Jɛŋ2
1Bəliŋ-bɔŋ, nduɔ ndə bii nɔʼ mɔ̀ʼfyiihə-ii ndəŋ Jiso Klai Tiekətʉ, ɔ kə́ bɛ Tiekətʉ məgʉ́ə nɔ, bii mə kə́ túhə shʉ fɛ.2Ndə fʉʼkənu, kaʼ wo gwè nchəŋtə-bii, kɔ́ vâafyîi goo kəghɔ-ɔ bɔŋleʼ kɔ́ʼ ŋwɔŋ-ɛŋ nə ndyi-kyʉə-hə, wokəbyuubɛʼ ghɔ leʼ gwè nə ndyi-jɔ̀ʼnə-hə mbʉə-ɔ3kaʼ bii lɛ́nə wo ndə ɔ kɔ́ʼ ŋwɔŋ-ɛŋ nə ndyi-kyʉə-hə gìe tʉ ɔŋ mbɔ, “Dùʼ fɛ̄ŋ ndəŋ yəŋ-jyujyu-kə,” ndʉʉmɛ, bii gìe tʉ wokəbyuu-i mbɔ, “Gɛ̀ dùʼ fīi,” byuunɔ, “Shyíʼ dùʼ sê bəshʉ-mɔ,”4təmə bii chʉʼ túhə shʉ mu bii ndə məkwɛ̀ ŋkwɛ nə ŋkwɔʼtə bʉəbʉə fe?5B̈ii yʉ́, ŋkɛŋ bəliŋ-bɔŋ, Nyii chʉʼ séʼ bʉə-kəbyuu kəchisê fɛ̄ŋ ndə məkie fʉʼkə tíŋ hə bɔ̌ŋ məmɔʼfyiihə-ʉə ndəŋ Nyii bɔŋleʼ bɛ njuhə ntoʼ-Nyii, ndə ɔ nɔʼ kə kɔ̀ʼnə tʉ bʉə ndə bɔ̂ŋ kʉ̀ʉ ɔ fe?6Bɔŋ bii nɔ mɔ̀ʼ tʉvyii-wokəbyuu-kə. Bɔŋ kaa bʉə-kəfʉʼ ndə bɔ̂ŋ tʉʼ chɔ́ŋhə bii, bɔŋleʼ dùu bii gɛ̀ nə yɔŋ mu njaafɛ̀ʼ fe?7Kaa bɔ̂ŋ ndə bɔ̂ŋ tʉʼ dʉ̀ʉhə yie-Jiso ndə bɛ yiekwɛʼtəŋ ndə bə tʉʼ tíi bii nə yɔŋ fe?8Kaʼ tʉ́ʼ nuʼ ntoʼ-Nyii shʉəŋshʉəŋ kɛŋ haʼ ndə i bɛ mu ŋwɔʼnə-Nyii, “Kʉ̀ʉ wo-kətoʼ-a haʼ ndə a kʉ̀ʉ ŋwɔŋ-aŋ,” təmə a nɔ tʉʼ fɔ̀ʼ jyujyu.9Bɔŋ kaʼ bii kə́ túhə shʉ, təmə bii nɔ tʉʼ chìi bʉ̂ʼʉ bɔŋ ndə nuʼ-Nyii bə bu lʉ̀ bii nə bʉə-bʉ̂ʼʉ ndə bɔ̂ŋ tʉʼ bə́ʼ nuʼ-Nyii.10Bɔŋ wotəmiyɔŋ ndə ɔ tʉ́ʼ mbʉ nuʼ inchəŋ bɔŋ bə́ʼ imɔʼ nɔʼ gwù mbʉ nuʼ inchəŋ.11Nyii ndə ɔ kə ghɔ̀ŋ mbɔ, “Kə a mə gháa bəsəŋ fɛ,” nɔ leʼ gìe ghɔ mbɔ, “Kə a mə yí wo fɛ.” Kaʼ gòʼ təmə kə́ gháa bəsəŋ fɛ, bɔŋ kə́ yi wo, təmə a nɔʼ bə́ʼ nuʼ.12Nɔ, nukə təmiyɔŋ ndə a gìe, byuunɔ yi ndə a chìi, kə́ kwɛ́nə mbɔ bə bu chʉ̀ə ŋkwɛ-a bʉəbʉə nə nuʼ-Nyii ndə i chìi tʉkə-a lʉ́ʉ a.13Bʉʼka bə mədʉ̀ʼ tʉvyiikə tʉ wotəmiyɔŋ ndə ndʉʉ məchʉ̀ə ŋkwɛ ndə ɔ nɔʼ nə gòʼ təmə dʉ̀ʼ tʉvyiikə fɛ. Tʉ-Nyii-kə bu vyíi tʉ wotəmiyɔŋ ndə ɔ dʉ̀ʼ tʉvyiikə