Jɛŋ4
1Tʉʼ gwè ka nə chyuutə ghɔŋbə byuʼtə mu bii? Kaa ŋkwɔʼtə bʉəbʉə ndə i tʉʼ gwúu byuʼu mu fyii-bii fe?2Bii nɔ tʉʼ mʉ̀ʉ təmə kə́ kie fɛ, ndʉʉmɛ, i gwè nə bàa ndə bəkɔ i yí wo. Bii kə́ kʉ́ʉ mbɔ f̈ɔ-bʉə-bə bɛ yii-yə təmə kə́ kie fɛ, ndʉʉmɛ bii kə́ gwúu byuʼtə bɔŋleʼ mɔ̀ʼ chyuutə. Bii tʉʼ kie fɛ, bʉʼka bii tʉʼ bíʼtə fɛ.3Bii nɔ tʉʼ bíʼtə təmə kə́ kie fɛ, bʉʼka bii nɔ tʉʼ bíʼtə nə luu bʉəbʉə, ndə məyú ndə ntɛhə ndə fyii-ii tʉʼ kʉ́ʉ.4Bii bəŋghaa-bəsəŋ! Bii kínə mbɔ məchìi bətieŋkɔŋ biibə wʉʉnəmbikə, bɛ bàa tʉ biibə Nyii fe? Nɔ, wotəmiyɔŋ ndə ɔ kʉ̀ʉ ndə məchìi bətieŋkɔŋ ghɔŋbə wʉʉnəmbikə nɔ bɛ wobàa Nyii.5Byuunɔ, bii kwɔ̀ʼtə mbɔ ŋwɔʼnə-Nyii kə mɔ̀ʼ bɛ́ ndə məghɔ̀ŋ mbɔ, “Nyii nɔ tʉʼ túunə bəfyuʼ shʉ́əshʉ́ə ndə lyʉʉhəkə ndə ɔ kɔ́ mu mbʉə-bʉʼʉ” mɛ?6Bɔŋ ɔ nɔ dʉ̀ʼ buuŋjyu yɔ́ŋyɔ́ŋ, ndə ŋwɔʼnə-Nyii ghɔ̀ŋ mbɔ,“Nyii nɔ tʉʼ dʉ̀ʼ ghɔkə-i chu bʉə ndə bɔ̂ŋ kie tʉʉ gʉənəbɔŋ ɔ nɔ tʉʼ dʉ̀ʼ buuŋjyu tʉ bʉə ndə bɔ̂ŋ lʉ̀ ŋwɔŋ-yʉə sê.” 7Nɔ, b̈ii ké ŋwɔŋ-yii tʉ Nyii, kwɛ̀ŋhə tʉ Debulu, ɔ bu nyʉ́ʉ bii.8B̈ii kwɛ̀ʼtə gɛ̀ mbʉə Nyii, Nyii bu kwɛ̀ʼtə gwè mbʉə-bii. B̈ii sʉ̀ ghɔbə-ii, bii bʉə-bʉ̂ʼʉ, sʉ̀fyiihə-ii, bʉə təbuuŋ bûu.9B̈ii vínə, lí bɔŋleʼ gwía. B̈ii kíahə chʉ́əʼtə-ii ndə gwia, kíahə tʉʉjyu-yii ndə məvínə.10B̈ii shúʼhə ŋwɔŋ-yii sê bəshʉ Tiekətʉ, ɔ bu kóʼhə a ghɔʼ.11Bəliŋ-bɔŋ, b̈ii mə kə́ tòʼ tíi yie-bəbɛʼbʉə-tə bʉəbʉə fɛ. Wo ndə ɔ tʉʼ tòʼ tíi yie liŋ-iŋ, byuunɔ kə́ chʉ̀ə ŋkwɛ-ɛ bʉəbʉə, nɔ tʉʼ gìe bʉ̂ʼʉ te nuʼ-Nyii bɔŋ-kə́-leʼ chʉ̀ə ŋkwɛ bʉəbʉə te mbʉ nuʼ. Bɔŋ kaʼ wo chʉ̀ə ŋkwɛ bʉəbʉə te mbʉ nuʼ-Nyii, təmə ɔ kaa wo ndə ɔ tʉʼ tʉ́ʼ nuʼ fɛ bɔŋ kə́ bɛ wo ndə ɔ tʉʼ kwɛ̀ nubə bʉəbʉə te mbʉ nuʼ.12Nɔ bɛ haʼ mbyu wo-imɔʼ ndə ɔ̃ kɔ́ nuʼ, kə́ chʉ̀ə ɔ chʉ̀ə ŋkwɛ, kə́ bɛ mbəŋ-ɛŋ ndə ɔ kie ghʉəʼkə ndə məkwáa bɔŋleʼ kie ghʉəʼkə ndə məbʉ́əhə. A bɛ nda ndə mə-kə́-chʉ̀ə ŋkwɛ wo-kətoʼ-a?13B̈ii yʉ́, bii ndə bii tʉʼ ghɔ̀ŋ mbɔ, “Laa byuunɔ yɔ̂ŋ baʼa bu gɛ̀ lɔʼɔ-fɛ̄ŋ byuunɔ lɔʼɔ fīi, gɛ̀ chí chɔ ndə ŋgʉʼʉmbi chìi mbɛʼnə kie sii.”14B̈ii kínə ntɛ-kənu ndə i bu sɛŋ bɛ yɔ̂ŋ tʉ bii fɛ. Məchimbi-yii bɛ ka? Bii nɔ bɛ nə vaakəmbɔʼ ndə ĩ lɔ̀ hə sê kʉʉkə məniʼ nɔ i sɛ̀nə mì.15Bii nɔ kie ndə məghɔ̀ŋ bə mbɔ, “Kaʼ Tiekətʉ bɛ́ŋ, baʼa chí mbi, kə́ fɔ̀ʼ yɔ̄ŋ-yə byuunɔ yīŋ-yə.”16Bɔŋ nduɔ, bii nɔ tʉʼ kwɛ̀ŋ fyii bə ndə yi-yə məgʉ́ə. Yɔ̄ŋ-yə ntɛ məkwɛ̀ŋ fyii nɔ bɛ yi-bʉəbʉə-yə.17Nɔ, wo ndə ɔ kínə nu-shʉəŋ-kə ndə məfɔ̀ʼ bɔŋ tɛ́ŋ ndə məfɔ̀ʼ nɔʼ chìi bʉ̂ʼʉ.
Wycliffe Bible Translators, Inc.