛ tiefɛ̀ʼndɛŋkwɛʼtəŋNyii ndə ŋgʉʼʉmbi-ghɔ̄, ɔ nɔ kə́ téʼ ntəŋ ndə i gwè hə kəghɔ-Nyii mbɔ Jiso la bu kwú yie-lɔʼɔ bənchəŋ.52Kaa bə haʼ yie-lɔʼɔ baabaa fɛ, bɔŋ ndə mə-leʼ-chə̀ŋtə vâa-Nyii ndə məbɛ fɔkə imɔʼ ndə bɔ̂ŋ nɔʼ kə wɔ̀ʼnə bəyəŋbəyəŋ.53Lʉ̀ hə mbi-ghɔ̄ gɛ̀ nə shʉbə, bɔ̂ŋ kə́ kʉ́ʉ fia ndə məyí ɔ.54Təmə Jiso leʼ kə́ tòʼ ŋgwʉʉnə mu bʉə-Juu fɛ, bɔŋ ɔ lɔ̀ hə chɔ gɛ̀ mbʉə kwɔŋkəyəŋnə, mu kəyəŋkwɛʼtəŋbɛʼ bə kə́ tíi nə Ɛflɛŋ, gɛ̀ kə́ chí chɔ ghɔŋbə vâafɔʼɔ-bi.55Ndʉʉ-Yíɛʼsii-bʉə-Juu nɔʼ kə kə́ŋhə, bʉə buŋmbi lɔ̀ hə mu lɔʼɔ, kóʼ gɛ̀ Jɛlosalɛŋ ndə məgɛ̀ búu ŋwɔŋ-yʉə ndʉʉ Yíɛʼsii buŋ dàa.56Bɔ̂ŋ kə́ kʉ́ʉ Jiso, kə́ bíʼtə tʉ ŋwɔŋtə-ʉə ndə bɔ̂ŋ kə bɛ mu chunjaafɛ̀ʼndɛŋNyii, kə́ ghɔ̀ŋ mbɔ, “Bii kwɔ̀ʼtə mbuka? Mbɔ, tə yi kə lìʼ ɔ gwè ndə nchəŋtə-ɔ̄ŋ fɛ la?”57Ndʉʉmɛ, bətiefɛ̀ʼndɛŋNyii ghɔŋbə bʉə-Falasi nɔʼ kə kàhə mbɔ kaʼ wo kínə yəŋkə ndə ɔ bɛ chɔ, ɔ̈ chìi bɔŋ kínə chʉʼ gɛ̀ yá ɔ.
Wycliffe Bible Translators, Inc.