ndʉʉ ndə Nyii tʉʼ chʉ̀ə ŋkwɛ-ɛ.14Bəliŋ-bɔŋ, bɛ yɔ̂ŋ-yə nu-jyujyu-kə ndə i bɛ tʉ wo kaʼ ɔ ghɔ̀ŋ mbɔ ɔ mɔ̀ʼfyii ndəŋ Nyii təmə bɔŋ kə́ fɔ̀ʼ fɛ? Bəkɔ ntɛ məmɔʼfyii-maa-ɔ̄ŋ kwáa ɔ mɛ?15Kaʼ liŋ-aŋ woləŋ byuunɔ woke mu Nyii, byúu ndyi ndə məmɔ̀ʼ byuunɔ təmə kie fɔyubə bəchibəchi ndə məyú fɛ,16bɔŋ mbyu wo mu bii gìe tʉ ɔŋ mbɔ, “Tòʼ jyu, gɛ̀ mbʉə-a ghɔʼ, bɔŋleʼ yú yuo,” təmə bɔŋ kɔ́ fɔkə tʉ ɔŋ ndə ɔ tʉʼ byúu fɛ, bɛ yɔ̂ŋ-yə nu-jyujyu-kə ndə bii fɔ̀ʼ nə nɔŋ?17Nɔ bɛ haʼ nɔ ndə məmɔ̀ʼfyii bɛ nə mbəŋ-ɛŋ, kaʼ məmɔ̀ʼfyii gòʼ təmə dʉ̀ʼ ndə fɔ̀ʼ fɛ, təmə i nɔʼ kwú.18Bɔŋ wobɛʼ bu ghɔ̀ŋ mbɔ, “A nɔ mɔ̀ʼfyii-a ndəŋ Nyii, mɔ bɔŋ kə́ fɔ̀ʼ yɔŋ-yə bɛ fɔ̀ʼ.” Dʉ̀ʼ tʉ mɔ ndə a mɔ̀ʼfyii-a ndəŋ Nyii təmə fɔ̀ʼ fɛ, mɔ dʉ̀ʼ tʉ a ndə mɔ mɔ̀ʼfyii-ɔ ndəŋ Nyii nə fɔʼɔ-ɔ.19A nɔ kínə mbɔ Nyii nɔ bɛ imɔʼ, i nɔ kʉ̀ʼnə. Buŋ lyʉʉhəbʉəbʉəbə nɔ kínə haʼ nɔ ghɔ, tə bɔ̂ŋ kə́ gwònə.20Nɔ̌ʼ-ɔ̄ŋ, a tʉʼ kʉ́ʉ mbɔ b̈ə dʉ̀ʼdʉ̀ʼ tʉ a, mbɔ məmɔ̀ʼfyii ndəŋ Nyii təmə fɔ̀ʼ fɛ, bɛ njʉnjʉ mɛ?21Bə kə́ lʉ̀ tie-yʉʼʉ Ablahaŋ ndə məbɛ ndyʉndyʉ tíŋ hə bɔ̌ŋ fɔʼɔ-ɛ bʉʼka ɔ kə fɛ̀ʼndɛŋ nə vaa-ɛ, Aisi, ndəŋ kəyəŋfɛ̀ʼndɛŋNyii fe?22Bəkɔ a nyíɛ mbɔ məmɔʼfyii-i nɔ kə́ tòʼ ghɔŋbə fɔʼɔ-ɛ, məmɔʼfyii-i nɔ kə gɛ̀ kùu tíŋ hə bɔ̌ŋ fɔʼɔ-ɛ.23Ŋwɔʼnə Nyii nɔ nə fyú shʉəŋ ndə i kə ghɔ̀ŋ mbɔ, “Ablahaŋ nɔ nə bɛ́ŋ Nyii, i chìi bə lʉ̀ mbɔ ɔ la bɛ ndyʉndyʉ bəshʉ-Nyii.” Bə tíi ɔ nə tiekənu Nyii.24A le nyíɛ nduɔ mbɔ w̃o nɔ bɛ kʉ̀ʼnə bəshʉ-Nyii ndə fɔ̀ʼ kaa bə haʼ ndə məmɔ̀ʼfyii ndəŋ Nyii fɛ.25Nɔ bɛ haʼ nɔ ndə Laha, ndə ɔ kə́ bɛ sɔkʉʉ, kə bɛ ndyʉndyʉ bəshʉ-Nyii ndʉʉ ndə ɔ kə lʉ̀ mbʉ bʉə-ntəŋ-ghɔ̄bə fyúhə bɔŋ kɔ́ mbi ndə ibɛʼ-yə fia fe? 26Bʉʼka mbɔ haʼ ndə ŋkwê mbʉə-a bɛ təmə lyʉʉhəkə fɛ bɛ kwu, məmɔ̀ʼfyii ndəŋ Nyii təmə fɔ̀ʼ fɛ nɔ bɛ kwu.
Wycliffe Bible Translators, Inc.